កិច្ចសន្យារវាងVCGP និង PPWSA  នៃគម្រោង «បាក់ខែងដំណាក់កាលទី៣» ត្រូវបានធ្វើឡើងនាថ្ងៃទី១០មេសា ឆ្នាំ២០២៤ ក្នុងគោលដៅពង្រីកសមត្ថភាពផ្គត់ផ្គង់ទឹកស្អាតឱ្យបានដល់៦០ម៉ឺនគូបក្នុងមួយថ្ងៃ។ បើតាមសេចក្តីប្រកាសព័ត៌មានស្ថានទូតបារាំងប្រចាំកម្ពុជា​ កិច្ចព្រមព្រៀងនៃការសន្យាផ្តល់កម្ចី១០៣,៣ ដល់​រដ្ឋាករទឹកស្វយ័តក្រុងភ្នំពេញនេះ គឺជាផ្នែកមួយនៃគម្រោងដែលទទួលបានហិរញ្ញប្បទាន ពីទីភ្នាក់ងារបារាំងសម្រាប់អភិវឌ្ឍន៍ (AFD)។

 

« ការសាងសង់គ្រោងនឹងបញ្ចប់នៅឆ្នាំ២០២៧ ដោយនឹងចូលរួមលើកកម្ពស់លទ្ធភាពទទួលបានទឹកប្រកបដោយគុណភាពពិសេស សម្រាប់ប្រជាពលរដ្ឋទាំងអស់ដែលរស់នៅក្នុងរាជធានីភ្នំពេញ »។ ស្ថានទូតបារាំងបានរៀបរាប់បែបនេះ ដោយបានបញ្ជាក់ថា បន្ទាប់ពីសាងសង់រួច ស្ថានីយ៍ប្រព្រឹត្តកម្មទឹកស្អាត នឹងក្លាយជាស្ថានីយ៍ធំជាងគេបំផុតនៅអាស៊ីអាគ្នេយ៍ ដែលអាចផ្គតផ្គង់ទឹកស្អាតដល់បពលរដ្ឋចំនួន ១៤៧ពាន់គ្រួសារ​បន្ថែមទៀត។​

 

តាមរយៈគម្រោងនេះ បានបង្ហាញពីទំនុកចិត្តរបស់កម្ពុជាលើជំនាញរបស់ក្រុមហ៊ុនសំណង់បារាំង សម្រាប់ការវិនិយោគរបស់ខ្លួនប្រកបដោយយុទ្ធសាស្រ្ត ដែលមានតម្លៃបន្ថែមខ្ពស់។ ស្ថានទូតបារាំងបានបញ្ជាក់ថា៖ «  ជាគម្រោងដែលឆ្លុះបញ្ចាំងឱ្យឃើញនូវយុទ្ធសាស្រ្ត « Global Gateway » ហើយក៏បង្ហាញឱ្យឃើញផងដែរនូវការប្តេជ្ញាចិត្តរបស់ក្រុមអឺរ៉ុបនៅកម្ពុជា»។

 

គួរជម្រាបថា បច្ចុប្បន្ន​រោងចក្រប្រព្រឹត្តិកម្មទឹកបាក់ខែង ដំណាក់កាលទី១ និងទី២ គឺមានសមត្ថភាពផលិតទឹកស្អាតបាន៣៩ម៉ឺនម៉ែត្រគូបក្នុងមួយថ្ងៃ ហើយផ្គត់ផ្គង់បាន១៩ម៉ឺន​ម៉ែត្រគូ។ ការចាប់ផ្តើមដំណាក់កាលទី៣ បង្ហាញពីវឌ្ឍនភាពដ៏សំខាន់នៅក្នុងហេដ្ឋារចនាសម្ព័ន្ធ ទឹកប្រកបដោយនិរន្តរភាព ក្នុងការដោះស្រាយតម្រូវការទឹកស្អាតដែលកំពុងកើនឡើងនៅក្នុងរាជធានី និងតំបន់ជុំវិញ៕