អន្តរជាតិ
នយោបាយអន្តរជាតិ
កំណែទម្រង់ស៊ីជម្រៅរបស់ប្រាយុទ្ធ មិនអាចដោះស្រាយវិបត្តិនយោបាយបានឡើយ
× រយៈពេលជាង ៨ខែទៅហើយបើរាប់ចាប់តាំងពីព្រឹត្តការណ៍រដ្ឋប្រហារដោយយោធាជាថ្មីកើតឡើងនៅរាជាណាចក្រថៃ ក្រោមលេសបញ្ចប់វិបត្តិនយោបាយជាប់គាំងទៅមុខមិនរួច ប៉ុន្តែគេមិនទាន់ឃើញមានការផ្ទេរអំណាចទៅអោយរដ្ឋាភិបាលស៊ីវិលនៅឡើយទេ។
នាយករដ្ឋមន្ត្រីឡើងកាន់តំណែងដោយរដ្ឋប្រហារ ប្រាយុទ្ធ ចាន់អូចា បានអះអាងហើយថា ដរាបណាដំណើរកំណែទម្រង់ស៊ីជម្រៅមិនចាប់ ការផ្សះផ្សានយោបាយនិងដោះស្រាយវិបត្តិនយោបាយរកផ្លូវស្រាយមិនឃើញ ការផ្ទេរអំណាចនឹងមិនអាចកើតឡើងឡើយទោះមានការថ្កោលទោសឬរិះគន់ខ្លាំងពីសហគមន៍អន្តរជាតិក្តី។
កាលពីឆ្នាំមុន របបសឹកធ្លាប់សន្យាថានឹងផ្ទេរអំណាចទៅអោយរដ្ឋាភិបាលស៊ីវិលនៅចុងឆ្នាំ២០១៥ដោយការបោះឆ្នោត ស្រាប់តែក្រោយមកប្រកាសថាមិនមានការបោះឆ្នោតឡើយនៅឆ្នាំ ២០១៥។ ការបោះឆ្នោតអាចមាននៅឆ្នាំក្រោយព្រោះកំណែទម្រង់មិនទាន់ចប់។ គេមិនដឹងថា ការកែទម្រង់ស៊ីជម្រៅរបស់លោកប្រាយុទ្ធពិតជាមានផ្លែផ្ការកម្រិតណាសម្រាប់បញ្ចប់វិបត្តិនយោបាយរាំរ៉ៃ បង្រួបង្រួមសង្គមដែលបែកខ្ញែកគ្នាមានពណ៌លឿងពណ៌ក្រហមឡើយ។
សូមស្តាប់ការបកស្រាយរបស់លោក សៅ ផលនិស្ស័យ ទាក់ទិនបញ្ហានេះ
គ្មានឡើងការផ្ទេរអំណាចទៅអោយរដ្ឋាភិបាលស៊ីវិលដោយការបោះឆ្នោតសម្រាប់ឆ្នាំ ២០១៥នេះ។ នេះជាការលើកឡើងរបស់លោកប្រាយុទ្ធចាន់អូចាប្រមុខរបបសឹកក្រុងបាងកកដែលឡើងកាន់អំណាចដោយរដ្ឋប្រហារកាលពីខែឧសភាឆ្នាំ ២០១។ គេមើលឃើញថា រដ្ឋាភិបាលយោធារបស់ឧត្តមសេនីយ៍ប្រយុទ្ធនេះកំពុងប្រឹងប្រែងអនុវត្តយន្តការកំណែទម្រង់របស់ខ្លួន ដើម្បីសម្រេចអោយបាននូវការផ្សះផ្សានយោបាយ បង្រួបបង្រួមជាតិថៃ និងបញ្ចប់វិបត្តិនយោបាយក្នុងប្រទេសថៃបច្ចប្បន្ន។ បើកាលណាកំណែទម្រង់ចប់សព្វគ្រប់ត្រឹមត្រូវតាមការចង់បានរបស់ក្រុមយោធាហើយនោះ ម្ល៉េះគេនឹងរៀបចំបោះឆ្នោតផ្ទេរអំណាចទៅអោយរដ្ឋាភិបាលស៊ីវិលវិញជាក់ជាមិន ប៉ុន្តែមិនដឹងសំដីមេដឹកនាំរបបសឹកគួរអោយទុកចិត្តបានកម្រិតណាឡើយ។
ក្នុងសង្គមថា និយាយដល់ឈ្មោះឬពាក្យសម្តីនាយករដ្ឋមន្ត្រីថៃ ប្រាយុទ្ធ ចាន់អូចា មានប្រជាជនថៃខ្លះនាំគ្នាសើច ហើយចម្អកថា នាយករដ្ឋមន្ត្រីរូបនេះនិយាយច្រើន ប៉ុន្តែមិនធ្វើអ្វីបានដុំកំភួនសោះ។ ប្រជាជនខ្លះរិះគន់លោកឧត្តមសេនីយ៍ស្នេហារាជ្យបល្ល័ង្គថាជាមនុស្សមិនគួរអោយទុកចិត្ត និងនិយាយអោយតែរួចពីមាត់មិនគោរពពាក្យសន្យាឡើយ។ យ៉ាងណាក៏ដោយបើទោះជាប្រជាជនថៃខ្លះរិះគន់លោកឧត្តមសេនីយ៍ប្រាយុទ្ធក៏ពិតមែន ប៉ុន្តែគេឃើញរដ្ឋាភិបាលយោធានិងក្រុមប្រឹក្សាកំណែទម្រង់ប្រជាធិបតេយ្យថៃកំពុងតែមរមារញឹកអនុត្តគោលការណ៍ដែលខ្លួនកំណត់ដើម្បីសម្រេចអោយបាននូវការឯកភាពគ្នាផ្នែកនយោបាយក្នុងសង្គមថៃ។ គណកម្មាធិការចងក្រងនិងព្រាងរដ្ឋធម្មនុញ្ញថៃដុតដៃដុតជើង រៀបចំចងក្រងរដ្ឋធម្មនុញ្ញថ្មីដែលអាចធានាពីដំណើរជាប្រក្រតីនៃស្ថាប័ននយោបាយថៃបច្ចុប្បន្ន ហើយកាលពីសប្តាហ៍មុនគេបញ្ជូលតួនាទីគណកម្មាការកំណែទម្រង់ជាតិនៅក្នុងរដ្ឋធម្មនុញ្ញថ្មីរបស់ថៃថែមទៀត។
តាមពិតទៅ លែសធ្វើកំណែទម្រង់ស៊ីជម្រៅត្រូវការពេលយូររបស់មេដឹកនាំយោធាថៃ មិនធ្វើអោយគេឆ្ងល់ច្រើនឡើយ ដ្បិដរយៈពេលកាន់តែយូរកាន់តែល្អ ហើយរបបយោធាកាន់តែមានឱកាសគាស់រំលើងសែស្រឡាយឬបងប្អូនត្រកូលស៊ីណាវ៉ាត្រាចេញពីឆាកនយោបាយថៃ។ ដូចដែលឃើញស្រាប់ហើយ សំណុំរឿងពុករលួយអតីតនាយករដ្ឋមន្ត្រីយីងឡាក់ ស៊ីណាវ៉ាត្រា កំពុងស្ថិតក្នុងដំណើរការនៅឡើយ ក្រោយពេលដែលសភាអាយ៉ងលោក ប្រាយុទ្ធ បោះឆ្នោតចោទប្រកាន់លោកស្រី ក្រោមបទពុករលួយក្នុងគម្រោងទិញស្រូវអង្ករពីពលរដ្ឋថៃ។ បើសិនជាដំណើរការនីតិវិធីតុលាការបញ្ចប់ សម្រេចកាត់ទោសលោកស្រីអតីតនាយករដ្ឋមន្ត្រីខាងលើមែន លោកស្រីនឹងត្រូវចាកឆ្ងាយពីឆាកនយោបាយ និងត្រូវជាប់ពន្ធនាគារផងដែរ។ បើសិនរបបសឹកមិនបោសសម្អាតអោយស្អាតអស់ទេ កុំសង្ឃឹមថាមានបេក្ខជនមកគណបក្សផ្សេង ក្រៅពីគណបក្សភឿថៃអាចឈ្នះឆ្នោតសម្រាប់តំណែងនាយករដ្ឋមន្ត្រីអោយសោះ។
ក្រៅពីរៀបចំបោសសម្អាតអំពើពុករលួយដោយដាក់ពាក្យបណ្តឹងប្រឆាំងលោកស្រីយីងឡាក់ របបដឹកនាំយោធា និងគណកម្មាធិការប្រឆាំងអំពើពុករលួយថៃក៏ កំពុងឃ្លាំមើល ក៏ដូចជាដាក់ពាក្យបណ្តឹងប្រឆាំងអតីតសមាជិកសភាដែលអស់តំណែងក្រោយរដ្ឋប្រហារទាំង ២៦៩នាក់ផងដែរ។ បើតាមមើលភាគច្រើននៃសមាជិកសភាជាសមាជិកបក្សភឿថៃគាមទ្រលោកស្រីយីងឡាក់។ របបសឹកអះអាងថា ខ្លួនកំពុងគាស់រំលើងអោយអស់នូវអំពើពុករលួយដែលបន្សល់ទុកដោយរបបដឹកនាំមុន។ របបដឹកនាំនេះហាក់ដូចជាមានក្តីរំពឹង និងមានសុទិដ្ឋិនិយមខ្ពស់ចំពោះផែនការកំណែទម្រង់របស់ខ្លួនបច្ចុប្បន្ននេះ បើទោះជាមានការរិះគន់ខ្លាំងក៏ដោយ។ គេឆ្ងល់ថា គ្រាន់តែចាប់សត្វកណ្តុរមួយចាំបាច់ត្រូវដុតព្រៃទាំងមូល ដូចយោធាថៃធ្វើបច្ចុប្បន្នមែនទេ? ចុះបើ លោកប្រាយុទ្ធ និងអភិជនថៃមួយចំនួនពិតជាចង់បោសសម្អាតអំពើពុករលួយមែនហេតុម្តេច បំផ្លាញ និងធ្វើទុក្ខទោសតែសមាជិកនិងអ្នកគាំទ្រលោកស្រីយីងឡាក់។
អតីតមន្ត្រីជាន់ខ្ពស់នៃរដ្ឋាភិបាលថៃ និងអតីតតំណាងរាស្ត្រទាំងបក្សភឿថៃ និងបក្សប្រធិបតេយ្យ បានបង្ហាញការជំទាស់ និងរិះគន់គោលនយោបាយកំណែទម្រង់របស់ឧត្តមសេនីយ៍ប្រាយុទ្ធ និងរដ្ឋាភិបាលយោធាបច្ចុប្បន្ន។ ពួកគេបានលើកឡើងថា គេគ្មានជំនឿចិត្តបន្តិចសោះថាលោកប្រាយុទ្ធដាក់ចិត្តដាក់កាយកម្ចាត់អំពើពុករលួយ ប៉ុន្តែមិនមែនមានតែបក្សលោកស្រីយីងឡាក់ទេដែលប្រព្រឹត្តអំពើពុករលួយ មន្ត្រីច្រើននាក់មកពីបក្សធំៗទាំងពីរសុទ្ធតែប្រព្រឹត្តអំពើពុករលួយដូចគ្នា។ ក្រុមយោធាថៃប្រហែលជាកំពុងស្រមៃទាំងថ្ងៃ ថាគ្រាន់តែបញ្ចប់ឥទ្ធិពលស៊ីណាវ៉ាត្រា រារាំងមិនអោយលោកស្រីយីងឡាក់ចូលក្នុងឆាកនយោបាយ វានឹងបញ្ចប់បញ្ហាគ្រប់យ៉ាងក្នុងសង្គមថៃបច្ចុប្បន្នបានហើយ។
ផ្ទុយទៅវិញ ងាកទៅមើលការបោះឆ្នោតជ្រើសរើសរបបដឹកនាំស៊ីវិលវិញម្តង ក្នុងដំណើរទស្សនកិច្ចទៅជប៉ុនដើមខែកុម្ភៈ លោកប្រាយុទ្ធ ចាន់អូចារ បានប្រកាសថា លោកនឹងព្យាយាមបង្កើនល្បឿនដំណើរការកំណែទម្រង់ ប៉ុន្តែការបោះឆ្នោតត្រូវរៀបចំយ៉ាងឆាប់បំផុតក៏ចុងឆ្នាំនេះដែរ។ លោកបានប្រាប់ទៅប្រជាជនថៃ និងសហគមន៍អន្តរជាតិថា កុំព្រួយបារម្ភអោយសោះ យោធារបស់លោកនឹងដកខ្លួនទៅឆ្ងាយក្រោយរដ្ឋាភិបាលស៊ីវិលត្រូវបង្កើតឡើង។ ប៉ុន្តែអ្វីដែលគេមិនធ្លាប់រំពឹងសោះនោះ គឺលោក ប្រាយុទ្ធ បានបង្ហើបថា បើវិបត្តិនៅតែកើតមាន យោធានៅតែមានតួនាទីជួយដោះស្រាយ ដែលមានន័យថារដ្ឋប្រហារថ្ងៃ ២២ ឧសភាមិនមែនជារដ្ឋប្រហារចុងក្រោយសម្រាប់ថៃនោះឡើយ៕
© រក្សាសិទ្ធិដោយ thmeythmey.com