កីឡាអន្តរជាតិ
អន្តរជាតិ
Man of the Match នៅវគ្គ១៦ក្រុមចុងក្រោយភាគច្រើនគឺជាអ្នកចាំទី
× ក្នុងជំនួបទាំង៨ប្រកួតនៅវគ្គ១៦ក្រុមចុងក្រោយនៃព្រឹត្តិការណ៍ World Cup ឆ្នាំ២០១៤ អ្នកចាំទី៥រូបបានទទួលពានជាកីឡាករឆ្នើមប្រចាំការប្រកួត (Man of the Match) ដែលឧបត្ថម្ភដោយក្រុមហ៊ុន Budweiser។ ពាននេះ ទទួលបានតាមរយៈការបោះឆ្នោតអនឡាញនៅលើគេហទំព័រផ្លូវការ Twitter និងកម្មវិធី Mobile Phone Application របស់សហព័ន្ធកីឡាបាល់ទាត់អន្តរជាតិ (FIFA)។
ក្នុងចំណោមអ្នកចាំទីទាំង៥រូបនោះ មានកីឡាករ២រូប គឺ Julio Cesar (ប្រេស៊ីល) និង Keylor Navas (កូស្តារីកា) បានជួយក្រុមឲ្យឈានទៅកាន់វគ្គបន្ត ខណៈអ្នកចាំទី៣រូបទៀត គឺ Guillermo Ochoa (ម៉ិកស៊ិក) Rais M’Bolhi (អាល់ហ្សេរី) និង Tim Howard (អាមេរិក) បានបញ្ចេញសមត្ថភាពយ៉ាងអស់អស្ចារ្យក្នុងការប្រកួតទាំងមូល ប៉ុន្តែក្រុមរបស់ពួកគេមិនអាចឈានទៅវគ្គបន្តបានឡើយ។
បើគិតទាំងការប្រកួតជម្រុះតាមពូល អ្នកចាំទី៣រូប បានឈ្នះពាន Man of the Match ចំនួន២ដង ដែលក្នុងនោះមាន Tim Howard, Keylor Navas និង Guillermo Ochoa។ បើសរុបជារួម ខ្សែប្រយុទ្ធអាហ្សង់ទីន Lionel Messi ទទួលបានពានទាំង៤លើកក្នុងចំណោមការប្រកួតកន្លងមក ខណៈ James Rodriguez របស់កូឡុំប៊ី បានចំនួន៣លើក។ កីឡាករចំនួន៩នាក់បានពាន Man of the Match ចំនួន២លើក៕
រូបថត៖ fifa.com
© រក្សាសិទ្ធិដោយ thmeythmey.com