ក្រចេះ៖ កោះទ្រង់ជាសហគមន៍ទេសចរណ៍ធម្មជាតិមួយ ក្នុងចំណោមតំបន់ទេសចរណ៍ពេញនិយមដទៃទៀតនៅខេត្តក្រចេះ។ សម្រស់ធម្មជាតិដ៏ត្រកាល វាលខ្សាច់សក្បុស ទិដ្ឋភាពបន្លែ និងដំណាំផ្សេងៗ របស់ពលរដ្ឋនៅលើកោះទ្រង់ដែលស្ថិតនៅទល់មុខក្រុងក្រចេះនេះ បន្តទាក់ទាញទេសចរជាតិ និងអន្តរជាតិ ពីទីជិតឆ្ងាយ ឱ្យមកកម្សាន្តជាហូរហែ។
កោះទ្រង់ មាន២ភូមិ គឺភូមិក្បាលកោះ និងភូមិចុងកោះ ដែលលាតសន្ធឹងលើផ្ទៃដីទំហំ ២២៣ហិកតា។ កោះនេះ មានពលរដ្ឋប្រមាណ ១ ៧០០នាក់ ភាគច្រើនជាកសិករធ្វើស្រែចម្ការ។ ពលរដ្ឋមួយចំនួនទៀត ផ្តល់សេវាបដិសណ្ឋារកិច្ច រៀបចំផ្ទះស្នាក់ និងចម្អិនអាហារសម្រាប់ទេសចរ។ របរតូចតាចផ្សេងទៀត ដូចជាការដាំបន្លែក្នុងរោងតូចៗ និងការធ្វើនេសាទ ក៏រួមចំណែកដោះស្រាយជីវភាពប្រជាជនខ្លះទៀតនៅលើកោះនេះដែរ។
ដើម្បីទៅកម្សាន្តនៅដែនកោះដែលស្ថិតកណ្តាលទន្លេមេគង្គនេះ អ្នកទេសចរត្រូវជិះទូកដរ ដែលសំចតអែបច្រាំងរង់ចាំចម្លងមនុស្សម្នាទៅមកជារៀងរាល់ថ្ងៃ។ សេវាកម្មទូកចម្លង ដែលមធ្យោបាយធ្វើដំណើរជាប្រចាំរបស់ពលរដ្ឋរស់នៅលើកោះទ្រង់នេះ មានតម្លៃ១ពាន់រៀល។
កោះទ្រង់ មាន២ភូមិ គឺភូមិក្បាលកោះ និងភូមិចុងកោះ ដែលលាតសន្ធឹងលើផ្ទៃដីទំហំ ២២៣ហិកតា។ កោះនេះ មានពលរដ្ឋប្រមាណ ១ ៧០០នាក់ ភាគច្រើនជាកសិករធ្វើស្រែចម្ការ។
អ្នកស្រី សៅ ស៊ី គឺជាម្ចាស់ទូកចម្លងនេះជាង៣០ឆ្នាំហើយ។ បន្ទាប់ពីរៀបចំទីតាំងឱ្យអ្នកដំណើរចតយានជំនិះរួច អ្នកស្រី សៅ ស៊ី ឆ្លៀតប្រាប់សារព័ត៌មានThmeyThmey២៥ ថាជារៀងរាល់ថ្ងៃ មានអ្នកដំណើរប្រមាណ២០០នាក់ ឆ្លងចេញចូលកោះទ្រង់ និងក្រុងក្រចេះ។
«ចាប់ផ្តើមជើងទី១ នៅម៉ោង៦កន្លះចេញពីកោះ។ ចំណែកពេលយប់យើងសម្រាកម៉ោង៦កន្លះដូចគ្នា។ បើអ្នកដំណើរមានទាំង ទេសចរបរទេស អ្នកភូមិ អ្នកមកពីឆ្ងាយ។ ពួកគាត់នឹងឆ្លងទូកនេះ ពេលចង់ទៅលេងនៅកោះ។»។
អ្នកស្រី សៅ ស៊ី គឺជាម្ចាស់ទូកចម្លងនេះជាង៣០ឆ្នាំហើយ។
អ្នកដំណើរត្រូវចំណាយពេលប្រមាណ ១៥នាទី នៅលើទូកចម្លង ឆ្លងពីច្រាំងម្ខាងនៃមាត់ទន្លេក្រុងក្រចេះ ឆ្ពោះទៅកោះទ្រង់ដែលផុសសន្ធឹងកណ្តាលទន្លេ។ រយៈពេលនៅលើផ្ទៃទឹកទន្លេមេគង្គនេះ ទាំងភ្ញៀវទេសចរ ពលរដ្ឋផ្សេងទៀត អាចគយគន់នាយអាយ និងស្រូបខ្យល់បរិសុទ្ធ នារដូវប្រាំង។
មកដល់ច្រាំងនៃកោះ អ្នកទេសចរ ត្រូវធ្វើដំណើរឆ្លងកាត់វាលខ្សាច់សក្បុសប្រមាណ២០០ម៉ែត្រ មុននឹងទៅដល់ច្រកចូលកោះទ្រង់ ដែលមានទីស្នាក់ការសហគមន៍ទេសចរណ៍កោះទ្រង់រុងរឿងជាសម្គាល់។ សម្រាប់ភ្ញៀវទេសចរ នៅច្រកចូលនេះហើយ ដែលពួកគេអាចសាកសួរព័ត៌មានអំពីសេវាកម្មទេសចរណ៍នានា ហើយក៏អាចជួលកង់ ម៉ូតូ រទេះគោ ឬរទេះសេះ ជិះកម្សាន្ត និងទស្សនាទេសភាពធម្មជាតិជុំវិញកោះ ឱ្យអស់កង្វល់។
អ្នកដំណើរត្រូវចំណាយពេលប្រមាណ ១៥នាទី នៅលើទូកចម្លង ឆ្លងពីច្រាំងម្ខាងនៃមាត់ទន្លេក្រុងក្រចេះ ឆ្ពោះទៅកោះទ្រង់ដែលផុសសន្ធឹងកណ្តាលទន្លេ។
ដែនកោះនេះ ដីសម្បូរទៅដោយដីមានជីវជាតិ អំណោយផលដល់វិស័យកសិកម្ម។ នៅជុំវិញផ្ទះរបស់ពលរដ្ឋ ហ៊ុមព័ទ្ធទៅរុក្ខជាតិតូចធំ និងដំណាំហូបផ្លែចម្រុះ ជាពិសេសគឺក្រូចថ្លុង ដែលមានឱជារសឆ្ងាញ់និងជាផលិតផលម៉ាកសម្គាល់ភូមិសាស្រ្តផងដែរ។ ដំណាំមួយមុខនេះ ប្រៀបដូចជាសរសៃឈាមសេដ្ឋកិច្ចដ៏សំខាន់សម្រាប់ជីវភាពពលរដ្ឋនៅទីនេះ។
ស្ទើរតេគ្រប់ផ្ទះ អ្នកភូមិបានដាំដើមក្រូចថ្លុងស្ទើរឥតចន្លោះដី ហើយនៅរាល់ពេលប្រមូលផលម្តងៗ ពួកគេដាក់តម្រៀបលក់ក្រូចនៅមុខផ្ទះរៀងខ្លួន សម្រាប់អ្នកទេសចរ។ ក្រូចមួយចំនួនធំទៀតច្រកដាក់បាវបោះទៅឱ្យឈ្មួញ យកទៅលក់នៅលើទីផ្សារតាមបណ្តាខេត្តនានា។ អ្នកភូមិ ដាក់លក់ក្រូចថ្លុងក្នុងតម្លៃចាប់ពី៥ពាន់រៀលឡើងទៅ។
លោក ប៉ែន យ៉ន់ ជាប្រធានសហគមន៍កសិកម្មកោះទ្រង់រុងរឿង ហើយក៏ជាអ្នកដាំដុះក្រូចថ្លុងម្នាក់ នៅក្នុងចំណោមពលរដ្ឋ ៩៥គ្រួសារ នៅលើកោះនេះ។ ដើមក្រូចប្រមាណ ៣០ដើម នៅជុំវិញផ្ទះរបស់បុរសវ័យ៧០ឆ្នាំរូបនេះ គឺជាប្រភពចំណូលដ៏ចម្បងរបស់គាត់។ ប្រាក់ដែលទទួលបានពីការលក់ផ្លែក្រូចថ្លុងធ្វើឱ្យលោក ប៉ែន យ៉ន់ អាចផ្គត់ផ្គង់កូនប្រុសស្រី៤នាក់ រៀនបញ្ចប់បរិញ្ញាបត្របានយ៉ាងស្រួល។
លោក ប៉ែន យ៉ន់ ជាប្រធានសហគមន៍កសិកម្មកោះទ្រង់រុងរឿង
«ក្រូចនេះ បានតពីឪពុកខ្ញុំមក រហូតដល់ពេលសព្វថ្ងៃនេះ។ ប្រាក់ចំណូល ដែលបានពីក្រូចថ្លុង គឺច្រើនជាងការដាំបន្លែ។ ទៅតាមធម្មជាតិរបស់ដី អត់មានដាក់ជីទេ។ បើសិនជាភ្លៀងចុងរដូវដែលក្រូចកំពុងតែផ្លែ ក្រូចអាចថយគុណភាព វាអត់សូវផ្អែម ទៅជាជូរផ្អែម។»។
លោក សំ បួយ ចៅសង្កាត់កោះទ្រង់ បានប្រាប់សារព័ត៌មាន Thmeythmey25 ថា នៅចុងសប្តាហ៍សម្បូរអ្នកដំណើរជាងថ្ងៃធម្មតា។ លោកចៅសង្កាត់រូបនេះ ត្រេកអរនៅពេលដែលទេសចរ នៅតែនឹកនាំ ហើយវិលត្រឡប់មកកម្សាន្តនៅកោះទ្រង់វិញ ក្រោយវិបត្តិកូវីដ-១៩។
លោក សំ បួយ ចៅសង្កាត់កោះទ្រង់
«ខ្យល់អាកាសបរិសុទ្ធ អាចទាក់ទាញភ្ញៀវបរទេស ដែលមកលេងហ្នឹង បើទោះម៉ោងប៉ុន្មានក៏ដោយ ពួកគាត់នៅតែស្កាត់ដើម្បីមកលេង។ ទី១យើងមានផ្ទះស្នាក់ ហើយហ្នឹងដើមឈើធំៗ ដែលមានសត្វជ្រឹងរស់នៅ។ ឯភ្ញៀវជាតិយើង មកកម្សាន្តទីនេះ ក៏ដើម្បីញុំាំក្រូចថ្លុង។ ទាំងអស់នេះ គឺជាសក្តានុពលនៃសង្កាត់កោះទ្រង់។»។
បើទោះបីជា ចំនួនអ្នកទេសចរ មិនទាន់ច្រើនដូចដើម ប៉ុន្តែវត្តមានភ្ញៀវទេសចរនេះ គឺជាក្តីសង្ឃឹមសម្រាប់ប្រជាពលរដ្ឋនៅសហគមន៍ទេសចរណ៍កោះទ្រង់ ហើយវាក៏សបញ្ជាក់ឱ្យឃើញថា ទិដ្ឋភាពធម្មជាតិដ៏ត្រកាល និងបដិសណ្ឋារកិច្ចល្អរបស់ប្រជាពលរដ្ឋនៅលើដែនកោះ ទល់មុខក្រុងក្រចេះនេះ នៅតែបន្តអន្ទង់ចិត្តទេសចរឱ្យមកកម្សាន្តម្តងហើយ ម្តងទៀត៕
ពលរដ្ឋក្នុងភូមិបាន ដាក់តម្រៀបលក់ក្រូចនៅមុខផ្ទះរៀងខ្លួន សម្រាប់អ្នកទេសចរ។
ដំណាំក្រូចថ្លុង ប្រៀបដូចជាសរសៃឈាមសេដ្ឋកិច្ចដ៏សំខាន់សម្រាប់ជីវភាពពលរដ្ឋនៅទីនេះ។