ជាតិ
ក្លឹបអ្នកកាសែតកម្ពុជាថ្កោលទោសចំពោះការបាញ់សម្លាប់អ្នកកាសែត Charlie Hebdo
× ក្លឹបអ្នកកាសែតកម្ពុជា ដែលជាស្ថាប័នឯករាជ្យ បម្រើផលប្រយោជន៍និងការពារអ្នកកាសែត បានសម្ដែងការរន្ធត់ និងទុក្ខក្រៀមក្រំ ចំពោះទស្សនាវដ្ដីបារាំងឈ្មោះ Charlie Hebdo នៅទីក្រុងប៉ារីស ដែលត្រូវបានជនបិទមុខពីរនាក់ ប្រដាប់ដោយកាំភ្លើងបានចូលទៅបាញ់វាយប្រហារនៅទីស្នាក់ការ ទស្សនាវដ្ដី Charlie Hebdo ដែលបានបណ្ដាលឲ្យមនុស្សស្លាប់ចំនួន១២នាក់ កាលពីថ្ងៃពុធ ទី៧ មករាកន្លងទៅ។
ក្លឹបអ្នកកាសែតកម្ពុជា ចាត់ទុកឃាតកម្មលើអ្នកកាសែតនេះ ជាអំពើព្រៃផ្សៃ សាហាវប្រឆាំងមនុស្សជាតិ និងរំលោភយ៉ាងធ្ងន់ធ្ងរលើសេរីភាពអ្នកសារព័ត៌មាន និងសិទ្ធមនុស្សដែលមិនអាចអត់ឱនឲ្យបាន ។ ជាមួយគ្នានេះក្លឹបអ្នកកាសែតកម្ពុជា ប្រកាសថ្កោលទោសយ៉ាងដាច់អហង្ការចំពោះអំពើព្រៃផ្សៃអមនុស្សធម៌នេះ ។ ដោយអំពាវនាវទៅសហគមន៍អន្តរជាតិ និងមនុស្សជាតិសកលលោកថ្កោលទោស និងចាត់វិធានការគ្រប់រូបភាពដើម្បីប្រឆាំងក្រុមភេរវកម្ម ដែលមិនអាចលើកលែងបាននេះ។
កាលពីពេលថ្មីៗនេះ អ្នកកាសែត និងអ្នកគូររូបថ្លុក ៨ នាក់ បានស្លាប់ ក្នុងចំណោមមនុស្ស១២នាក់បានស្លាប់នៅក្នុងហេតុការណ៍បាញ់សម្លាប់ នៅទីស្នាក់ការ ទស្សនាវដ្ដីCharlie Hebdo ៕
© រក្សាសិទ្ធិដោយ thmeythmey.com