លោក ណន តូនី ប្រធានក្រុមសណ្ដាប់ធ្នាប់ ដែលគ្រប់គ្រងក្នុងរមណីដ្ឋានអង្គរនៃអាជ្ញាធរជាតិអប្សរា បានឱ្យដឹងថា ក្រុមការងារសណ្តាប់ធ្នាប់ បានរៀបចំដាក់កម្លាំងទៅតាមគោលដៅសំខាន់ៗនៅចំណតធំ ខាងមុខប្រាសាទអង្គរវត្ត។ លោកពន្យល់ថា ការដាក់កម្លាំងនេះ ដើម្បីជួយសម្រួលដល់ប្រជាពលរដ្ឋ ដែលជិះយានជំនិះមកទស្សនាប្រាសាទនានាកុំឱ្យកកស្ទះ នាថ្ងៃចូលឆ្នាំប្រពៃណីខ្មែរ។

 

លោក តូនី បន្តថា នៅប្រាសាទអង្គរវត្តចំណតធំមានតែមួយប៉ុណ្ណោះ គឺនៅចំពីមុខបរិវេណប្រាសាទតែម្ដង។ ប៉ុន្តែ បើក្នុងករណីចំណតទីនេះពេញ ពលរដ្ឋក៏អាចយកយានជំនិះ ទៅចតនៅចំណតភ្នំបាខែងបានដែរ ។ 

ក្នុងនាមជាប្រធានក្រុមសណ្ដាប់ធ្នាប់លោក តូនី ទទូចស្នើសុំឱ្យប្រជាពលរដ្ឋ ដែលអញ្ជើញមកទស្សនាប្រាសាទអង្គរវត្ត ឬក៏ប្រាសាទផ្សេងៗទៀត នៅក្នុងទឹកដីសៀមរាប សូមចតយានយន្តនៅក្នុងចំណតដែលបានកំណត់។ ពាក់ព័ន្ធនឹងពលរដ្ឋដែលរកស៊ីដឹកភ្ញៀវទេសចរវិញ សូមទម្លាក់ភ្ញៀវរួចហើយ ជួយយកយានជំនិះទាំងឡាយមកចតនៅក្នុងចំណតឱ្យបានត្រឹមត្រូវ ចៀសវាងចតតាមចិញ្ចើមផ្លូវ បង្កឱ្យស្ទះនិងអាចបណ្តាលឱ្យមានគ្រោះថ្នាក់ចរាចរណ៍ជាយថាហេតុ។ 

 

លោក តូនី បញ្ជាក់បន្ថែមថា ចំណតនៅខាងមុខបរិវេណប្រាសាទអង្គរវត្តនេះ ជាចំណត់សាធារណៈ ពុំមានយកសេវានោះទេ។ រីឯទីតាំងដែលនៅខាងក្រៅចំណតសាធារណៈនេះ ជាចំណតដែលពលរដ្ឋ រៀបចំតាមមុខផ្ទះឬវាលស្រែ ដើម្បីឱ្យឡានឬម៉ូតូចូលចត ហើយយកសេវាដោយខ្លួនឯង ។ ការណ៍នេះ មិនពាក់ព័ន្ធជាមួយនឹងអាជ្ញាធរជាតិអប្សរានោះទេ៕