ជាតិ
នយោបាយជាតិ
ភ្នំពេញ នឹងបង្កើតក្រុងសម្ព័ន្ធភាពជាមួយក្រុងឡូវែលរបស់អាមេរិកសប្តាហ៍ក្រោយ រូបថតសាលារាជធានីភ្នំពេញ
× អភិបាលក្រុងឡូវែលលោក រ៉ូដនី អិម អ៊ីលៀត (Rodney M. ELLIOTT) នៃរដ្ឋម៉ាស្សាឈូសេត (Massachusetts) របស់សហរដ្ឋអាមេរិកនឹងបំពេញទស្សនកិច្ចនៅក្នុងប្រទេសកម្ពុជាពីថ្ងៃទី១៣ដល់ថ្ងៃទី១៧ខែមករា ក្នុងសប្តាហ៍ក្រោយនេះ។ ក្នុងចំណោមនៃជំនួបសំខាន់ៗជាមួយថ្នាក់ដឹកនាំប្រទេសកម្ពុជារួមមានលោកនាយករដ្ឋមន្ត្រី ហ៊ុន សែន ផងនោះ អភិបាលក្រុងឡូវែលនឹងចុះហត្ថលេខាលើអនុស្សារណៈយោគយល់មួយស្តីពីការបង្កើតក្រុងសម្ព័ន្ធភាពជាមួយជាមួយរាជធានីភ្នំពេញ។
អភិបាលក្រុងឡូវែលលោក រ៉ូដនី អិម អ៊ីលៀត នឹងត្រូវចុះហត្ថលេខាជាមួយលោក ប៉ា សុជាតិវង្ស អភិបាលរាជធានីភ្នំពេញ ដើម្បីបង្កើតក្រុងសម្ព័ន្ធភាព នៅក្នុងសប្តាហ៍ក្រោយនេះ។ នេះបើយោងតាមសេចក្តីប្រកាសព័ត៌មានរបស់ក្រសួងការបរទេសកម្ពុជា។ ពិធីប្រកាសបង្កើតចំណងមេត្រីភាពរវាងក្រុងទាំងពីរ នឹងត្រូវធ្វើឡើងនៅក្នុងដំណើរទស្សនកិច្ចរបស់លោកអភិបាលក្រុងឡូវែលនៅក្នុងប្រទេសកម្ពុជា។ ក្រុងឡូវែល គឺជាក្រុងធំទី៤នៃរដ្ឋម៉ាស្សាឈូសេត ហើយដែលមានពលរដ្ឋខ្មែរជាច្រើនរស់នៅ។
អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ បានពន្យល់ប្រាប់សារព័ត៌មានថ្មីៗ នៅព្រឹកថ្ងៃអាទិត្យនេះថា ការចងសម្ព័ន្ធមេត្រីភាពជាមួយក្រុងឡូវែលរបស់អាមេរិក នឹងនាំមកនូវផលប្រយោជន៍ដល់រាជធានីភ្នំពេញ។ អ្នកនាំពាក្យសាលារាជធានីភ្នំពេញបញ្ជាក់យ៉ាងដូច្នេះថា៖«ទីក្រុងឡូវែលជាទីក្រុងឧស្សាហកម្ម ក្រុងពាណិជ្ជកម្ម។ ដូច្នេះយើងអាចផ្តើមគិតគូរជាមួយគ្នាថា តើយើងអាចធ្វើសហប្រតិបត្តិការ នាំចេញនាំចូលទំនិញជាមួយគ្នា និងធ្វើសហប្រតិបត្តិការលើវិស័យផ្សេងៗទៀត»។
បើតាមការអះអាងរបស់លោក ឡុង ឌីម៉ង់ វត្តមាននៃប្រជាពលរដ្ឋខ្មែរនៅក្នុងក្រុងឡូវែលនោះ បានរួមចំណែកធ្វើអោយលោក រ៉ូដនី អិម អ៊ីលៀត បានជាប់ឆ្នោតធ្វើជាអភិបាលក្រុង ដូច្នេះ លោកអភិបាលក្រុងរូបនេះ ចង់បន្តទំនាក់ទំនងកាន់តែស៊ីជម្រៅជាមួយកម្ពុជា។
ក្រោយពីសាលារាជធានីភ្នំពេញបង្កើតចំណងមេត្រីភាពជាមួយក្រុងឡូវែលហើយនោះ ក្រុងឡូវែលគឺជាទីក្រុងទី២របស់សហរដ្ឋអាមេរិកដែលមានសម្ព័ន្ធភាពជាមួយភ្នំពេញ បន្ទាប់ក្រុង គ្លីវិឡិននៃរដ្ឋថេនេស៊ី (Tennessee)។ «ក្រោយពីបានភ្ជាប់សម្ព័ន្ធភាពជាមួយក្រុងគ្លីវិឡិនហើយ អាជ្ញាធរក្រុងគ្លីវិឡិន បានផ្តល់ជំនួយជួយកសាងហេដ្ឋារចនាសម្ព័ន្ធមួយចំនួននៅក្នុងសហគមន៍ភូមិអណ្តូងក្នុងខណ្ឌព្រែកព្នៅ។ ដូច្នេះ យើងសង្ឃឹមថា សម្ព័ន្ធភាពជាមួយក្រុងឡូវែលនេះ នឹងនាំមកការជួយអភិវឌ្ឍន៍រាជធានីភ្នំពេញបន្ថែមទៀត»។ នេះជាជាការរំពឹងទុករបស់លោក ឡុង ឌីម៉ង់។
រាជធានីភ្នំពេញបានចុះហត្ថលេខាលើអនុស្សារណៈយោគយល់ស្តីពីការបង្កើតចំណងមេត្រីភាពជាមួយទីក្រុងមួយចំនួនក្នុងពេលកន្លងមកដូចជា ទីក្រុងគុនមីងរបស់ប្រទេសចិន ទីក្រុងអ៊ិនឈាន់ និងទីក្រុងប៊ូសាននៃប្រទេសកូរ៉េខាងត្បូង និងទីក្រុងហូជីមិញ នៃប្រទេសវៀតណាមជាដើម៕
© រក្សាសិទ្ធិដោយ thmeythmey.com