តាមសេចក្ដីប្រកាសព័ត៌មានរបស់ អ.វ.ត.ក. គោលបំណងនៃវគ្គបណ្ដុះបណ្ដាលនេះ ដើម្បីគាំទ្រការផ្សះផ្សាជម្លោះ និងកសាងសន្តិភាពរបស់រដ្ឋាភិបាលទីម័រខាងកើត ដោយឆ្លុះបញ្ចាំងពីប្រវត្តិសាស្រ្តកម្ពុជា។ លោក ក្រាញ់ តូនី ប្រធានរដ្ឋបាលស្តីទីនៃ អ.វ.ត.ក. បានបញ្ជាក់ថា វគ្គបណ្ដុះបណ្ដាលនេះ ជាការចែករំលែកបទពិសោធន៍ ដែលកម្ពុជាធ្លាប់ឆ្លងកាត់ពីអតីតកាល ហើយអាចកសាងសង្គមឡើងវិញ និងសន្ដិភាពមកដល់បច្ចុប្បន្ន។ មួយវិញទៀត ជាផ្នែកមួយជួយលើកកម្ពស់គុណភាពនៃការអប់រំ និងផ្ដល់មេរៀនប្រវត្តិសាស្រ្តរវាងប្រទេសទាំងពីរផងដែរ។
  

លោក Hugo Maria Fernandes នាយកប្រតិបត្តិនៃមជ្ឈមណ្ឌលជាតិ Chega (CNC) នៃប្រទេសទីម័រខាងកើត លើកឡើងថា វគ្គបណ្ដុះបណ្ដាលនេះ ជាវប្បធម៌ចែករំលែកចំណេះដឹង និងបទពិសោធន៍ដ៏ល្អរបស់កម្ពុជា ដែលមានប្រវត្តិសាស្រ្តស្រដៀងគ្នានឹងប្រទេសទីម័រខាងកើត។ លោករំពឹងថា វគ្គបណ្ដុះបណ្ដាលនេះ នឹងក្លាយជាផ្នែកមួយ ដែលគេអាចយកទៅកែតម្រូវ និងបន្ថែមលើបទពិសោធន៍ដែលមានស្រាប់ នៅទីម័រខាងកើត។
  

បន្ទាប់ពីចប់វគ្គបណ្ដុះបណ្ដាល គណៈប្រតិភូទីម័តខាងកើតចំនួន២២នាក់ បានទស្សនាបណ្ណាល័យ និងនិហិដ្ឋានបណ្ណាសានៃមជ្ឈមណ្ឌលធនធាន អ.វ.ត.ក. និងបានស្វែងយល់បន្ថែមពីដំណើរការកាត់ក្ដីខ្មែរក្រហម ក៏ដូចជាការងារដែល អ.វ.ត.ក. បន្តធ្វើផងដែរ៕