ក្នុងសុន្ទរកថាទៅកាន់សភានៅថ្ងៃទី៧ ខែមីនា ប្រធានាធិបតីអាម៉េរិក លោក ចូ បៃឌិន បានលើកឡើងពីប្រធានបទពាក់ព័ន្ធចិនមួយចំនួន ទាំងយោធា អាវុធ សេដ្ឋកិច្ច និងការប្រកួតប្រជែងជាដើម។ លើសពីនេះ មេដឹកនាំអាម៉េរិក បានប្រកាសថា អាម៉េរិកនឹងមិនអនុញ្ញាតឱ្យបច្ចេកវិទ្យាដ៏ទំនើបរបស់ខ្លួន អាចប្រើប្រាស់បាននៅក្នុងអាវុធចិនឡើយ។ 

 

«ខ្ញុំបានធានាហើយថា បច្ចេកវិទ្យាដ៏ទំនើបបំផុតរបស់អាម៉េរិក មិនអាចត្រូវបានប្រើប្រាស់នៅក្នុងអាវុធចិនទេ»។ លោកបៃឌិន បានថ្លែងបែបនេះ នៅក្នុងសភា ដោយមិនបានពន្យល់អ្វីបន្ថែមឡើយ។ ទន្ទឹមនេះ លោកប្រធានាធិបតី បានបន្តថា រដ្ឋាភិបាលក្រុងវ៉ាស៊ីនតោន ចង់បានការប្រកួតប្រជែងជាមួយក្រុងប៉េកាំង ជាជាងការស្វែងរកជម្លោះជាមួយគ្នា។ 

 

មិនតែប៉ុណ្ណោះ លោកបៃឌិន បានលើកឡើងពីវិស័យសេដ្ឋកិច្ចរបស់អាម៉េរិក ពាក់ព័ន្ធនឹងចិនដែរ។ បើតាមមេដឹកនាំចាស់វស្សារូបនេះ ក្រុងវ៉ាស៊ីនតោន នឹងប្រឆាំងជាមួយក្រុងប៉េកាំង ប្រសិនបើមានការប្រកួតប្រជែងផ្នែកសេដ្ឋកិច្ចដែលមិនត្រឹមត្រូវ។ 

 

ដោយមនុស្សមួយចំនួនយល់ថាចិន កំពុងតែរះឡើង ហើយអាម៉េរិកកំពុងដាំក្បាលចុះ មេដឹកនាំអាម៉េរិក បានថ្លែងការពារថា អាម៉េរិក កំពុងតែមានឥទ្ធិពលឡើង ខណៈសេដ្ឋកិច្ចអាម៉េរិក មានភាពល្អបំផុតលើពិភពលោក។ ចំណែកផលិតផលក្នុងស្រុកសរុបអាម៉េរិកកំពុងកើនឡើង ហើយអតុល្យភាពផ្នែកសេដ្ឋកិច្ចជាមួយចិន កាន់តែរួមតូចបំផុត ក្នុងរយៈពេល ១ទសវត្សរ៍កន្លងមកនេះ។ 

 

ការលើកឡើងរបស់មេដឹកនាំអាម៉េរិកខាងលើ ធ្វើឡើងស្របពេលមហាអំណាចសេដ្ឋកិច្ចទាំងពីរ កំពុងតែប្រជែងឥទ្ធិពលគ្នានៅជុំវិញពិភពលោក ហើយថែមទាំងមានទំនាស់ទាំងផ្នែកពាណិជ្ជកម្ម បច្ចេកវិទ្យា និងយោធាជាដើម៕