ប្រធានាធិបតីហ្វីលីពីន លោក Ferdinand Marcos Jr. បានបំពេញទស្សនកិច្ចនៅវៀតណាម នៅថ្ងៃទី២៩ និង៣០ ខែមករា តាមសំណើសមភាគីវៀតណាម លោក វូ វ៉ាន់ធឿង។ ក្នុងដំណើរទស្សនកិច្ចទៅវៀតណាមជាលើកដំបូងចាប់តាំងពីកាន់តំណែងនៅឆ្នាំ២០២២ លោក Marcos Jr. បានអរគុណវៀតណាម​ ចំពោះការផ្គត់ផ្គង់អង្ករសម្រាប់ប្រទេសខ្លួន។ 

 

«ប្រធានាធិបតី លោក Marcos Jr. បានអរគុណវៀតណាមក្នុងនាមជាប្រទេសផ្គត់ផ្គង់អង្ករប្រកបដោយស្ថិរភាព និងរយៈពេលវែង ដល់ហ្វីលីពីន»។ សារព័ត៌មានវៀតណាម បានចុះផ្សាយបែបនេះ នៅថ្ងៃទី៣០ ខែមករា។ ប្រមុខរដ្ឋហ្វីលីពីន ក៏បានលើកសរសេរពីអនុស្សរណៈនៃការយោគយល់គ្នា (MoU) លើពាណិជ្ជកម្មអង្កររវាងប្រទេសទាំងពីរផងដែរ។ 

 

ជាដៃគូយុទ្ធសាស្រ្តតែមួយគត់របស់ប្រទេសខ្លួនក្នុងតំបន់អាស៊ាន លោក Marcos Jr. បានបង្ហាញពីក្តីសង្ឃឹមចំពោះកិច្ចសហប្រតិបត្តិការសំខាន់ៗផ្សេងទៀតជាមួយរដ្ឋាភិបាលក្រុងហាណូយ។ ក្រៅពីប្រធានបទអង្ករ មេដឹកនាំប្រទេសទាំងពីរ ក៏បានជជែកពីបញ្ហានេសាទ បម្រែបម្រួលអាកាសធាតុ ថង់ប្លាស្ទិក សមុទ្រចិនខាងត្បូង និងការពង្រឹងមិត្តភាពទ្វេភាគីផងដែរ។ 

 

នៅចំពោះមុនមេដឹកនាំហ្វីលីពីន លោក វូ វ៉ាន់ធឿង បានស្នើឱ្យពង្រីកកិច្ចព្រមព្រៀងលើប្រព័ន្ធទំនាក់ទំនងរវាងក្រសួងកសិកម្មប្រទេសទាំងពីរ ដើម្បីជួយផ្លាស់ប្តូរព័ត៌មានទៅវិញទៅមក ជុំវិញការនេសាទខុសច្បាប់ ការនេសាទមិនមានការរាយការណ៍ និងការគាំទ្រគ្នាទៅវិញទៅមក ដើម្បីជម្រះកាតលឿងរបស់គណៈកម្មការអឺរ៉ុបជុំវិញការនេសាទនេះ។ 

 

មិនតែប៉ុណ្ណោះ មេដឹកនាំវៀតណាម បានអះអាងថា វៀតណាម និងហ្វីលីពីន មានទំនាក់ទំនងជាមួយគ្នា តាមរយៈតម្លៃរួម ចក្ខុវិស័យរួម និងការប្តេជ្ញារួមគ្នាដើម្បីដោស្រាយបញ្ហាប្រឈមរួមគ្នា។ 

 

ចំណែកបញ្ហាសមុទ្រចិនខាងត្បូង ដែលកំពុងតែក្តៅនោះ ភាគីទាំងពីរ បានប្តេជ្ញាថែរក្សាស្ថិរភាព សន្តិភាព សុវត្ថិភាព និងសេរីភាពនៃការហោះហើរ និងនាវាចរណ៍។ បន្ថែមពីនេះ ប្រទេសទាំងពីរ ក៏ជំរុញឱ្យភាគីពាក់ព័ន្ធសមុទ្រចិនខាងត្បូងទាំងអស់ គោរពច្បាប់អន្តរជាតិ ដោះស្រាយជម្លោះតាមមធ្យោបាយសន្តិភាព និងដោយផ្អែកតាមច្បាប់សមុទ្រ។ 

 

សូមបញ្ជាក់ថា ហ្វីលីពីន ជាទីផ្សាអង្ករដ៏ធំមួយរបស់វៀតណាម។ នៅក្នុងឆ្នាំ២០២៣ វៀតណាម នាំចេញអង្ករទៅហ្វីលីពីនសម្រេចបាន១,៧៥ពាន់លានដុល្លារ កើនឡើងជិត១៨ភាគរយ បើធៀបនឹងឆ្នាំ២០២២៕