គ្រាប់កាំភ្លើងធំប្រមាណ ២០០គ្រាប់ ដែលកូរ៉េខាងជើងបានបាញ់ទៅក្នុងដែនទឹកក្បែរឆ្នេរភាគខាងលិច នៅថ្ងៃទី៥ ខែមករា មិនបានធ្វើឱ្យកូរ៉េខាងត្បូងនៅសុខឡើយ។ កងកម្លាំងម៉ារីនកូរ៉េខាងត្បូងនៅលើកោះ Yeonpyeong ដែលស្ថិតនៅជិតព្រំដែនកូរ៉េខាងជើង បានធ្វើសមយុទ្ធបាញ់គ្រាប់ពិតកាំភ្លើងធំ ដើម្បីបង្ហាញសាច់ដុំដាក់ក្រុងព្យុងយ៉ាងវិញ។ 

 

ក្នុងភាពតានតឹងលើកចុងក្រោយនេះ កូរ៉េខាងត្បូង បានបាញ់កាំភ្លើងធំប្រភេទ K9 នៅលើដែនកោះYeonpyeong ដែលជិតនឹងទីតាំងកូរ៉េខាងជើងបាញ់កាំភ្លើងធំដែរ។ 

 

តាមការបញ្ជាក់របស់អគ្គសេនាធិការចម្រុះកូរ៉េខាងត្បូង ខ្លួនបានចាប់សញ្ញានៃការបាញ់កាំភ្លើងធំរបស់កូរ៉េខាងជើងចេញពីតំបន់ Jangsan Cape និងតំបន់ Deungsan Cape ដែលស្ថិតនៅភាគខាងជើងកោះ Baengnyeong និងកោះ Yeonpyeong របស់កូរ៉េខាងត្បូង។

 

ទាក់ទិនការឡើងកម្តៅនៅឧបទ្វីបកូរ៉េ លោក Wang Wenbin អ្នកនាំពាក្យក្រសួងការបរទេសចិន បានទទូចឱ្យភាគីពាក់ព័ន្ធទាំងអស់អនុវត្តការរឹតត្បិត។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។ 

 

«ក្រោមស្ថានភាពបច្ចុប្បន្ន យើងសង្ឃឹមភាគីពាក់ព័ន្ធទាំងអស់រក្សាភាពស្ងៀមស្ងាត់ រឹតត្បិត និងបញ្ចៀសការចាត់វិធានការ ដែលបង្កើនភាពតានតឹង»។ មន្រ្តីក្រសួងការបរទេសចិន បានសង្កត់ធ្ងន់បែបនេះ នៅក្នុងសន្និសីទសារព័ត៌មាន នៅថ្ងៃទី៥ ខែមករា ដោយលោកបន្តអំពាវនាវឱ្យភាគីពាក់ព័ន្ធទាំងអស់ចូលតុចរចា។ 

 

មិនតែប៉ុណ្ណោះ ក្នុងនាមជាប្រទេសជិតខាង លោកWang បានអះអាងថា ចិនបានយកចិត្តទុកដាក់បំផុត ចំពោះស្ថានការណ៍វិវដ្ដលើឧបទ្វីបកូរ៉េ។ បើតាមមន្រ្តីក្រសួងការបរទេសរូបនេះ រដ្ឋាភិបាលក្រុងប៉េកាំងគាំទ្រការដោះស្រាយតាមរយៈកិច្ចចរចា និងការសន្ទនា។

គួររម្លឹកថា នៅក្នុងឆ្នាំ២០១០ កោះ Yeonpyeong ក៏ត្រូវបានកូរ៉េខាងជើងបាញ់កាំភ្លើងធំដាក់ដែរ។ កាលនោះ កងកម្លាំងម៉ារីនចំនួន ២នាក់ និងប្រជាជនស៊ីវិលចំនួន ២នាក់ បានបាត់បង់ជីវិត។ ចំណែកអ្នករបួសមានចំនួន ១៨នាក់៕