កីឡាជាតិ
ជាតិ
ចំបាប់ ចាប់ប្រកួតជើងឯកថ្នាក់ជាតិមុនគេក្នុងឆ្នាំ ២០១៥ នេះ
× សហព័ន្ធកីឡាចំបាប់កម្ពុជា គ្រោងនឹងរៀបចំប្រកួតជើងឯកថ្នាក់ជាតិកម្រិតឈុតយុវជន ប្រចាំឆ្នាំមុនគេ ក្នុងឆ្នាំ ២០១៥ នេះ ពោលគឺចាប់ពីថ្ងៃទី ២៤ ដល់ ២៦ ខែ មករា ខាងមុខ នៅអាគារដំបូលទូកក្នុងបរិវេណពហុកីឡដ្ឋានជាតិអូឡាំពិក ខណៈកីឡាផ្សេងនៅមិនទាន់រៀបចំកាលវិភាគប្រកួតរបស់ខ្លួននៅឡើយ។
យោងតាមសេចក្ដីជូនដំណឹងរបស់សហព័ន្ធកីឡាសក្ដានុពលរបស់កម្ពុជាមួយនេះនាពេលកន្លងមកនឹងបើកវិញ្ញាសាចំនួន ៤ ប្រភេទឱ្យប្រកួតប្រជែង ដោយក្នុងនោះ មានទី១ វិញ្ញាសានារីអាយុចាប់ពី ១៦ ដល់ ១៨ ឆ្នាំ ប្រកួតគីឡូចាប់ពី ៤៦ ដល់ ៤៨ Kg និង ៤៩ ដល់ ៥១ Kg។ ទី២ វិញ្ញាសា នារីចាប់ពីអាយុ ១៩ ដល់ ២៣ ឆ្នាំ មានប្រកួតគីឡូចាប់ពី ៤៨ ដល់ ៥១ Kg, ៥២ ដល់ ៥៦ Kg និង ៥៧ ដល់ ៦០ Kg។
ចំណែកទី៣ វិញ្ញាសាបុរសអាយុចាប់ពី ១៦ ដល់ ១៨ ឆ្នាំប្រកួតគីឡូចាប់ពី ៤៦ ដល់ ៥០ Kg, ៥១ ដល់ ៥៥ Kg, ៥៦ ដល់ ៦០ Kg, ៦១ ដល់ ៦៥ Kg, ៦១ ដល់ ៦៥ Kg, ៦៦ ដល់ ៧០ Kg។ ចុងក្រោយវិញ្ញាសាបុរសអាយុចាប់ពី ១៩ ដល់ ២៣ ឆ្នាំ ទម្ងន់ចាប់ពី ៥០ដល់ ៥៥ Kg, ៥៦ ដល់ ៦០ kg, ៦១ ដល់ ៦៦ Kg, ៦៧ ដល់ ៧៣ kg, ៧៤ ដល់ ៨០ Kg, ៨១ ដល់ ៨៦ Kg។
ព្រឹត្តិការណ៍នេះបើកឱ្យប្រកួតតែសម្រាប់កីឡាករចំបាប់ប្រភេទសេរី (Free Style) ប៉ុណ្ណោះ ហើយមិនអនុញ្ញាតឱ្យកីឡាករក្រុមជម្រើសជាតិចូលប្រកួតប្រជែងឡើយ លើកលែងតែអ្នកនោះឈប់ពីការប្រមូលផ្ដុំរយៈពេល ២ ឆ្នាំទើបអាចមានសិទ្ធិប្រកួតបាន។
លោក ធិន វិចិត្រ អគ្គលេខាធិការសហព័ន្ធកីឡាចំបាប់កម្ពុជា បានលើកឡើងថា លោក Casey Barnett ជាអនុប្រធានសហព័ន្ធកីឡាចំបាប់កម្ពុជា និង ជានាយកសាលា Cam Ed គឺជាអ្នកឧបត្ថម្ភទាំងស្រុងសម្រាប់ការប្រកួតនេះ រយៈពេល ៤ ឆ្នាំជាប់គ្នាមកហើយ។ ការប្រកួតនេះធ្វើឡើងដើម្បីរកអ្នកបន្តវេនដែលមានសមត្ថភាពជំនាន់ក្រោយចូលប្រឡូកក្នុងពិភពកីឡាចំបាប់។
ព្រឹត្តិការណ៍កីឡាចំបាប់សម្រាប់យុវជនថ្នាលនេះនឹងឈប់ទទួលពាក្យចូលរួមនៅថ្ងៃទី ២០ ខែ មករា ឆ្នាំ ២០១៥ វេលាម៉ោង ៥ ល្ងាច។ សម្រាប់ក្លិប ឬ បេក្ខជន ដែលមិនទាន់ដាក់ពាក្យចុះឈ្មោះបង្ហាញសមត្ថភាព អាចទាក់ទងបាននៅការិយាល័យសហព័ន្ធកីឡាចំបាប់កម្ពុជានៅក្នុងសាលដំបូងទូកថ្មី ក្នុងពហុកីឡដ្ឋានជាតិ ឬ ទាក់ទងមន្ត្រីជំនាញរបស់សហព័ន្ធតាមលេខទូរសព្ទ័ ០១២ ៩២៨ ៤៩៦ ឬ ០១៦ ៨០០ ៨៨០ រៀងរាល់ម៉ោងធ្វើការ៕
រូបថត៖ សហព័ន្ធចំបាប់
© រក្សាសិទ្ធិដោយ thmeythmey.com