នៅពេលថ្មីៗនេះ លោក ស៊ែហ្គេយ៍ ឡាវរ៉ូវ រដ្ឋមន្រ្តីការបរទេសរុស្ស៊ី បានលើកឡើងថា ម៉ុលដាវី កំពុងតែយកគំរូតាមអ៊ុយក្រែន បន្ទាប់ពីតំបន់ Transdniestria ស្វែងរកការគាំទ្រពីរុស្ស៊ី ដើម្បីជួយសេដ្ឋកិច្ចរបស់ខ្លួនដែលរងសម្ពាធពី ម៉ុលដាវី។ យ៉ាងណាមិញរដ្ឋាភិបាល ម៉ុលដាវី បានច្រានចោលការចោទប្រកាន់បែបនោះ។ 

 

«លោករដ្ឋមន្រ្តី ឡាវរ៉ូវ និងរបបក្រេមឡាំង គ្មានសិទ្ធិសីលធម៌ណាមួយ ក្នុងការបង្រៀនប្រជាធិបតេយ្យ និងសេរីភាពឡើយ»។ ក្រសួងការបរទេសម៉ុលដាវី បានប្រើពាក្យធ្ងន់ៗបែបនេះ នៅក្នុងសេចក្តីថ្លែងការណ៍មួយចេញផ្សាយនៅថ្ងៃទី២ ខែមីនា ដោយបន្តចាត់ទុករុស្ស៊ីជាប្រទេសដាក់ពន្ធនាគារអ្នកប្រឆាំង និងសម្លាប់ពួកគេ។

 

បន្ថែមពីនេះ ក្រសួងការបរទេសម៉ុលដាវី បានឌឺដងដាក់រុស្ស៊ីថា ប្រទេសដែលប្រលាក់ដោយឈាម និងបង្កតែការឈឺចាប់ គ្មានអ្វីត្រូវផ្តល់ឱ្យប្រទេសដទៃឡើយ។ ការលើកឡើងរបស់ម៉ុលដាវីបែបនេះ គឺសំដៅដល់ការឈ្លានពានរបស់រុស្ស៊ីលើអ៊ុយក្រែន និងករណីស្លាប់របស់លោក Alexei Navalny អ្នកប្រឆាំងដ៏សំខាន់ចំពោះវិមានក្រេមឡាំងនៅក្នុងពន្ធនាគារ។ 

 

ក្នុងសេចក្តីថ្លែងការណ៍ដដែលក្រសួងការបរទេស ម៉ុលដាវីកំពុងកសាងអនាគតនៅអឺរ៉ុបមួយ ដើម្បីឱ្យប្រជាជនទទួលបានផលប្រយោជន៍សេដ្ឋកិច្ច វិបុលភាព និងសន្តិភាព៕