កីឡាជាតិ
ជាតិ
Hun Sen Cup៖ ក្រសួងការពារជាតិ ជាបេក្ខភាពទី៣ ឡើងទៅវគ្គបន្ទាប់ ក្រសួងការពារជាតិ នៅមណ្ឌលភ្នំពេញ ជាក្រុមទី៣ ដែលកក់កៅអីឡើងទៅលេងនៅវគ្គបន្ទាប់ក្នុងពានរង្វាន់ Hun Sen Cup 2015 បន្ទាប់ពីក្រុមក្រចេះ និង បាត់ដំបង ឡើងដោយស្វ័យប្រវត្តិ ក្រោយប្រកួត ២ លើកឈ្នះទាំង ២ មាន ៦ ពិន្ទុ។ ចំណែកក្រុមខ្លះនៅពូលដទៃត្រូវប្រកួតសម្រេចរសៀលនេះសិន។
សម្រាប់មណ្ឌលកណ្ដាល ដែលរៀបចំនៅខេត្តកំពង់ធំ នឹងត្រូវដឹងនៅថ្ងៃនេះដែរ ក្រោយក្រុមម្ចាស់ផ្ទះប្រកួតលើកទី២ ជាមួយក្រុមខេត្តសៀមរាបចប់ ស្របពេលក្រុមឧត្តរមានជ័យ ដកខ្លួន។ កាលពីជើងទី១ សៀមរាប បានយកឈ្នះក្រុម កំពង់ធំ ដោយលទ្ធផល ១ ទល់ ០ ។ ប្រកួតនៅថ្ងៃនេះនឹងរកឃើញក្រុមឡើងមកលេងវគ្គ ១៦ ក្រុមចុងក្រោយបានហើយ រវាង កំពង់ធំ ឬ សៀមរាប។
ចំណែកមណ្ឌលខាងកើត ដែលកំពុងរៀបចំនៅខេត្តព្រៃវែង មិនទាន់បែងចែកដាច់ស្រេចបានទេ ព្រោះថ្ងៃនេះទើបតែដល់ប្រកួតទី២ ក្នុងពូលប៉ុណ្ណោះ ខណៈក្រុមចូលរួមមានចំនួន ៣ គឺ ម្ចាស់ផ្ទះព្រៃវែង, ត្បូងឃ្មុំ និង កណ្ដាល។ ឥឡូវនេះក្រុមខេត្តព្រៃវែង ឈរកំពូលតារាងបណ្ដោះអាសន្នសិន ក្រោយយកឈ្នះក្រុមខេត្តកណ្ដាល ៤ ទល់ ២ ។
ចំពោះមណ្ឌលខាងត្បូង ដែលរៀបចំនៅខេត្តតាកែវ វិញនឹងរកឃើញក្រុមខ្លាំងនៅក្នុងពូលថ្ងៃនេះដែរ ក្រោយក្រុមខេត្តកែប ដកខ្លួន។ ក្រុមខេត្តតាកែវ ត្រូវប្រកួតជាមួយខេត្តកំពត ក្នុងជើងទី២ នៅរសៀលនេះ បន្ទាប់ពីក្រុមភ្ញៀវកំពត លុតម្ចាស់ផ្ទះ ៣ ទល់ ០ កាលពីថ្ងៃបើកឆាក។
ដោយឡែកនៅមណ្ឌលភ្នំពេញ ក្រៅពីក្រុមក្រសួងការពារជាតិ ដែលដណ្ដើមកៅអីបានមុននៅពូល A នោះ ក្រុមនៅពូល B គឺក្រុម Albirex Niigata Phnom Penh និង គីរីវង់សុខសែនជ័យ កំពុងប្រជែងតំបន់កំពូលតារាងគ្នា ក្រោយប្រកួត ២ លើកឈ្នះទាំង ២ ដូចគ្នា។
សរុបជារួមនៅសល់កៅអីចំនួន ៥ ទៀតប៉ុណ្ណោះដែលកំពុងរកក្រុមខ្លាំងឆ្លងទៅវគ្គបន្ទាប់ស្របពេលមណ្ឌលកំពង់ធំ និង តាកែវ នឹងដឹងលទ្ធផលនៅរសៀលនេះដូចគ្នា។
ចំណែកលទ្ធផលកាលពីថ្ងៃបើកឆាក ៨ មករា ឆ្នាំ ២០១៥ មាន៖
មណ្ឌលភ្នំពេញ
– ក្រសួងការពារជាតិ ៣ – ០ ព្រែកជ័យកីឡា (នៅវិទ្យាស្ថានអប់រំកាយនិងកីឡា)
– គីរីវង់សុខសែនជ័យ ២ – ១ ខណ្ឌជ្រោយចង្វា (នៅទន្លេបាទី)
– Albirex Niigata PP ២ – ០ ខណ្ឌទួលគោក (នៅទន្លេបាទី)
មណ្ឌលខេត្តកំពង់ធំ៖ ខេត្តកំពង់ធំ ០ – ១ ខេត្តសៀមរាប (នៅកីឡដ្ឋានខេត្ត)
មណ្ឌលខេត្តតាកែវ៖ ខេត្តតាកែវ ០ – ៣ ខេត្តកំពត (នៅទីលានគរុកោសល្យខេត្ត)
មណ្ឌលខេត្តព្រៃវែង៖ ខេត្តព្រៃវែង ៤-២ ខេត្តកណ្ដាល (នៅកីឡដ្ឋានខេត្ត)
លទ្ធផលនៅថ្ងៃ ៩ មករា ម្សិលមិញមាន៖
មណ្ឌលភ្នំពេញ៖
- អាកាសចរស៊ីវិល ១ – ១៨ ក្រសួងការពារជាតិ (នៅទន្លេបាទី)
- ជ្រោយចង្វា ១ – ៣ Albirex Niigata PP (នៅវិទ្យាស្ថានអប់រំកាយនិងកីឡា)
- ទួលគោក ០ – ៣ គីរីវង់សុខសែនជ័យ (នៅវិទ្យាស្ថានអប់រំកាយនិងកីឡា)
ការប្រកូតនៅថ្ងៃទី ១០ មករា នេះមាន៖
មណ្ឌលកំពង់ធំ៖ សៀមរាប Vs កំពង់ធំ នៅម៉ោង ៣ រសៀលនៅកីឡដ្ឋានខេត្ត
មណ្ឌលតាកែវ៖ កំពត Vs តាកែវ នៅម៉ោង ៣ រសៀលនៅកីឡដ្ឋានគរុកោសល្យខេត្ត
មណ្ឌលព្រៃវែង៖ កណ្ដាល Vs ត្បូងឃ្មុំ នៅម៉ោង ៣ រសៀលនៅកីឡដ្ឋានខេត្ត
មណ្ឌលភ្នំពេញ៖ មិនមានការប្រកួតទេត្រូវសម្រាកសិនព្រោះប្រកួត ២ ថ្ងៃជាប់គ្នា។
© រក្សាសិទ្ធិដោយ thmeythmey.com