ពីវេទិកាកិច្ចសហប្រតិបត្តិការដែនសមុទ្រនៅថ្ងៃទី៤ ខែមីនា លោកស្រី Penny Wong រដ្ឋមន្រ្តីការបរទេសអូស្រ្តាលី បានឡើងថា តំបន់ឥណ្ឌូ-ប៉ាស៊ីហ្វិក ត្រូវការយន្តការច្បាប់ និងការទូតបែបថ្មី ដើម្បីកាត់បន្ថយភាពតានតឹង និងហានិភ័យនៃជម្លោះ ស្របពេលបញ្ហាចម្រូងចម្រាសលើច្រកសមុទ្រតៃវ៉ាន់ និងសមុទ្រចិនខាងត្បូងបន្តកើនឡើង។ 

 

«យើងកំពុងប្រឈមនឹងស្ថិរភាព សកម្មភាពអុងអាត់ និងបង្ករឿង រួមទាំងការប្រតិបត្តិលើដែនទឹក និងអាកាសមិនប្រកបដោយសុវត្ថិភាព»។ លោកស្រី Wong បានយល់ឃើញបែបនេះ ដោយមិនសំដៅដល់ប្រទេសណាមួយ។ យ៉ាងណាមិញ ប្រមុខការទូតរូបនេះ ទំនងសំដៅដល់រដ្ឋាភិបាលក្រុងប៉េកាំង ដែលតែងមានទំនាស់ជាមួយបណ្តាប្រទេសអាស៊ីអាគ្នេយ៍ពាក់ព័ន្ធនឹងសមុទ្រចិនខាងត្បូង។ 

 

ត្រង់ចំណុចនេះ រដ្ឋមន្រ្តីការបរទេសអូស្រ្តាលី បានព្រមានថា សកម្មភាពអុងអាត់ និងការបង្ករឿង មិនថាកើតនៅសមុទ្រចិនខាងត្បូង ច្រកសមុទ្រតៃវ៉ាន់ និងអនុតំបន់ទន្លេមេគង្គ នឹងជះឥទ្ធិពលទាំងអស់ដល់ប្រទេសក្នុងតំបន់។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។​

 

នៅចំពោះមុខរដ្ឋមន្រ្តីការបរទេសហ្វីលីពីន លោកស្រី Wong បានប្រកាសផ្តល់ជំនួយ ១៨៦,៧លានដុល្លារ ក្នុងការគាំទ្រដល់គម្រោងនៅក្នុងបណ្តាប្រទេសអាស៊ីអាគ្នេយ៍ ដោយក្នុងនោះមានសន្តិសុខដែនសមុទ្រផង។ ជំនួយបែបនេះ ធ្វើឡើងស្របពេលចិន នៅតែបន្តទាមទារយ៉ាងខ្លាំងលើដែនទឹកក្នុងសមុទ្រចិនខាងត្បូង ជាមួយបណ្តាប្រទេសអាស៊ាន ជាពិសេសហ្វីលីពីន។ 

 

ចាប់ពីថ្ងៃទី៤ ដល់ថ្ងៃទី៦ ខែមីនា អូស្រ្តាលីរៀបចំកិច្ចប្រជុំកំពូលពិសេសជាមួយអាស៊ាន ដើម្បីអបអរភាពជាដៃគូរយៈពេល ៥០ឆ្នាំ។ ជាដៃគូយុទ្ធសាស្រ្តគ្រប់ជ្រុងជ្រុយរបស់អាស៊ាន អូស្រ្តាលីកំពុងពង្រឹងទំនាក់ទំនងជាមួយប្រទេសក្នុងតំបន់យ៉ាងខ្លាំង ដើម្បីទប់នឹងឥទ្ធិពលចិន៕