ជាតិ
សុខភាព
អ្នកឆ្លងមេរោគអេដស៏ក្នុងភូមិរកាកើនដល់៨២នាក់ លោកវេជ្ជបណ្ឌិត តែង គន្ធី អគ្គលេខាធិការអាជ្ញាធរជាតិប្រយុទ្ធនឹងជំងឺអេដស៏
× គិតមកដល់ល្ងាចថ្ងៃទីអង្គារទី១៦ខែធ្នូ ចំនួនអ្នកភូមិរកា ស្រុកសង្កែ ខេត្តបាត់ដំបង ដែលរកឃើញថាបានឆ្លងមេរោគអេដស៏ដោយមិនដឹងខ្លួននោះ បានកើនដល់៨២នាក់ហើយ ដែលក្នុងនោះមានកុមារជាង១០នាក់។ នេះជាការបញ្ជាក់របស់លោកវេជ្ជបណ្ឌិត តែង គន្ធី អគ្គលេខាធិការនៃអាជ្ញាធរជាតិប្រយុទ្ធនឹងជំងឺអេដស៏ ប្រាប់សារព័ត៌មានថ្មីៗនៅព្រឹកថ្ងៃពុធនេះ។
ចំនួនអ្នកឆ្លងមេរោគអេដស៏ទាំង៨២នាក់ ត្រូវបានរកឃើញក្នុងចំណោមអ្នកភូមិ៦៦៣នាក់ ដែលបានស្ម័គ្រចិត្តមកធ្វើតេស្តឈាម បន្ទាប់ពីហេតុការណ៍ផ្ទុះការឆ្លងមេរោគអេដស៏ដ៏ចម្លែករបស់អ្នកភូមិរកា។
អគ្គលេខាធិការនៃអាជ្ញាធរជាតិប្រយុទ្ធនឹងជំងឺឆ្លង លោក តែង គន្ធី បានថ្លែងថា កម្លាំងក្រុមគ្រូពេទ្យត្រូវបានបញ្ជូនបន្ថែមទៅក្នុងភូមិរកានៃស្រុកសង្កែដែលមានប្រជាជនសរុប ២៧០៦នាក់។ លោកវេជ្ជបណ្ឌិតបានអធិប្បាយយ៉ាងដូច្នេះថា៖«យើងមិនទាន់ដល់កម្រិតត្រូវបង្ខំប្រជាជនក្នុងភូមិឲ្យមកធ្វើតេស្តឈាមឡើយ។ ប៉ុន្តែពួកគេបានស្ម័គ្រចិត្តមកបន្តបន្ទាប់គ្នា។ លើសពីនោះ មិនប្រាកដថាមនុស្សទាំងអស់ក្នុងភូមិអាចឆ្លងមេរោគទាំងអស់គ្នានោះទេ។ អ្នកភូមិអាចដឹងខ្លួនឯង ឬសង្ស័យខ្លួនឯងថា តើពួកគេអាចឆ្លងមេរោគអេដស៏ ឬក៏អត់»។ បើតាមការពន្យល់របស់លោកវេជ្ជបណ្ឌិត តែង គន្ធី ដដែល អ្នកភូមិដែលសង្ស័យថា ពួកគេអាចឆ្លងមេរោគអេដស៏បានស្ម័គ្រមកធ្វើតេស្តឈាម ដោយសារតែក្រុមការងារនឹងផ្តល់កញ្ចប់សេវាសុខភាពទាន់ពេលតែម្តង។
កាលពីចុងខែវិច្ឆិកា នៅក្នុងក្របខណ្ឌនៃការពង្រីកសេវាធ្វើតេស្តឈាមរកមេរោគអេដស៏ ក្នុងខេត្តបាត់ដំបង ក្រុមការងារបានជួបប្រទះករណីឆ្លងមេរោគអេដស៏ច្រើនខុសធម្មតានៅក្នុងភូមិរកា នៃស្រុកសង្កែ ខេត្តបាត់ដំបងនេះ។ សោកនាដកម្ម គួរតែបានកើតឡើងក្នុងរយៈពេលយូរហើយ ដោយបង្កឡើងគ្រូពេទ្យប្រចាំភូមិរកា២នាក់ ដែលទំនងជាបានប្រើប្រាស់សឺរ៉ាំងមិនស្អាត ឬប្រើប្រាស់សឺរ៉ាំងដដែលៗ ទៅលើអ្នកជំងឺបន្តបន្ទាប់គ្នានៅក្នុងភូមិ។ ក្រុមការងារពិសេសពីអាជ្ញាធរជាតិប្រយុទ្ធនឹងជំងឺអេដស៏កំពុងដាក់ការ សង្ស័យទៅលើគ្រូពេទ្យទាំងពីរនាក់នេះ ដែលបានរត់គេចខ្លួនបាត់ហើយ៕
© រក្សាសិទ្ធិដោយ thmeythmey.com