អន្តរជាតិ
នយោបាយអន្តរជាតិ
លោកអូបាម៉ាចង់ធ្វើសង្គ្រាមរយៈពេលបីឆ្នាំកម្ចាត់ក្រុមភេរវជនរដ្ឋឥស្លាម
×![]()
សំណើររបស់លោកប្រធានាធិបតីដើម្បីធ្វើសង្គ្រាមនៅក្នុងទីដីស៊ីរី និងអ៊ីរ៉ាក់តាមប្រមាញ់ក្រុមភេរវជនរដ្ឋឥស្លាម ត្រូវបានបញ្ជូនទៅកាន់សភារួចរាល់ហើយកាលពីម្សិលមិញនេះ។ គម្រោងធ្វើសង្គ្រាមប្រឆាំងក្រុមភេរវជនរដ្ឋឥស្លាមរបស់លោក មានរយៈពេលត្រឹមបីឆ្នាំប៉ុណ្ណោះ មានកំណត់ទំហំប្រតិបត្តិការ ហើយវាមិនចំណាយលុយច្រើនសន្ធឹកសន្ធាប់ និងត្រូវចំណាយជីវិតទ័ពអស់រាប់ពាន់នាក់ដូចសង្គ្រាមនៅអាហ្វហ្កានីស្ថាននិងអ៊ីរ៉ាក់កាលពីជាង១០ឆ្នាំមុនឡើយ។
មានសំឡេង
ប្រធានាធិបតីអាមេរិកលោក បារ៉ាក់ អូបាម៉ា កំពុងរង់ចាំការអនុញ្ញាតជាផ្លូវការពីសំណាក់សភាដែលដឹកនាំដោយសមាជិកគណបក្សសាធារណរដ្ឋ សម្រាប់ការធ្វើសង្គ្រាមរយៈពេលខ្លី និងមានកំណត់ ដើម្បីប្រឆាំងក្រុមរដ្ឋឥស្លាមនាពេលខាងមុខ។ គម្រោងធ្វើសង្គ្រាមដែលរៀបចំដោយរដ្ឋាភិបាលក្រុងវ៉ាស៊ីនតោននេះ មានរយៈពេលខ្លីត្រឹមបីឆ្នាំប៉ុណ្ណោះ ដោយអាមេរិកគ្មានយុទ្ធសាស្ត្រចំណាយលុយច្រើនសន្ធឹកសន្ធាប់ ចំណាយជីវិតកងទ័ពខ្លួនរាប់ពាន់នាក់ដូចកាលជាង ១០ឆ្នាំមុននោះឡើយ។
កម្ចាត់ក្រុមភេរវជនរដ្ឋឥស្លាមហាក់ដូចជាមិនមែនជាផលប្រយោជន៍សំខាន់របស់អាមេរិកទេ ហើយក្រុមនេះក៏មិនមែនជាគ្រោះថ្នាក់ខ្លាំងសម្រាប់អាមេរិកប៉ុន្មានដែរ។ ប៉ុន្តែប្រទេសអឺរ៉ុបឯណោះវិញទេដែលត្រូវព្រួយបារម្ភ និងរងគ្រោះដោយសារការកើនឡើងនៃចលនាក្រុមរដ្ឋឥស្លាមនេះ ព្រោះប្រជាជនអឺរ៉ុបរាប់ពាន់នាក់កំពុងធ្វើសង្គ្រាមជីហាតនៅមជ្ឈិមបូព៌ា។
បើទោះជាគេដឹងថាអាមេរិកមិនធ្វើសង្គ្រាមរយៈពេលវែងដើម្បីតាមប្រមាញ់ក្រុមភេរវជនរដ្ឋឥស្លាមក៏ដោយ ប៉ុន្តែបើតាមការអះអាងរបស់មន្ត្រីក្រុងវ៉ាស៊ីនតោន សង្គ្រាមនាពេលខាងមុខ មិនមានកំណត់ទីតាំងភូមិសាស្ត្រច្បាស់លាស់ឡើយ ដែលវាមានន័យថា អាមេរិកមិនមែនប្រើប្រាស់ទ័ពនៅត្រឹមស៊ីរី និងអ៊ីរ៉ាក់ឡើយ។ អាមេរិកទំនងជាជួយជ្រោមជ្រែងសម្ព័ន្ធមិត្ត ពិសេសរដ្ឋាភិបាលក្រុងបាដាដ អោយបើកការប្រយុទ្ធទ្រង់ទ្រាយធំជាងមុន ប្រឆាំងក្រុមសកម្មប្រយុទ្ធរដ្ឋឥស្លាម ព្រោះបច្ចុប្បន្នក្រុមភេរវជនទាំងនោះហាក់ថមថយកម្លាំង ស្ថិតក្នុងដំណាក់កាលវាយទប់ទល់ប៉ុណ្ណោះ។
ក្រៅពីនេះ លោកអូបាម៉ា ចង់ប្រើប្រាស់ទ័ពសម្រាប់រំដោះចំណាប់ខ្មាំង ឈ្លបយកការណ៍ និងគាំទ្រក្រុមកម្លាំងដែលប្រយុទ្ធនៅលើដី។ កាលពីម្សិលមិញនេះដែរ ប្រធានាធិបតីអាមេរិក បានថ្លែងដោយលោកសង្ឃឹមថា នឹងប្រើប្រាស់កងកម្លាំងពិសេសដើម្បីប្រមាញ់មេដឹកនាំកំពូលក្រុមភេរវជនរដ្ឋឥស្លាម ហើយលោកអំពាវនាវអោយសមាជិកសភាអាមេរិករួបរួមគ្នាជាធ្លុងមួយ ដើម្បីសម្រេចជ័យជម្នះលើក្រុមភេរវជនរដ្ឋឥស្លាមនេះ។
លោកបានសង្កត់ធ្ងន់ថា អាមេរិកមិនបណ្តែតបណ្តោយអោយក្រុមជ្រុលនិយមទាំងនោះ អាចបង្កបញ្ហាដល់ពិភពលោក និងរស់នៅដោយសុខសាន្តនៅក្នុងទឹកដីស៊ីរីនិងអ៊ីរ៉ាក់ឡើយ។ យ៉ាងណាក៏ដោយលោក អូបាម៉ា បានបញ្ជាក់ម្តងហើយម្តងទៀតថា អាមេរិកមិនត្រលប់ទៅធ្វើសង្គ្រាមនៅអ៊ីរ៉ាក់ និងផុងក្នុងសង្គ្រាមនៅមជ្ឈិមបូព៌ាជាថ្មីនោះឡើយ។
បើទោះជាសំណើរនេះ មិនមានគោលដៅធ្វើសង្គ្រាមទ្រង់ទ្រាយធំនៅស៊ីរី និងអ៊ីរ៉ាក់ក៏ដោយ សមាជិកសភាអាមេរិកមួយចំនួន បានរិះគន់លោក អូបាម៉ា រួចស្រេចទៅហើយ។ ពួកគេបានលើកឡើងថា បើរដ្ឋាភិបាលចង់សម្រេចជោគជ័យក្នុងការស្នើសុំធ្វើសង្គ្រាមប្រឆាំងក្រុមរដ្ឋឥស្លាម លោកអូបាម៉ា ត្រូវបង្ហាញយុទ្ធសាស្ត្រយោធាច្បាស់លាស់មួយដែលអាចបញ្ជាក់ថា សង្គ្រាមរយៈពេលខ្លីនេះមានប្រសិទ្ធភាពនិង អាចទទួលជ័យជម្នះលើកងកម្លាំងក្រុមភេរវជនទាំងនោះបាន៕
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
3 ថ្ងៃ
