អន្តរជាតិ
នយោបាយអន្តរជាតិ
មនុស្សច្រើននាក់ត្រូវបានចាប់ខ្លួនក្រោយប្រតិបត្តិការប្រឆាំងភេរវកម្មនៅបែលហ្ស៊ិក
×![]()
ក្រោយមានការការបើកប្រតិបត្តិការតាមប្រមាញ់ក្រុមភេរវជននៅក្នុងប្រទេសបែលហ្ស៊ិក គេសង្កេតឃើញប៉ូលិសអឺរ៉ុបចាប់ខ្លួនជនសង្ស័យជាច្រើននាក់ដែលគេជឿជាក់ថាមានជាប់ពាក់ព័ន្ធនឹងអំពើភេរវកម្ម។ គេព្រួយបារម្ភថា ចលនាភេរវកម្មវាយប្រហារកើតមានឡើងច្រើននៅក្នុងតំបន់អឺរ៉ុប ដោយសារប្រជាជនអឺរ៉ុបរាប់ពន្ធនាក់ឆ្លងដែនទៅធ្វើសង្គ្រាមជីហាតនៅមជ្ឈិមបូព៌ា។
លោក មុំ ពិទូរ្យ លម្អិតព័ត៌មាននេះ
មនុស្សជាច្រើននាក់ត្រូវបានប៉ូលិសចាប់ខ្លួននៅតាមបណ្តាប្រទេសសមាជិកសហភាពអឺរ៉ុប ក្រោយពេលដែលរដ្ឋាភិបាលបែលហ្ស៊ិកសម្រេចរឹតបន្តឹងសន្តិសុខ និងបើកយុទ្ធនាការតាមប្រមាញ់ក្រុមភេរវជននៅក្នុងប្រទេស។
ក្នុងប្រតិបត្តិការតាមប្រមាញ់បណ្តាក្រុមភេរវជននៅអឺរ៉ុបកំពុងត្រូវបានគេរៀបចំឡើងយ៉ាងសស្រាក់ស្រាំ ហើយសន្តិសុខត្រូវបានគេរឹតបន្តឹងដោយការពង្រាយកងកម្លាំង និងទាហានជាច្រើនរយនាក់នៅតាមទីតាំងសំខាន់ៗផងដែរ។ បច្ចុប្បន្ននេះ គេសន្និដ្ឋានថា ប្រជាជនអឺរ៉ុបភាគច្រើនជាយុវវ័យ បានឆ្លងដែនទៅកាន់តំបន់មជ្ឈិមបូព៌ាដើម្បីធ្វើសង្គ្រាមនៅទីនោះដោយចូលរួមជាមួយក្រុមភេរវជនរដ្ឋឥស្លាម និងក្រុមអាល់កៃដា ហើយពួកគេក៏ព្យាយាមត្រលប់មកតំបន់អឺរ៉ុបវិញដើម្បីចាប់ផ្តើមវាយប្រហារ។
ប្រជាជនទាំងនោះភាគច្រើនបានទទួលការបណ្តុះបណ្តាល និងហ្វឹកហាត់ជាពិសេស ហើយមិនត្រឹមតែប៉ុណ្ណោះទេពួកគេក៏បានរៀនសូត្រមនោគមន៍វិជ្ជាជ្រុលនិយមរបស់ក្រុមភេរវជនផងដែរ។ នៅបែលហ្ស៊ិកម្សិលមិញ ជនសង្ស័យពីរនាក់ត្រូវបានប៉ូលិសបាញ់សម្លាប់ ដោយសារពួកគេបាញ់ប៉ូលិសមុន នៅក្នុងយុទ្ធនាការតាមកម្ចាត់ក្រុមភេរវជន។ ខណៈនោះដែរ គេឃើញមានជនសង្ស័យជាច្រើននាក់ផ្សេងទៀតត្រូវបានចាប់ខ្លួន នៅបារាំង និង អាល្លឺម៉ងផងដែរ។
បើតាមការអោយដឹងពីសំណាក់ប៉ូលិសបែលហ្ស៊ិក មនុស្ស១៣នាក់ត្រូវបានចាប់ខ្លួន ដោយក្នុងចំណោមនោះមាន ៥នាក់រងការចោទប្រកាន់ថាបានចូលរួមក្នុងសកម្មភាពភេរវកម្ម ហើយមានខ្លះទៀតទើបតែត្រលប់មកពីប្រទេសស៊ីរីវិញ។
ក្នុងប្រតិបត្តិការនៅបែលហ្ស៊ិក ប៉ូលិសបានរកឃើញកាំភ្លើងយន្ត កាំភ្លើងខ្លី គ្រឿងផ្ទុះ និង ឧបករណ៍ទាក់ទងគ្នាជាច្រើនផ្សេងទៀត ដែលពួកគេទាំងនោះយកមកប្រើប្រាស់ប៉ុនប៉ងបើការវាយប្រហារ។
ចំណែកជនជាតិបែលហ្ស៊ិកពីរនាក់ត្រូវបានចាប់ខ្លួននៅក្នុងប្រទេសបារាំង បន្ទាប់ពីព្យាយាមរត់គេចខ្លួនចេញពីការតាមប្រមាញ់របស់ប៉ូលិស ដោយពួកគេប៉ងរត់ចេញពីបារាំងទៅកាន់ប្រទេសអូស្ត្រាលី។ ក្រោយបារាំងចាប់ខ្លួនបាន ខាងអាជ្ញាធរបែលហ្ស៊ិកបានស្នើសុំអោយមានការធ្វើបត្យាប័នបញ្ជូនជនទាំងនោះមកកាន់បែលហ្ស៊ិកវិញ។
ដោយឡែក កាលពីម្សិលមិញនេះ កងកម្លាំងពិសេសបារាំងបានចាប់ខ្លួនមនុស្សចំនួន ១២នាក់ដែលជាជនសង្ស័យ ដើម្បីយកមកសួរនាំ ទាក់ទិននឹងការគាំទ្រ និងជួយជ្រោមជ្រែងជនល្មើសពីរនាក់បងប្អូនដែលវាយប្រហារទស្សនាវដ្តី CharliHebdoកាលពីសប្តាហ៍មុននោះ។
ចំណែកនៅប្រទេសអាល្លឺម៉ង់ឯណោះវិញ ក៏មានការតាមប្រមាញ់ក្រុមភេរវជនដូចគ្នាដែរ ហើយមនុស្សពីរនាក់ត្រូវបានប៉ូលីសចាប់ខ្លួន ក្នុងនោះមានម្នាក់ជាមេក្រុមប៉ុនប៉ងរៀបចំគម្រោងវាយប្រហារនៅក្នុងប្រទេសស៊ីរី និងម្នាក់ទៀតបានផ្តល់ចំនួយគាំទ្រផ្នែកហរិញ្ញវត្ថុដល់ដំណើរការវាយប្រហារនេះ។
ដោយឡែកក្រៅពីតាមប្រមាញ់ភេរវជន នៅប៉ាគីស្ថាន និងនីហ្សេ ក៏មានការផ្ទុះចលនាបាតុកម្មហិង្សាប្រឆាំងនឹងការប្រើប្រាស់រូបថ្លុកដែលប្រមាថព្យាការីសាសនាឥស្លាមផងដែរ។ មនុស្ស ៤នាក់ បានស្លាប់និងមនុស្ស ៤៥នាក់ផ្សេងទៀតបានរងរបួសនៅក្នុងបាតុកម្មហិង្សានៅក្នុងប្រទេសនីហ្សេ៕
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
3 ថ្ងៃ
