អន្តរជាតិ
នយោបាយអន្តរជាតិ
×![]()
សហរដ្ឋអាមេរិកបានបដិសេធចោលពាក្យចចាមអារ៉ាមដែលថាអតីតនាយករដ្ឋមន្ត្រីថៃលោកស្រីយីងឡាក់ស៊ីនណាវ៉ាត្រាកំពុងតែស្នើរសុំសិទ្ធិជ្រកកោននយោបាយពីស្ថានទូតរបស់ខ្លួនខណៈដែលលោកស្រីរងការចោទប្រកាន់ពីតុលាការជាន់ខ្ពស់ថៃពីបទពុករលួយនៅក្នុងស្ថានប័នជាតិថៃ។ ពាក្យចចាមរ៉ាមនេះដែរកើតឡើងក្រោយក្បួនរថយន្តរបស់លោកស្រីយីងឡាក់ត្រូវបានទាហានថៃបង្អាក់ហើយឆែកឆេរដែលត្រូវបានមតិសាធារណៈចាត់ទុកថាវាជាការការពារលោកស្រីមិនអោយគេចខ្លួន។
អគ្គរដ្ឋទូតសហរដ្ឋអាមេរិកប្រចាំប្រទេសថៃលោកប៉ាទ្រិកម័រហ្វី (Patrick Murphy) បានច្រានចោលពាក្យចចាមរ៉ាមដែលលើកឡើងថាអតីតនាយករដ្ឋមន្ត្រីថៃលោកស្រីយីងឡាក់ស៊ីនណាវ៉ាត្រាកំពុងព្យាយាមគេចខ្លួនពីការចោទប្រកាន់តាមរយៈការសុំសិទ្ធិជ្រកកោនផ្នែកនយោបាយពីអាមេរិកខណៈពេលលោកស្រីកំពុងតែរងនូវការចោទប្រកាន់ពីតុលាការជាន់ខ្ពស់ថៃពីបទពុករលួយ។
ក្រោយពីសំណុំរឿងលោកស្រីយីងឡាក់ត្រូវបានដំណើរការនៅក្នុងនីតិវិធីរបស់តុលាការជាន់ខ្ពស់ថៃសកម្មភាពរបស់លោកស្រីទាំងអស់ត្រូវស្ថិតក្រោមការតាមដានរបស់អាជ្ញាធរថៃគ្រប់ពេលវេលានិងទីកន្លែង។ជាក់ស្តែងថ្មីៗនេះក្បួនឡានរបស់លោកស្រីត្រូវបានទាហានថៃដែលឈរជើងនៅខេត្តឈៀងម៉ៃបង្អាក់ដំណើរហើយត្រួតពិនិត្យ។ គេចាត់ទុកថាការឆែកឆេរ នេះជាសកម្មភាពទប់ស្កាត់លោកស្រីមិនអោយគេចខ្លួន។ប៉ុន្តែទាហានថៃបានបដិសេធថាវាជាការការពារសុវត្ថិភាពរបស់លោកស្រីនោះទេ។
បន្ថែមពីបញ្ហានេះក៏មានពាក្យចចាមអារាមបានលើកឡើងថាលោកស្រីយីងឡាក់កំពុងតែស្នើរសុំទៅស្ថានទូតអាមេរិកប្រចាំប្រទេសថៃ លើសិទ្ធិជ្រកកោនផ្នែកនយោបាយ។យ៉ាងណាមិញ លោកអគ្គរដ្ឋទូតមេរិកម័រហ្វីបានច្រានចោលការលើកឡើងនេះលោកបញ្ជាក់ថាមិនមានការស្នើរសុំណាមួយពីលោកស្រីយីងឡាក់នោះទេ។លើសពីនេះទៅទៀតសហរដ្ឋអាមេរិកមិនលូកដៃករកូករកាយបញ្ហានយោបាយរបស់ប្រទេសថៃនោះទេ។
ទោះបីយ៉ាងណាក៏ដោយអតីតរដ្ឋមន្ត្រីការបរទេសនិងជាប្រធានគណបក្សប្រជាធិបតេយ្យបានអះអាងថា បញ្ហាលោកស្រីយីងឡាក់ គឺមិនមានលក្ខណៈគ្រប់គ្រាន់ ដើម្បីទទួលបាននូវសិទ្ធិជ្រកកោនផ្នែកនយោបាយនោះទេ ព្រោះបច្ចុប្បន្នលោកស្រីកំពុងរងនូវការចោទប្រកាន់ដែលជាសំណុំរឿងព្រហ្មទណ្ឌ។
គួរបញ្ជាក់ផងដែរ បច្ចុប្បន្នលោកស្រី យីង ឡាក់ ក្រៅពីត្រូវគេដកមុខតំណែងសាធារណៈពីសំណាក់សភាជាតិថៃ និងរងការចោទប្រកាន់ពីតុលាការថៃនោះ លោកស្រី ត្រូវបានរដ្ឋាភិបាលលោកប្រាយុទ្ធ ចាន់ អូ ចា មិនអនុញ្ញាតអោយធ្វើដំណើរចេញទៅក្រៅប្រទេសនោះទេ ទោះបីជាក្នុងលក្ខខណ្ឌណាមួយក៏ដោយ៕
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
1 ថ្ងៃ
