ខ្មែរក្រហម
ជាតិ
រដ្ឋាភិបាលស៊ុយអែតប្រកាសផ្តល់ថវិកាចំនួន ៤,៥ លានដុល្លារដល់សាលាក្តីខ្មែរក្រហម ភាគីសាលាក្តី និងក្រុមម្ចាស់ជំនួយ
× ភ្នំពេញ៖ រដ្ឋាភិបាលស៊ុយអែតបានប្រកាសផ្តល់វិភាគទានចំនួន ៤,៥ លានដុល្លារអាមេរិក ដល់ភាគីអន្តរជាតិនៃអង្គជំនុំជម្រះវិសាមញ្ញក្នុងតុលាការកម្ពុជា ( អ.វ.ត.ក )។ បើតាមការចេញផ្សាយរបស់ អ.វ.ត.ក ថវិកាដែលនឹងទទួលបាននេះ គឺទុកសម្រាប់ដំណើរការអង្គជំនុំជម្រះ ក្នុងឆ្នាំ ២០១៤ និង ២០១៥ ។
យោងតាមសេចក្តីប្រកាសព័ត៌មានរបស់សាលាក្តីខ្មែរក្រហម ប្រទេសស៊ុយអែតគឺជាម្ចាស់ជំនួយដ៏សំខាន់មួយរបស់ អ.វ.ត.ក ហើយក៏ជាសមាជិកមួយក្នុងចំណោមក្រុមប្រទេសផ្តល់ជំនួយសំខាន់ៗ ដល់ អ.វ.ត.ក ដែរ។
លោក ក្រាញ់ តូនី ប្រធានការិយាល័យរដ្ឋបាលស្តីទី អ.វ.ត.ក បាននិយាយថា អ.វ.ត.ក សូមថ្លែងអំណរគុណចំពោះការប្តេជ្ញាចិត្តដ៏ ខ្ពស់របស់ប្រទេសស៊ុយអែតចំពោះការអនុវត្តច្បាប់អន្តរជាតិ និងការស្វែងរកយុត្តិធម៌ជូនប្រជាជនកម្ពុជា តាមរយៈការបន្តផ្តល់ការគាំទ្រចំពោះតុលាករមួយនេះ។
លោកបានអះអាងថា៖«ខ្ញុំសូមសម្តែងការដឹងគុណដល់ការគាំទ្ររបស់រដ្ឋាភិបាលស៊ុយអែត ចំពោះការផ្តល់វិភាគទានថ្មីចំនួន ៤,៥ លាន ដុល្លារសហរដ្ឋអាមេរិក ដល់នៅក្នុងពេលដ៏សំខាន់មួយសម្រាប់ អ.វ.ត.ក»។
នាពេលកន្លងមក ប្រទេសស៊ុយអែតបានផ្តល់ជំនួយហិរញ្ញវត្ថុដល់ អ.វ.ត.ក ចំនួនសរុបជាង ១០ លានដុល្លារអាមេរិក។
នេះជាការទទួលបានជំនួយជាបន្តបន្ទាប់របស់សាលាក្តីខ្មែរក្រហម បន្ទាប់ពីការផ្តល់របស់រដ្ឋាភិបាលអូស្ត្រាលីដល់ភាគីអន្តរជាតិក្នុងទឹកប្រាក់ប្រមាណ៣លានដុល្លារ និងការផ្តល់របស់រដ្ឋាភិបាលម៉ាឡេស៊ីក្នុងទឹកប្រាក់ ៥០ ០០០ដុល្លារដល់ភាគីជាតិ៕
© រក្សាសិទ្ធិដោយ thmeythmey.com