កម្ពុជាឈ្នះការប្រកួតកម្តៅសាច់ដុំ ខណៈជំនួបផ្លូវការនឹងចាប់ផ្តើមនៅថ្ងៃទី១២ ខែមិនា

កីឡាជាតិ

កម្ពុជាឈ្នះការប្រកួតកម្តៅសាច់ដុំ ខណៈជំនួបផ្លូវការនឹងចាប់ផ្តើមនៅថ្ងៃទី១២ ខែមិនា

01, Mar 2015 , 11:31 am

រូបភាព

ប្រធានក្រុម ឃួន ឡាបូរ៉ាវី អបអរគ្រាប់បាល់បញ្ចូលទីរបស់ខ្លួនដោយដាក់ធ្វើជាបេះដូង ដើម្បីបង្ហាញពីការស្រឡាញ់ទៅកាន់អ្នកគាំទ្រ

ដោយ: រួបរួម

ក្រុមកីឡាបាល់ទាត់ជម្រើសជាតិកម្ពុជា បានទទួលជ័យជម្នះ ៣-០ លើក្រុមកីឡាករសិង្ហបុរីដែលភាគច្រើនត្រូវបានជ្រើសរើសចេញពីឈុត U-22 នាជំនួបមិត្តភាពកម្តៅសាច់ដុំ កាលពីរសៀលថ្ងៃទី២៨ ខែកុម្ភៈ ឆ្នាំ២០១៥ នៅកីឡដ្ឋានខេត្តស្វាយរៀង។ នេះជាការប្រកួតជាមួយក្រុមក្រៅស្រុកតែមួយលើកគត់នៅក្នុងឆ្នាំ២០១៥នេះ នៅមុនជំនួបជាមួយម៉ាកាវ ក្នុងព្រឹត្តិការណ៍ជម្រុះ World Cup ឆ្នាំ២០១៨ ។

នៅក្នុងការប្រកួតមិត្តភាពកម្តៅសាច់ដុំនោះ គ្រូបង្វឹកកូរ៉េខាងត្បូង លោក Lee Tae Hoon បានដាក់អ្នកចាំទីប្រាក់ ភារុណ នៃក្លិបអគ្គស្នងការដ្ឋាននគរបាលជាតិឲ្យស្ថិតក្នុងជម្រើសដំបូង ខណៈខ្សែប្រយុទ្ធបឹងកេតអង្គរ ឃួន ឡាបូរ៉ាវី មានតួនាទីជាប្រធានក្រុម។ ក្នុងការប្រកួតទាំងមូល លោកបានធ្វើការផ្លាស់ប្តូរកីឡាករចំនួន៦នាក់។

(ជម្រើស១១នាក់ដំបូង)

ខ្សែបម្រើ ប្រាក់ មុន្នីឧត្តម រកគ្រាប់បាល់បើកឆាកនៅនាទី ទី៨ ហើយប្រធានក្រុម ឃួន ឡាបូរ៉ាវី រកបានគ្រាប់ទីពីរនៅក្នុងនាទី ទី២៧ មុនពេលដែលឧត្តម បន្ថែមគ្រាប់ទី២របស់ខ្លួននៅ៦នាទី មុននឹងបញ្ចប់ការប្រកួតតង់ទីមួយ។

នៅថ្ងៃទី១២ ខែមិនា ឆ្នាំ២០១៥ ខាងមុខនេះ កម្ពុជាត្រូវស្វាគមន៍ក្រុមម៉ាកាវ នៅកីឡដ្ឋានស្តាតចាស់ នាការប្រកួតជម្រុះជើងទីមួយក្នុងដំណើរឆ្ពោះទៅកាន់ព្រឹត្តិការណ៍ World Cup ឆ្នាំ២០១៨ នៅរុស្ស៊ី។ នៅថ្ងៃទី១៧ ខែមិនា កម្ពុជាត្រូវធ្វើដំណើរទៅជួបម៉ាកាវវិញនៅកីឡដ្ឋានEstádio Campo Desportivo៕