កីឡាករ ព្រំ សំណាង បានផ្ដួល Yar Men អ្នកប្រដាល់មីយ៉ាន់ម៉ា ក្នុងទឹកទី២ តាមរយៈការទាត់ ក្នុងសង្វៀន King of The Ring កាលពីថ្ងៃទី៩ ខែកុម្ភៈ នៅស្ថានីយ៍ទូរទស្សន៍ថោន។ ជ័យជម្នះរបស់ ព្រំ សំណាង នេះ បានជំរុញឲ្យ Dave Leduc បង្ហោះសារផ្ដាំថា កុំមោទកភាពខ្លាំងពេក។ Dave Leduc ព្រលយសម្តីថា ប្រសិនមានឱកាសប្រកួតម្ដងទៀត រូបគេនឹងវាយ ព្រំ សំណាង ឲ្យសន្លប់តែម្ដង។
ក្រោយយកឈ្នះ Yar Men លើទម្ងន់ ៨០គីឡូក្រាមនេះ ព្រំ សំណាង ចាប់ផ្ដើមមានប្រជាប្រិយភាឡើងវិញ ដោយទទួលបានពាក្យសរសើរពីអ្នកគាំទ្រជាច្រើន។ ព្រំ សំណាង បានប្រើបច្ចេកទេសទាត់ជើងក្រោមរបស់កីឡាករមីយ៉ាន់ម៉ា ឲ្យបោះបង់ការប្រកួតនៅពាក់កណ្ដាលទឹកទី២។
ជ័យជម្នះរបស់ ព្រំ សំណាង ទំនងជាធ្វើឲ្យ Dave Leduc មិនពេញចិត្តឡើយ។ កីឡាករប្រដាល់មីយ៉ាន់ម៉ារូបនេះ បានបង្ហោះសារមួយ ហាក់ដូចជាមានបំណងចង់ប្រកួតជាមួយ ព្រំ សំណាង ម្ដងទៀត។ តាមរយៈអត្ថន័យសំណេរ ដែលអមជាមួយវីដេអូ បែបឌឺដងនេះ Dave មានជំនឿចិត្តថា ប្រសិនជាមានឱកាសប្រកួតលើកក្រោយមែន រូបគេ នឹងផ្ដួល ព្រំ សំណាង បាន។
«កុំមានមោទនភាពពេកចំពោះអ្នកប្រដាល់មីយ៉ាន់ម៉ា ព្រោះខ្ញុំអាចត្រឡប់មកវិញនៅពេលណាក៏បាន ហើយវាយអ្នកម្តងទៀត។ ខ្ញុំមានកម្លាំងខ្លាំងពិតប្រាកដនៃរាជវង្សស្ដេចភូមាទាំងអស់គឺ រាជវង្សតុងហ្គោ (Toungoo), កូនបោន (Konbaung), បាកាន (Bagan)។ លើកក្រោយខ្ញុំនឹងមិនផ្តល់ឱកាសឱ្យអ្នកឡើយ។»។ Dave Leduc បានបង្ហោះសារផ្ដាំទៅ ព្រំ សំណាង បែបនេះ។
ទន្ទឹមនេះ Dave Leduc មិនបានចាត់ទុកជ័យជម្នះរបស់ ព្រំ សំណាង លើ Yar Men ថា ជារឿងអស្ចារ្យឡើយ។ Leduc និយាយបែបផ្លែផ្កាវិញថា បើសិនរូបគេ ប្រកួតជាមួយ Yar Men វិញ រូបគេ ប្រើតែដៃម្ខាងប៉ុណ្ណោះ ក៏អាចយកឈ្នះបានដែរ។ កីឡាករប្រដាល់Lathwei រូបនេះ ថែមទាំងអះអាងថា ខ្លួនជាស្ដេចប្រដាល់អាស៊ីអាគ្នេយ៍ ទៀតផង។
Dave Leduc បានបង្ហោះសំណេរបែបឌឺដងបែបនេះ៖«យ៉ា ម៉េន ចង់ប្រកួតជាមួយខ្ញុំថ្មីៗនេះ, (សើច ហាហា) ដូចជាកំប្លែងពេកហើយមែនទេ? ខ្ញុំគោរពមហិច្ឆតារបស់គាត់ ប៉ុន្តែខ្ញុំអាចប្រយុទ្ធជាមួយគាត់ដោយប្រើដៃតែម្ខាង។ សូមក្រឡេកមើលការពិត, ខ្ញុំបានត្រួតត្រា ព្រំ សំណាង ទាំងស្រុង ដែលបានផ្តួល ធឿន ធារ៉ា ,ទុន ទុនមីន និង យ៉ា ម៉េន។ ឥឡូវដឹងច្បាស់ហើយថា នរណាជាស្តេចប្រដាល់អាស៊ីអាគ្នេយ៍។»។
គួរបញ្ជាក់ផងដែរថា ព្រំ សំណាង បានបញ្ចប់ការប្រកួតត្រឹមលទ្ធផលស្មោះគ្នា ជាមួយ Dave Leduc កាលពីថ្ងៃទី៥ ខែវិច្ឆិកា ឆ្នាំ២០២៣ ។ ក្រោយចប់ការប្រកួតនេះ ព្រំ សំណាង រងការរិះគន់យ៉ាងខ្លាំង ដោយសារគេមើលឃើញថា សមត្ថភាពនៅមានកម្រិតជាង Dave Leduc។
ដោយឡែក Dave បានលើកខ្លួនឯងថា ជាស្ដេចប្រដាល់នៅអាស៊ីអាគ្នេយ៍ និងជាស្ដេចប្រដាល់គុនខ្មែរ ផងដែរ។ ប៉ុន្តែមិនមានបុគ្គលណា មើលឃើញ និងទទួលស្គាល់ថា Dave Leduc ពិតជាសាកសម ជាចប្រដាល់នៅអាស៊ីអាគ្នេយ៍ និងជាស្ដេចប្រដាល់គុនខ្មែរ ឡើយ៕