សេដ្ឋកិច្ច
អន្តរជាតិ
សេដ្ឋកិច្ចថៃនឹងបន្តធ្លាក់ចុះរហូតដល់ត្រីមាសទីពីរ ឆ្នាំ២០១៥
× ប្រធានសភាពាណិជ្ជកម្មថៃ លោក Issara Wongkusolkij បានធ្វើការព្យាករណ៍ថា សេដ្ឋកិច្ចរបស់ប្រទេសថៃ នឹងបន្តធ្លាក់ចុះ ហើយងើបឡើងវិញយឺតៗ រហូតដល់ត្រីមាសទីពីរ ឆ្នាំ២០១៥ ខាងមុខ ដោយសារការធ្លាក់ចុះនៃការប្រើប្រាស់នៅក្នុងស្រុកនិងការវិនិយោគពីវិស័យឯកជន។ នេះបើយោងតាមទីភ្នាក់ងារព័ត៌មាន Xinhua ។
លោក IssaraWongkusolkij បានឲ្យដឹងទៀតថា ការវិនិយោគនិងការចំណាយរបស់រដ្ឋាភិបាលនឹងបន្តរក្សាសេដ្ឋកិច្ចជាតិនៅត្រឹមកម្រិតទាបចាប់ពីពេលនេះរហូតដល់ដើមឆ្នាំក្រោយខណៈពេលដែលតម្លៃនៃការលក់ទំនិញកសិកម្មដ៏ធំរបស់ប្រទេសដូចជាស្រូវនិងកៅស៊ូមានការថយចុះនោះ។
សេដ្ឋកិច្ចរបស់ប្រទេសថៃទំនងជាមានកំណើនតិចជាង ១ ភាគរយក្នុងឆ្នាំនេះ ទោះបីជាមន្ត្រីរដ្ឋាភិបាល បានព្យាករណ៍ថានឹងមានភាពអំណោយផលទៅលើសេដ្ឋកិច្ចថៃ បន្ថែមទៀតក៏ដោយ។ការធ្លាក់ចុះនៃតម្លៃអង្ករកៅស៊ូនិងដូងប្រេង នៅក្នុងទីផ្សារពិភពលោក នឹងធ្វើឲ្យសេដ្ឋកិច្ចថៃស្ថិតនៅលើទិសដៅធ្លាក់ចុះ។
ប្រធានសភាពាណិជ្ជកម្មថៃរុបនេះក៏បានបញ្ជាក់ថា ការធ្លាក់ថ្លៃផលិតផលកសិកម្មខាងលើនេះ គឺដោយសារតែមានការកាត់បន្ថយតម្រូវការ នាំចូលទំនិញកសិកម្មពីប្រទេសថៃពីសំណាក់ដៃគូពាណិជ្ជកម្មនៅក្នុងពិភពលោកនិងដោយសារតែការប្រកួតប្រជែងតម្លៃ កសិផលរបស់ប្រទេសជាសមាជិកអាស៊ានផ្សេងទៀត ដែលស្ថិតនៅជិតខាងថៃ រួមមានកម្ពុជា និងវៀតណាមជាដើម។
កំណើនសេដ្ឋកិច្ចរបស់ប្រទេសថៃ អាចនឹងកើនឡើងពី ៤ទៅ៥ភាគរយនៅឆ្នាំ ២០១៥ ខណៈពេលប្រាក់ចំណូលពីការនាំចេញទំនិញរបស់ថៃត្រូវបានរំពឹងថានឹងកើនឡើងបួនទៅប្រាំភាគរយផងដែរ។ សេដ្ឋកិច្ចថៃ គឺពឹងផ្អែកលើការរីកចម្រើនក្នុងឧស្សាហកម្មទេសចរណ៍ ក៏ដូចជាឧស្សាហកម្មនាំចេញ ការវិនិយោគក្នុងវិស័យឯកជននិងការប្រើប្រាស់ក្នុងស្រុក ប៉ុន្តែវិស័យទាងនេះបានធ្លាក់ចុះយ៉ាងខ្លាំងចាប់តាំងពីដើមឆ្នាំ២០១៤ នេះមកម្លេះ។
វិស័យទេសចរណ៍របស់ប្រទេសថៃត្រូវបានព្យាករណ៍ថា នឹងអាចទាក់ទាញភ្ញៀវទេសចរជាង ៣០លាននាក់មកពីជុំវិញពិភពលោកហើយអាចរកប្រាក់ចំណូលបានប្រមាណ៤០ពាន់លានដុល្លារអាមេរិក ក្នុងមួយឆ្នាំៗ ពីវិស័យនេះចូលទៅក្នុងសេដ្ឋកិច្ចរបស់ខ្លួន៕
© រក្សាសិទ្ធិដោយ thmeythmey.com