អន្តរជាតិ
នយោបាយអន្តរជាតិ
ឆាតនិងនីហ្សេផ្តើមកម្ទេចក្រុម Boko Haram ដែលភ្ជាប់បណ្តាញក្រុមរដ្ឋឥស្លាម
×![]()
ដោយ: ថ្មីៗ
កងកម្លាំងឆាត និងនីហ្សេ ចាប់ផ្តើមបើកប្រតិបត្តិការសឹកជើងគោក និងជើងអាកាសដើម្បីកម្ទេចក្រុមភេរជនរដ្ឋឥស្លាមនៅក្នុងទឹកដីប្រទេសនីហ្សេរីយ៉ា។ កងកម្លាំងរដ្ឋអាហ្វ្រិកបានដណ្តើមទឹកដីមកវិញជាច្រើន ហើយការឈានទៅកម្ទេចក្រុមភេរវជន បូកូហារ៉ាម នេះកើតឡើងក្រោយក្រុមនេះប្រកាសចុះចូលជាមួយក្រុមរដ្ឋឥស្លាមនៅស៊ីរី អ៊ីរ៉ាក់ និងលីប៊ី។
ម្សិលមិញនេះ កងទ័ពរដ្ឋាភិបាលឆាត និងនីហ្សេ បានសហការគ្នាបើកការវាយប្រហារតាមផ្លូវគោក និងផ្លូវអាកាសដើម្បីកម្ទេចក្រុមភេរវជនរដ្ឋឥស្លាមនៅក្នុងប្រទេសនីហ្សេរីយ៉ា។ ប្រទេសទាំងពីរបានបើកការវាយប្រហារយ៉ាងសស្រាក់សស្រាំដើម្បី បណ្តេញក្រុមភេរវជនបូកូហារ៉ាមចេញពីតំបន់ដែលពួកគេដណ្តើមកាន់កាប់បាន។
ការសម្រេចបញ្ជូនទ័ពទៅច្បាំងកម្ទេចក្រុមរដ្ឋឥស្លាមនេះកើតឡើង ប៉ុន្មានថ្ងៃក្រោយក្រុមបូកូហារ៉ាមនេះ ប្រកាសចុះចូលជាមួយក្រុមភេរវជនដ៏សាហាវនៅអ៊ីរ៉ាក់ លីប៊ី និងស៊ីរី រដ្ឋឥស្លាម។ ហើយការវាយប្រហារនេះដែរកើតឡើងក្រោយសហភាពអាហ្វ្រិកសម្រេចអនុញ្ញាតអោយបង្កើតកងកម្លាំងពិសេសមានទ័ព ១ម៉ឺននាក់ដើម្បីប្រយុទ្ធកម្ទេចក្រុមបូកូហារ៉ាមកាលពីថ្ងៃសុក្រផងដែរ។
ប្រទេសជិតខាងនីហ្សេរីយ៉ា មានកាម៉េរូ នីហ្សេ និងឆាតផង សុទ្ធតែប្រឈមមុខនឹងបញ្ហាសន្តិសុខដោយសារក្រុមបូកូហារ៉ាមនេះ ហើយពួកគេពិបាកបង្កើតទំនាក់ទំនងពាណិជ្ជកម្មជាមួយគ្នាថែមទៀតដោយសារក្រុមភេរជនទាំងនេះ។ បើសិនប្រទេសទាំងនេះអាចយកឈ្នះ ក្រុមភេរវជនបូកូហារ៉ាមបាន វានឹងជួយអោយការបង្កើតទំនាក់ទំនងពាណិជ្ជកម្មតាមព្រំដែនអាចប្រព្រឹត្តទៅបានងាយស្រួល និងទប់ស្កាត់បាននូវបញ្ហាអស្ថិរភាពនៅក្នុងតំបន់ផង។ បើបណ្តែតបណ្តោយអោយក្រុមនេះធ្វើស្រេចតែចិត្តគ្មានចំណាត់ការទប់ស្កាត់និងកម្ចាត់ចោលទេ អាហ្វ្រិកទាំងមូលអាចប្រឈមមុខបញ្ហាសន្តិសុខកាន់តែធ្ងន់ធ្ងរ៕
© រក្សាសិទ្ធិដោយ thmeythmey.com
