អន្តរជាតិ
នយោបាយអន្តរជាតិ
អាមេរិកបញ្ជូនយន្តហោះចម្បាំងច្រើនគ្រឿងទៅអាល្លឺម៉ង់ខណៈបញ្ហាអ៊ុយក្រែនតានតឹង
×![]()
រដ្ឋាភិបាលក្រុងវាស៊ីនតោនបានបញ្ជូនយន្តហោះចម្បាំងប្រភេទ A-10 ប្រហែល ១០គ្រឿងទៅកាន់ប្រទេសអាល្លឺម៉ង់ ស្របពេលដែលមេដឹកនាំអឺរ៉ុបនិងភាគីជម្លោះអ៊ុយក្រែនជជែកគ្នានៅបេឡារ៉ុស ហើយជម្លោះភាគខាងកើតកំពុងបន្តកើនកម្តៅ។ យន្តហោះចម្បាំង និងអ្នកបើកយន្តហោះច្រើនរយនាក់របស់អាមេរិកនឹងចូលរួមក្នុងលំហាត់យោធាជាមួយបក្សសម្ព័ន្ធយោធាណាតូ។
មានសំឡេង
មន្ត្រីក្រុងវ៉ាស៊ីនតោនបានថ្លែងអោយដឹងថា រដ្ឋាភិបាលខ្លួនបានបញ្ជូនយន្តហោះចម្បាំងប្រហែល១០គ្រឿង និងអ្នកបើកយន្តហោះ៣០០នាក់ផ្សេងទៀតទៅកាន់ប្រទេសអាល្លឺម៉ង់ដើម្បីចូលរួមក្នុងសមយុទ្ធយោធារបស់បក្សសម្ព័ន្ធយោធាណាតូ។ យន្តហោះចម្បាំងប្រភេទ A-10 ដែលត្រូវបញ្ជូនទៅចូលរួមក្នុងលំហាត់យោធានេះ ចាកចេញពីមូលដ្ឋានទ័ពជើងអាកាសសហរដ្ឋអាមេរិកនៅតំបន់ Arizona ហើយបានទៅដល់ទីតាំងធ្វើសមយុទ្ធរួចរាល់ហើយ ដើម្បីត្រៀមលក្ខណៈប្រតិបត្តិការ។
យន្តហោះចម្បាំងខាងលើមានឈ្មោះល្បីល្បាញតាំងពីសម័យសង្គ្រាមត្រជាក់មកម្ល៉េះ ហើយការបញ្ជូនយន្តហោះទាំងនេះទៅចូលរួមក្នុងសមយុទ្ធយោធារបស់សមាជិកបក្សសម្ព័ន្ធយោធាណាតូស្ថិតក្នុងក្របខណ្ឌយុទ្ធសាស្ត្ររបស់រដ្ឋាភិបាលក្រុងវ៉ាស៊ីនតោន។
វត្តមានយន្តហោះនិងកងទ័ពអាមេរិកនៅអាល្លឺម៉ងស្រាប់តែកើតមានឡើងស្របពេលដែលបណ្តាមេដឹកនាំអឺរ៉ុប និងភាគីពាក់ព័ន្ធមានរុស្ស៊ីនិងអ៊ុយក្រែនកំពុងតែជជែកពិភាក្សាគ្នាលើសំណុំរឿងអ៊ុយក្រែនយ៉ាងតឹងសរសៃកនៅក្នុងទីក្រុងMinsk ប្រទេសបេឡារ៉ុស។
បើតាមការអោយដឹងពីសំណាក់លោកChristopher Karnsអ្នកនាំពាក្យកងទ័ពជើងអាកាសអាមេរិក យន្តហោះទាំងនោះនឹងត្រូវពង្រាយទៅកាន់ប្រទេសមួយចំនួននៅអឺរ៉ុបខាងកើតដែលជាសមាជិកបក្សសម្ព័ន្ធយោធាណាតូក្រោមគម្រោងសមយុទ្ធយោធារួមគ្នាមួយ។
លោកបានសង្កត់ធ្ងន់ថា សមយុទ្ធយោធានិងការបញ្ជូនអាវុធយុទ្ធភ័ណ្ឌទៅអឺរ៉ុបដើម្បីចូលរួមលំហាត់យោធាជាផ្នែកមួយនៃគោលនយោបាយការបរទេសអាមេរិក និងឆ្លុះបញ្ចាំងពីកិច្ចខិតខំប្រឹងប្រែងរបស់រដ្ឋាភិបាលអាមេរិកក្នុងការរក្សាសន្តិសុខ សន្តិភាព និងស្ថិរភាពនៅតំបន់អឺរ៉ុបទាំងមូល។
វត្តមានយន្តហោះចម្បាំងនិងកងទ័ពអាមេរិកនៅអឺរ៉ុបខាងកើតដូចជាមិនមែនជារឿងថ្មីឡើយ ដ្បិតបន្ទាប់ពីវិបត្តិអ៊ុយក្រែនផ្ទុះឡើង អាមេរិកបានបញ្ជូននាវាពិឃាតកងទ័ព និងយន្តហោះជាច្រើនគ្រឿងទៅចូលរួចក្នុងសមយុទ្ធយោធាជាស៊េរីនៅអឺរ៉ុប។
យ៉ាងណាក៏ដោយការពង្រាយយន្តហោះចម្បាំងថ្មីនេះ កើតឡើងក្រោយពេលដែលរដ្ឋាភិបាលលោកអូបាម៉ា ដាក់ស្នើសុំទៅសភានូវសេចក្តីព្រាងច្បាប់ផ្តល់ជំនួយយោធាក្នុងទំហំទឹកប្រាក់ ១ពាន់លានដុលា្លរទៅកាន់ប្រទេសអ៊ុយក្រែន។ ក្នុងកញ្ចប់ថវិកា ១ពាន់លានដុល្លារនេះ អាមេរិកនឹងផ្គត់ផ្គង់សម្ភារៈយោធា អាវុធធ្ងន់ស្រាល ដល់កងទ័ពអ៊ុយក្រែន ប៉ុន្តែការផ្តល់អោយនេះកើតឡើងដរាបណាការចរចាគ្នារវាងប្រទេសពាក់ព័ន្ធបញ្ហាអ៊ុយក្រែនបរាជ័យក្នុងការបញ្ចប់វិបត្តិនៅទីនោះ។ ប៉ុន្តែចេតនាដ៏ល្អរបស់លោក អូបាម៉ា ក្នុងការបំពាក់អាវុធដល់កងទ័ពអ៊ុយក្រែន ត្រូវបានមេដឹកនាំអឺរ៉ុបជាពិសេសអធិការបតីអាល្លឺម៉ង់បដិសេធចោលអាល្លឺម៉ង់មិនចង់អោយអាមេរិកផ្តល់អាវុធដល់កងទ័ពអ៊ុយក្រែននោះឡើយ។
ទោះជាយ៉ាងនេះក្តី គេនៅចាំមើលការពិភាក្សាគ្នានៅក្នុងប្រទេសបេឡេរ៉ុសសិន បើការចរចាមានផ្លែផ្កាអាចបន្ថយកម្តៅនិងបញ្ចប់ការប្រយុទ្ធនៅភាគខាងកើតអ៊ុយក្រែន អាមេរិកប្រហែលជានឹងផ្លាស់ប្តូរបំណងផ្តល់សព្វាវុធដល់កងទ័ពអ៊ុយក្រែន៕
© រក្សាសិទ្ធិដោយ thmeythmey.com
