គ.ជ.ប បានបញ្ជាក់ថា គណបក្សនយោបាយ បេក្ខជន សមាជិក និងអ្នកគាំទ្រគណបក្សនយោបាយ រួមទាំងអ្នកគ្រប់គ្រងបណ្ដាញផ្សព្វផ្សាយព័ត៌មាន ត្រូវចូលរួមគោរពច្បាប់ បទបញ្ជា និងនីតិវិធីសម្រាប់ការបោះឆ្នោតជ្រើសតាំងសមាជិកព្រឹទ្ធសភា រួមទាំងក្រមសីលធម៌សម្រាប់ការបោះឆ្នោត។ 

 

គ.ជ.ប ឱ្យអាជ្ញាធរគ្រប់លំដាប់ថ្នាក់ ដែលទទួលខុសត្រូវការងារសន្តិសុខ សណ្ដាប់ធ្នាប់សាធារណៈ និងវិស័យការងារឯទៀត ត្រូវសហការជាមួយ មន្ត្រី គ.ជ.ប គ្រប់ជាន់ថ្នាក់ ដើម្បីរក្សាសុវត្ថិភាពសន្តិសុខ សណ្ដាប់ធ្នាប់សាធារណៈ និងរបៀបរៀបរយ។ ជាមួយគ្នានេះ អាជ្ញាធរត្រូវចាត់វិធានការឱ្យបានម៉ឺងម៉ាត់ ដើម្បីបង្ការ និងទប់ស្កាត់នូវរាល់សកម្មភាពទាំងឡាយ ដែលមានបំណងបំផ្លាញការបោះឆ្នោត និងបង្កការរំខានដល់ដំណើរការបោះឆ្នោត។ 

 

ទន្ទឹមនឹងនេះ គ.ជ.ប ព្រមានចាត់វិធានការលើសកម្មភាព ដែលរំលោកច្បាប់ស្ដីពីការបោះឆ្នោតជ្រើសតាំងសមាជិកព្រឹទ្ធសភា បទបញ្ជា និងនីតិវិធីរបស់ គ.ជ.ប។ 

 

ថ្ងៃទី២៣ កុម្ភៈនេះ គឺជាថ្ងៃចុងក្រោយនៃការឃោសនាបោះឆ្នោតព្រឹទ្ធសភា ដែលបានធ្វើឡើងចាប់តាំងពីថ្ងៃទី១០​ កុម្ភៈមក។ បោះឆ្នោតព្រឹទ្ធសភា មានបក្សចំនួន៤ ចូលរួមប្រកួតប្រជែង មានបក្សប្រជាជនកម្ពុជា បក្សកម្លាំងជាតិ បក្សឆន្ទៈខ្មែរ និងបក្សហហ្វ៊ុនស៊ិនប៉ិច។ ការិយាល័យបោះឆ្នោតទាំងអស់មាន៣៣ សម្រាប់ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ដែលមានអ្នកបោះឆ្នោតសរុប ១១៧៤៧នាក់។ ការបោះឆ្នោត ការរាប់សន្លឹកឆ្នោត និងការបិទផ្សាយលទ្ធផលបោះឆ្នោតព្រឹទ្ធសភា នឹងធ្វើឡើងនៅថ្ងៃទី២៥កុម្ភៈនេះ៕