កីឡាជាតិ
ជាតិ
កម្ពុជា ប៉ះ ឥណ្ឌូណេស៊ី ម៉ោង ៣ រសៀលនេះក្នុងពានស្ដេចប្រ៊ុយណេ កម្ពុជាធ្វើការហ្វឹកហាត់ត្រៀមប្រកួតជាមួយឥណ្ឌូនេស៊ីរសៀលនេះ។ រូបថត ឆាំង ពិសិដ្ឋ
× ក្រុមបាល់ទាត់យុវជនក្រោមអាយុ២១ ឆ្នាំរបស់កម្ពុជា ត្រូវប្រកួតលើកទី៣ ក្នុងវគ្គជម្រុះពូល B នៃពានរង្វាន់ Hassanal Bolkiah Trophy 2014 ជាមួយក្រុមឥណ្ឌូណេស៊ី វេលាម៉ោង ៣ រសៀល ម៉ោងនៅកម្ពុជា លើទីលានកីឡដ្ឋាន Hassanal Bolkiah National Stadium ក្នុងរាជធានីបានដារសិរីបេហ្គាវ៉ាន់។
សម្រាប់កម្ពុជា ៣ ប្រកួតកន្លងមកឈ្នះ ប្រ៊ុយណេ ១ ទល់ ០ និង ឈ្នះ សិង្ហបុរី ៣ ទល់ ១ តែបរាជ័យដោយសារ ម៉ាឡេស៊ី ១ ទល់ ០ វិញ ដោយមាន ៦ ពិន្ទុក្នុងដៃ។ កីឡាករសំខាន់ ២ នាក់គឺ ខ្សែការពារស្ដាំ ថោង ដា និង ខ្សែបម្រើការពារ ងយ ស្រ៊ីន ជាសមាជិករបស់ក្លិបភ្នំពេញក្រោន នឹងត្រូវអវត្តមានក្នុងការប្រកួតនេះព្រោះពូកគេជាប់ពិន័យកាតលឿង២ ដង។
លោក Lee Tae Hoon គ្រូបង្វឹកក្រុមកម្ពុជា ទំនងជាត្រូវសម្លឹងមើលកីឡាករក្នុងបញ្ជីបម្រុងដូចជា សំអឿន ពិដោយ, ឈិន ឈឿន, នួន បូរី, ស៊ុះ ស៊ូហាណា ឬ អុល រ៉ាវី ដើម្បីដាក់ក្នុងជម្រើសដំបូងពង្រឹងក្រុមក្នុងការប្រកួតមួយនេះ។
ចំណែកក្រុមឥណ្ឌូណេស៊ី វិញហាក់ដូចជាធ្លាក់រាសីក្នុងការប្រកួតពានរង្វាន់ HBT 2014 នេះព្រោះ ៣ ប្រកួតស្មើជាមួយម៉ាឡេស៊ី ០ ទល់ ០ នៅថ្ងៃបើកឆាក ហើយចាញ់ប្រ៊ុយណេ ៣ ទល់ ១ និង ចាញ់វៀតណាម ៣ ទល់ ១ ទៀត ទើបតែមាន ១ ពិន្ទុក្នុងដៃប៉ុណ្ណោះ។ កីឡាករសំខាន់ៗដូចជា Ilham Udin Armaiyn, Septian David Maulana និង Yuz Henzry Mohd Jamil គឺជាអ្នកធ្លាប់រកគ្រាប់បាល់នាំសំណាងឱ្យក្រុម។
លទ្ធផលនៃការប្រកួតម្សិលមិញមាន៖
ពូល A ៖ ថៃ ៣ – ១ ឡាវ និង ហ្វីលីពីន ៣ – ១ ទីម័រខាងកើត
ពូល B៖ វៀតណាម ២ – ២ ប្រ៊ុយណេ
តារាងចំណាត់ថ្នាក់នៅពូល B ដែលជាពូលរបស់កម្ពុជានៅពេលនេះគឺ លេខ១ ម៉ាឡេស៊ី, លេខ២ ប្រ៊ុយណេ និង លេខ ៣ វៀតណាម មាន ៧ ពិន្ទុស្មើគ្នាខុសតែគ្រាប់បាល់ទាត់បញ្ជូលទី ចំណែកក្រុមកម្ពុជា ឈរចំណាត់ថ្នាក់លេខ៤ មាន ៦ ពិន្ទុ ដោយនៅសល់ប្រកួតក្នុងដៃត្រូវប្រកួតរសៀលនេះ ជាមួយក្រុមលេខ ៥ ឥណ្ឌូណេស៊ី មាន ១ ពិន្ទុ ហើយក្រុមបាតតារាងគឺ សិង្ហបុរី មិនទាន់មានពិន្ទុក្នុងដៃនៅឡើយ។
ប្រសិនបើកម្ពុជាឈ្នះការប្រកួត ពួកគេក៏អាចមានឱកាសឡើងទៅកាន់តំណែងលេខមួយ ឬក៏លេខពីរផងដែរ។ បន្ថែមពីលើនេះ ពួកគេនឹងទទួលបានប្រាក់រង្វាន់៥០០០ដុល្លារបន្ថែមទៀត ដោយ២០០០ដុល្លារពីធនាការវិនិយោគ និងអភិវឌ្ឍន៍កម្ពុជា (BIDC) និង២០០០ដុល្លារពីសហព័ន្ធកីឡាបាល់ទាត់កម្ពុជា)។
សម្រាប់គូប្រកួតថ្ងៃនេះវិញមានតែពូល B ប៉ុណ្ណោះ៖
កម្ពុជា ប៉ះ ឥណ្ឌូណេស៊ី ម៉ោង ៣ រសៀល
សិង្ហបុរី ប៉ះ ម៉ាឡេស៊ី ម៉ោង ៧:១៥ នាទីយប់
© រក្សាសិទ្ធិដោយ thmeythmey.com