បើតាមការចេញផ្សាយរបស់ស្នងការដ្ឋាននគរបាលរាជធានីភ្នំពេញស្លាបមាន់ខូចគុណភាព២តោន ត្រូវបានសមត្ថកិច្ចរកឃើញកាលពីថ្ងៃទី១៤កុម្ភៈ។
 

តាមការស្រាវជ្រាវរបស់មន្ត្រីជំនាញ ស្លាបមាន់ទាំងនោះឈ្មួញបានដឹកតាមរថយន្តពីប្រទេសវៀតណាម ចូលក្នុងរាជធានីភ្នំពេញ។ 

 

បន្ទាប់ពីឃាត់រថយន្តហើយ សមត្ថកិច្ច ពិនិត្យឃើញថាគ្មានឯកសារបញ្ជាក់ច្បាស់លាល់ និងមិនអនុលោមភាពផ្នែកបទដ្ឋានព័ត៌មានលក្ខខណ្ឌនៃការតម្រូវម្ហូបអាហារដែលធ្វើឱ្យប៉ះពាល់ដល់សុខភាពប្រជាពលរដ្ឋ។ ដូច្នេះ សមត្ថកិច្ចជំនាញសម្រេចយកស្លាប់មាន់ ២០០កេស ខាងលើទៅដុតកម្ទេចចោល។

 

ការចុះបង្ក្រាបនេះដែរ ធ្វើឡើងតាមការបញ្ជា របស់ លោក ជួន ណារិន្ទស្នងការនគរបាលរាជធានីភ្នំពេញហើយលោកបានអំពាវនាវដល់សមត្ថកិច្ចពាក់ព័ន្ធឱ្យចូលរួមទប់ស្កាត់រាល់បទល្មើសនាំចូលម្ហូបអាហារដែលបង្កផលប៉ះពាល់ដល់សុខភាពអ្នកប្រើប្រាស់។ ករណីនេះសមត្ថកិច្ចជំនាញនៃស្នងការដ្ឋាននគរបាលរាជធានីភ្នំពេញអះអាងថានឹងបន្តស៊ើបអង្កេត និងបង្ក្រាបរាល់ការនាំចូលផលិតផលគ្មានគុណភាព និងគ្មានសុវត្ថិភាព៕