ជាតិ
កម្រិតបំពុលខ្យល់នៅកម្ពុជា មិនគួរឱ្យបារម្ភឡើយ
×
ដោយ៖ ថោង ប្រណី
សៀមរាប៖ កម្ពុជាពុំមានក្ដីបារម្ភអំពីកម្រិតជាតិពុលក្នុងខ្យល់នោះឡើយ។ ក្រសួងបរិស្ថានប្រកាសយ៉ាងនេះនៅក្នុងសេចក្តីប្រកាសព័ត៌មានមួយចុះផ្សាយនៅថ្ងៃទី៣ខែកុម្ភៈឆ្នាំ២០២៤នេះ។
«នៅកម្ពុជាមានកម្រិតបំពុលខ្យល់ត្រឹម ២០ទៅ៤០ µg/m³ តូចជាងកម្រិតស្តង់ដា ៥០ µg/m³ ដែលកំណត់ដោយអង្គការសុខភាពពិភពលោក (WHO)។ ការណ៍នេះមិនចោទជាបញ្ហាគួរឱ្យព្រួយបារម្ភដូចការផ្សព្វផ្សាយរបស់មតិ និសារព័ត៌មានមួយចំនួននោះទេ។»។ នេះបើតាមខ្លឹមសារសេចក្ដីប្រកាសព័ត៌មាន។
ទន្ទឹមគ្នានេះដែរ តាមរយៈសេចក្ដីប្រកាសព័ត៌មានដដែល ក្រសួងបរិស្ថានក៏បានរម្លឹកឡើងវិញដែរអំពីយុទ្ធនាការផ្ទៃមេឃខៀវ និងការបង្ការ ទប់ស្កាត់ភ្លើងឆេះព្រៃទៀតផង។ សេចក្ដីប្រកាសព័ត៌មានសរសេរយ៉ាងដូច្នេះ៖«បច្ចុប្បន្ន កម្ពុជាមានចំនួនភ្លើងឆេះព្រៃថយចុះ បើប្រៀបធៀបនឹងឆ្នាំ២០១៩ និងឆ្នាំ២០២០ និងកម្រិតការបំពុលខ្យល់ដោយភាគល្អិតនិចល PM2.5 ក៏មានការថយចុះ និងនៅក្រោមកម្រិតស្តង់ដាដែរ។»។
លើសពីនេះទៀត ក្រសួងបរិស្ថានបានជូនដំណឹងបន្ថែមដល់សាធារណជនដែរថា ដើម្បីលើកកម្ពស់ការថែរក្សាបរិស្ថានឲ្យមានភាពស្រស់ស្អាត និងផ្តល់នូវសុខុមាលភាពដល់ប្រជាពលរដ្ឋ រដ្ឋាភិបាលបានដាក់ចេញនូវវិធានការប្រើប្រាស់ប្រេងឥន្ធនៈស្តង់ដា EURO 4 និង EURO 5 ដែលបានកាត់បន្ថយយ៉ាងច្រើននូវការសាយភាយសារធាតុបំពុលខ្យល់ចូលទៅក្នុងបរិយាកាស។
ទោះយ៉ាងណាក៏ដោយ ក្រសួងបរិស្ថាននៅតែអំពាវនាវដល់ដៃគូជាតិ និងអន្តរជាតិឱ្យចូលរួមជាមួយក្រសួងដើម្បីបន្តបេសកកម្មទប់ស្កាត់បញ្ហាបំពុលខ្យល់ ដើម្បីប្រជាជនក្នុងតំបន់ និងក្នុងពិភពលោក៕
© រក្សាសិទ្ធិដោយ thmeythmey.com