កីឡាជាតិ
ជាតិ
ខ្សែប្រយុទ្ធហូឡង់ Elroy van der Hooft ត្រឡប់មកជួយចម្ការកៅស៊ូបឹងវិញ
× ក្រោយពេលចាកចេញពីប្រទេសកម្ពុជាទៅលេងស្រុកកំណើតមួយរយៈកាលពីមុនចូលឆ្នាំប្រពៃណីខ្មែរកន្លងទៅ ឥឡូវនេះកីឡាករជនជាតិហូឡង់ Elroy van der Hooft បានត្រឡប់មកជួយក្រុមចាស់របស់ខ្លួនចម្ការកៅស៊ូបឹងកេត វិញហើយ ក្នុងយុទ្ធនាការពានរង្វាន់មិត្តហ្វូនខេមបូឌានលីក ២០១៤ ។
នៅលើទំព័រហ្វេសប៊ុកផ្លូវការរបស់ក្លិបចម្ការកៅស៊ូបឹងកេត បានជូនដំណឹងដល់អ្នកគាំទ្រខ្លួននៅល្ងាចថ្ងៃទី ៣ កក្កដាថា៖ «ខ្សែប្រយុទ្ធ Elroy Van Der Hooft បានវិលមកជួយក្លិបវិញ បន្ទាប់ពីខ្សែប្រយុទ្ធរូបនេះបាត់មុខមួយរយះនៅសមរភូមិវាលស្មៅ ស្របពេលដែលបឹងកេតនៅមានសង្ឃឹមច្រើនជាងក្លិបផ្សេងៗ ទៀតក្នុងការដណ្តើមយកពានរង្វាន់មិត្តហ្វូនខេមបូឌានលីក២០១៤» ។
ពេលដំណាលៗគ្នា កីឡាករ Elroy ក៏បានបង្ហោះនៅលើគណនីហ្វេសប៊ុកខ្លួនដែលថា៖ «ផ្ទុយពីអ្វីដែលខ្ញុំបានសរសេរពីមុន ខ្ញុំនឹងបញ្ចប់រដូវកាលនេះជាមួយបឹងកេត ជំនួសឲ្យការផ្លាស់ទៅលេងនៅក្នុងប្រទេសថៃ។ បន្ទាប់ពីពិភាក្សាជាមួយលោក បែ មករា ហើយអ្នកចាត់ការទូទៅរូបនេះ បានបញ្ចុះបញ្ចូលខ្ញុំឲ្យចូលរួមជួយក្រុមឲ្យទទួលបានដំណែងជើងឯក។ ខ្ញុំប្រហែលជាមានវត្តមាននៅលើទីលាននៅថ្ងៃអាទិត្យនេះ ប្រសិនបើគ្រូបង្វឹកជ្រើសរើសខ្ញុំ»។
អតីតយុវជនថ្នាលរបស់ក្លិបល្បី Ajax នៅប្រទេសហូឡង់ បានបញ្ជាក់យ៉ាងច្បាស់ថា រូបគេអាចនឹងបង្ហាញខ្លួនពេល បឹងកេត ប៉ះក្រសួងការពារជាតិ បាននៅចុងសប្ដាហ៍នេះ ប្រសិនបើលោកគ្រូបង្វឹក ប្រាក់ វុទ្ធី ជ្រើសខ្លួនជាជម្រើស ១១ នាក់ដំបូង។
លោក បែ មករា ធ្លាប់ប្រាប់សារព័ត៌មានក្នុងស្រុកថា ក្លិបបានចុះកិច្ចសន្យាជាមួយ Elroy កាលពីខែមករាដើមឆ្នាំ ២០១៤ ចំនួនមួយរដូវកាល ហើយពេលនេះកិច្ចសន្យានៅមិនទាន់ផុតកំណត់នៅឡើយនោះទេ។
មុនមករួមរស់ជាមួយក្លិបជើងឯកលីកកំពូលឆ្នាំ២០១២ ចម្ការកៅស៊ូបឹងកេត កីឡាករអឺរ៉ុបម្នាក់នេះ ធ្លាប់ហាត់នៅថ្នាលក្លិប លីកកំពូលហុល្លង់ Ajax ចំនួន ៦ ឆ្នាំ មុនទៅលេងនៅក្លិប ADO Den Haag, RKC Waalwijk និង VV UDO។ ក្រោយមកទៀតគេបានប្តូរទៅលេង នៅក្លិប FC Chania ប្រទេសក្រិក មុនចុះកុងត្រានៅក្លិប Persekap Pasuruan ឥណ្ឌូណេស៊ី តែត្រូវលុបចោលទៅវិញ និងចុងក្រោយបង្ហាញខ្លួនឲ្យភ្នំពេញក្រោន នៅពាក់កណ្ដាលរដូវកាល ២០១៣ ៕
© រក្សាសិទ្ធិដោយ thmeythmey.com