អន្តរជាតិ
នយោបាយអន្តរជាតិ
ចិនហាមប្រជាជនឥស្លាមពាក់ស្បៃហ៊ុំមុខនៅតំបន់ទាមទារផ្តាច់ខ្លួន Xinjiang
×![]()
អាជ្ញាធរនៅតំបន់ភាគខាងលិចប្រទេសចិន ស៊ិនជាំង (Xinjiang) បានសម្រេចអនុម័ត ច្បាប់ថ្មីមួយ ដោយ សម្រេចហាមឃាត់បណ្តាប្រជាជនឥស្លាមនៅតំបន់ខាងលើពាក់ស្បៃហ៊ុមខ្លួននៅទីសាធារណៈ។ យ៉ាងណាក៏ដោយការសម្រេចហាមឃាត់ប្រជាជនឥស្លាមនោះហាក់បីដូចជាប៉ះពាល់ដល់សេរីភាពសាសនា និងរើសអើងផ្នែកសាសនាផងដែរ។
កញ្ញា ខន ចំប៉ា លម្អិតព័ត៌មាននេះ
កាលពីម្សិលមិញនេះអាជ្ញាធរតំបន់ស៊ីនជាំង បានសម្រេចអនុម័ត ច្បាប់ថ្មី មួយដែលហាមឃាត់បណ្តាប្រជាជនឥស្លាមនៅតំបន់ខាងលើពាក់ស្បៃ ឬក្រណាត់ហ៊ុមខ្លួនតាមបែបសាសនានៅទីសាធារណៈបន្តទៀត។ ច្បាប់ថ្មីត្រូវបានសភាតំបន់អនុញ្ញាត ដោយផ្តល់ភ្លើងបៃតង អោយអនុវត្តន៍កាលពីចុងសប្តាហ៍កន្លងទៅនេះ ប៉ុន្តែការសម្រេចអោយមានច្បាប់នេះ បានធ្វើអោយមានប្រតិកម្ម ពីប្រជាជនក្នុងតំបន់ដែលជាអ្នកកាន់សាសនាឥស្លាមផងដែរ។
តាមពិតទៅប្រជាជនម៉ូស្លីមជាស្ត្រីភាគច្រើនបានប្រើប្រាស់ស្បៃដែលហ៊ុមដណ្តប់ដងខ្លួន និងមុខនៅតាម ទីសាធារណៈ ហើយគេអះអាងថាវាជាទំនៀមទម្លាប់និងប្រពៃណីមួយរបស់ប្រជាជនឥស្លាមប៉ុណ្ណោះ។ មានមតិលើកឡើងថាការសម្រេចចេញច្បាប់ ដោយបញ្ជាប្រជាជនឥស្លាមឈប់ប្រើប្រាស់ស្បៃនេះតទៅ ទៀត នៅពេលពួកគេនៅតាមទីសាធារណនោះ ជាទង្វើដែលប៉ះពាល់សិទ្ធិសេរីភាពជាមូលដ្ឋាន ឬ ជា ការរើសអើងផ្នែកសាសនាមួយផងដែរ។ គេសង្ស័យថា ការសម្រេចអោយប្រជាជននៅក្នុងតំបន់ខាងលើ ជាវិធានការមួយរបស់អាជ្ញាធរក្នុងការគ្រប់គ្រងសណ្តាប់ធ្នាប់និងសន្តិសុខ ដ្បិតនៅក្នុងតំបន់នេះ សម្បូរ ទៅដោយអំពើហិង្សា និងមានភាពតានតឹងនិងប្រឈមមុខគ្នារវាងប្រជាជនចិនចំណូលថ្មី និងជនជាតិ ភាគច្រើនប្រកាន់សាសនាឥស្លាម។
យ៉ាងណាក៏ដោយក្រៅពីសម្រេចហាមប្រជាជនឥស្លាមក្នុងការប្រើប្រាស់ស្បៃហ៊ុមព័ទ្ធខ្លួន អាជ្ញាធរតំបន់ មួយរបស់ខេត្តស៊ីនជាងំក៏ធ្លាប់បានហាមឃាត់ប្រជាជនឥស្លាមដែលស្លៀកសម្លៀកបំពាក់ប្រពៃណីឥស្លាម និងទុកពុកមាត់វែងមិនអោយជិះរថយន្តសាធារណៈផងដែរកាលពីខែសីហាឆ្នាំ ២០១។ សម្លៀក បំពាក់បីប្រភេទដែលត្រូវបានគេហាមឃាត់ ហើយរាល់រថយន្តក្រុងត្រូវបានអាជ្ញាធរបញ្ជាអោយត្រួត ពិនិត្យនិងរាយការណ៍ទៅកាន់សមត្ថកិច្ចប្រសិនបើមានអ្នកបំពានបទបញ្ជារបស់អាជ្ញាធរ។ ដោយឡែកនៅក្នុង តំបន់នេះ ដដែលកាលពីប៉ុន្មានខែមុន អាជ្ញាធរតំបន់បានចេញវិធានការហាមសិស្សសាលា និងមន្ត្រីរាជការ ចំពោះការតមដោយអនុវត្តតាមពិធីសាសនារ៉ាម៉ាដាន់ (Ramadan)ថែមទៀតផង។
តាមពិតទៅខេត្តស៊ីនជាំងជាតំបន់មួយដែលសម្បូរប្រជាជនឥស្លាមដែលគ្រប់គ្នាស្គាល់ថាជនជាតិអ៊ុយហ្គួ (Uyghurs) ហើយភាពតានតឹងនិងបញ្ហាទើបតែកើតមានឡើងប៉ុន្មាន ទសវត្សចុងក្រោយនៅពេលដែល ជនជាតិហានរបស់ចិនជាច្រើន បាននាំគ្នាទៅរស់នៅក្នុងខេត្តខាងលើប៉ុណ្ណោះ។ ដោយសារមានភាពតាន តឹងនិងជម្លោះរវាងប្រជាជនផ្សេងគ្នាក្នុងតំបន់ គេសង្កេតឃើញមានការវាយប្រហារហិង្សាកើតឡើងជាញឹកញយនៅស៊ីនជាំង ហើយអាជ្ញាធរចិនបានចោទប្រកាន់ជនជាតិ Uyghursថាជាក្រុមជ្រុលនិយមសាសនា និងនៅពីក្រោយករណីវាយប្រហារនេះ។
យ៉ាងណាក៏ដោយសា្ថប័នឃ្លាំមើលសិទ្ធិមនុស្ស និងសកម្មជនសិទ្ធិមនុស្ស Uyghurs បានថ្កោលទោស អាជ្ញាធរចិនដែលបន្តរឹតបន្តឹងសេរីភាព រើសអើង និងប្រើវិធានការក្តៅប្រឆាំងប្រជាជនឥស្លាមផងដែរ។ អង្គការលើកលែងទោសអន្តរជាតិបានបញ្ជាក់ថា ប្រជាជនអ្នកកាន់សាសនាឥស្លាមខាងលើមិន ត្រឹមតែ រងការធ្វើទុក្ខបុកម្នេញពីអាជ្ញាធរទេ ពួកគេក៏ប្រឈមមុខការរើសអើងការងារ ការរស់នៅសិទ្ធិ នយោបាយ សេរីភាពសេដ្ឋកិច្ច និងឱកាសក្នុងការអប់ផងដែរ៕
© រក្សាសិទ្ធិដោយ thmeythmey.com
