សាលពិព័រណ៍ថ្មីនេះ បានដាក់សម្ពោធជាផ្លូវការ នៅព្រឹកថ្ងៃទី២៤ កុម្ភៈ បន្ទាប់ពីចំណាយពេលរៀបចំ និងសាងសង់ អស់រយៈពេលបីខែ។ សហនាយកនៃសារមន្ទីរ ព្រះស្រីឦសានវរ័្មន លោក ប្លែស គីលីយ៉ង់ បានលើកឡើងថា សារមន្ទីរ មានបំណងធ្វើបច្ចុប្បន្នភាពជាបន្តបន្ទាប់ ទៅលើប្រវត្តិសាស្រ្តរូបិយវត្ថុខ្មែរ ជាពិសេសផ្ដល់ចំណេះដឹងទូលំទូលាយក្នុងសម័យឯករាជ្យជាតិ។ បន្ថែមពីនេះទៅទៀត លោក ប្លែស មានបំណងពាំយកប្រវត្តិសាស្រ្តក្នុងសម័យដ៏សំខាន់ទាំងនេះ ទៅកាន់ប្រជាពលរដ្ឋ និងអ្នកទស្សនាជាតិ និងអន្តរជាតិ ឱ្យកាន់តែយល់ច្បាស់។

 

«ពួកខ្ញុំបានធ្វើការក្នុងរយៈពេលជាងមួយឆ្នាំនេះ ដើម្បីពង្រីក និងកែលម្អអ្វីដែលយើងមាន ជាពិសេសដោយថែមរូបថត និងភាពយន្តឯកសារជាច្រើន និងរូបិយវត្ថុច្រើនដែរ។ ដូច្នេះ ការរៀបចំថ្មីនេះ ជាការពង្រីក ជាការកែលម្អបន្ថែម»។ នេះជាការបញ្ជាក់របស់លោក សហនាយក មុននឹងបន្ថែមថា សារមន្ទីរចង់ផ្ដល់កន្លែងធំទូលាយជាងមុន សម្រាប់សិស្សនិស្សិតកម្ពុជា និងអ្នកស្រាវជ្រាវសិក្សាស្វែងយល់ពីការរីកចម្រើន និងការធ្លាក់ចុះនៃសម័យឯករាជ្យ។

 

សាលពិព័រណ៍ថ្មីនេះមានរូបភាពចំនួន៥៧សន្លឹក និងរូបិយវត្ថុចំនួន៩៨ រួមមានក្រដាសប្រាក់៨៧សន្លឹក និងកាក់ចំនួន១១ រួមទាំងភាពយន្តឯកសារចំនួន៥ និងរូបសញ្ញានៃធនាគារជាតិ ក្នុងសម័យសង្គមរាស្រ្តនិយមផងដែរ។ ចំណែក​ ឯកសារវិញ​ត្រូវបានផ្ដល់ដោយវិទ្យាស្ថានមួយចំនួនដូចជា វិទ្យាស្ថានសោតទស្សន៍ជាតិបារាំង,  French Defense Communication and Audiovisual Production Establishment និង British Pathe ជាដើម។

 

វិទ្យាស្ថានស្លឹករឹត បានផ្ដល់ឯកសារ និងរូបភាពដ៏កម្រ ក្នុងសម័យខ្មែរក្រហម។ លោក Julio Jeldres  អតីតលេខាផ្ទាល់ និងជាអ្នកសរសេរប្រវត្តិរបស់សម្តេចព្រះបាទនរោត្តមសីហនុ បានផ្ដល់ជារូបភាពមួយចំនួនផងដែរ។ សម្ដេចនរោត្តម មុនិនាថ សីហនុ ព្រះរាជប្រទានស្នាដៃភាពយន្តឯកសារជាច្រើន ដែលជាសក្ខីមួយនៃភាពរុងរឿងលើវិស័យភាពយន្ត ក្នុងសម័យឯករាជ្យ។

 

លោក ប្លែស គីលីយ៉ង់ សង្ឃឹមយ៉ាងមុតមាំថា សាលពិព័រណ៍ថ្មីនេះ នឹងដើរតួជាឃ្លាំងចំណេះដឹងដ៏សំខាន់ពីការវិវដ្តនៃសង្គម សេដ្ឋកិច្ច និងរូបិយវត្ថុកម្ពុជា ដែលជាផ្នែកសំខាន់សម្រាប់ការអភិវឌ្ឍជាតិ និងជាមេរៀនសម្រាប់ការវិវដ្ដ នៅថ្ងៃអនាគត។

 

លោក ជា ចាន់តូ ទេសាភិបាលកិត្តិយសធនាគារជាតិនៃកម្ពុជា​ បានបង្ហាញពីសារៈសំខាន់នៃការស្វែងយល់ពីភាពរុងរឿង និងធ្លាក់ចុះនៃសម័យកាលនីមួយៗ។ លោក បញ្ជាក់ថា សាលពិព័រណ៍ថ្មីនេះ ជាគោលដៅស្នូលមួយ សម្រាប់លើកកម្ពស់ការយល់ដឹងដំណាក់កាលនីមួយៗ ក៏ដូចជាជំរុញឱ្យអ្នកជំនាន់ក្រោយខិត ខំសិក្សាពីប្រវត្តិសាស្រ្តប្រទេសរបស់ខ្លួន និងចៀសវាងការបែកបាក់សាមគ្គី ដែលនាំឱ្យបាត់បង់សន្តិភាព។

 

កម្មវិធីសម្ពោធត្រូវបានធ្វើឡើងក្រោមធិបតីភាព សម្ដេចក្រុមព្រះ នរោត្តម ច័ក្រពង្ស់ ឧត្តមទីប្រឹក្សាផ្ទាល់ព្រះមហាក្សត្រ និងលោក ជា ចាន់តូ ទេសាភិបាលកិត្តិយសរបស់ធនាគារជាតិនៃកម្ពុជា នៅធនាគារជាតិនៃកម្ពុជា។

 

គួរបញ្ជាក់ថា គម្រោងពង្រីកសាលថ្មីនេះ ត្រូវបានសម្រេចនៅដើមឆ្នាំ ២០២៣ មុននឹងចាប់ផ្ដើមការសាងសង់ និងដំឡើង នៅខែវិច្ឆិកា។ ចំពោះការប្រមូលឯកសារ និងការសិក្សាស្រាវជ្រាវចំណាយពេលអស់ជាច្រើនខែ៕​