ជាតិ
នយោបាយជាតិ
លោក ញឹក ប៊ុនឆៃ ថា ហ៊្វុនស៊ិនប៉ិចនឹងលែងឈ្លោះគ្នាទៀតហើយ
× ភ្នំពេញ៖ ជម្លោះគណបក្សហ៊្វុនស៊ិនប៉ិចបានកើតឡើងតាំងពីអាណត្តិទី១ដល់អាណត្តិទី៥នៃរាជរដ្ឋាភិបាលកម្ពុជា។ ជម្លោះនេះ បានធ្វើអោយគណបក្សហ៊្វុនស៊ិនប៉ិចដែលធ្លាប់ដឹកនាំប្រទេស ក្លាយទៅជាគណបក្សដែលគ្មានកៅអីនៅក្នុងរដ្ឋសភាជាតិនៅពេលនេះ។ ដើម្បីបង្កើតបរិយាកាសសុខដុមរម្យនីយកម្មក្នុងគណបក្សឡើងវិញ លោក ញឹក ប៊ុនឆៃ ថា ហ៊្វុននស៊ិនប៉ិចនឹងលែងឈ្លោះគ្នាទៀតហើយចាប់ពីពេលនេះតទៅ។
«ខ្ញុំប្រាកដថា វានឹងគ្មានបញ្ហាអ្វីទៀតឡើយ។ យើងត្រូវបង្រួបបង្រួមគ្នាដើម្បីកសាងប្រជាប្រិយភាព និងទទួលការគាំទ្រឡើងវិញ។ បើយើងរួបរួមគ្នាជាមួយនឹងសំឡេងគាំទ្រនៅសេសសល់ ខ្ញុំសង្ឃឹមថា យើងនឹងរកឃើញសញ្ញាបូកនាការបោះឆ្នោតលើកក្រោយទៀត»។ នេះគឺជាការថ្លែងបញ្ជាក់សារជាថ្មីនៅថ្ងៃអាទិត្យនេះ របស់លោក ញឹក ប៊ុនឆៃ អនុប្រធានទី២នៃគណបក្សហ៊្វុនស៊ិនប៉ិច ក្រោយកំណែទម្រង់ដឹកនាំដោយព្រះអង្គម្ចាស់នរោត្តម រណឫទ្ធិ និងបន្ទាប់ពីលោក ប៉ះសម្តីគ្នាខ្លះជាមួយព្រះអង្គម្ចាស់ រណឫទ្ធិ ទាក់ទងនឹងការរៀបចំរចនាសម្ព័ន្ធគណបក្សហ៊្វុននស៊ិនប៉ិចថ្មី។
លោក ញឹក ប៊ុនឆៃ បានពន្យល់ប្រាប់ថា នៅក្នុងគណបក្សប្រជាធិបតេយ្យ ការបញ្ចេញមតិខុសគ្នាវាជារឿងធម្មតាទេ។ អ្វីដែលសំខាន់ គឺត្រូវគោរពមតិភាគច្រើន។ «យើងមិនឈ្លោះគ្នាទេ តែជាការបញ្ចេញយោបល់តែប៉ុណ្ណោះ។ កន្លងមក ខ្ញុំបញ្ចេញយោបល់ផ្ទាល់ខ្លួន តែខ្ញុំគោរពការសម្រេចរបស់អង្គប្រជុំ»។ នេះគឺជាបន្ថែមរបស់លោក ញឹក ប៊ុនឆៃ។
ប្រភពពីគណបក្សហ្វ៊ុនស៊ិនប៉ិចបានអោយដឹងថា លោក ញឹក ប៊ុនឆៃ និងព្រះអង្គម្ចាស់នរោត្តម រណឫទ្ធិ តែងតែមានទស្សនៈខុសគ្នានៅក្នុងការដឹកនាំគណបក្សហ្វ៊ុនស៊ិនប៉ិច។ មិនត្រឹមតែប៉ុណ្ណោះ លោក ញឹក ប៊ុនឆៃ ក៏ជាឥស្សរជនម្នាក់ដ៏មានឥទ្ធិលពលនៅក្នុងបក្សហ៊្វុនស៊ិនប៉ិចដែរ។
គណបក្សហ៊្វុនស៊ិនប៉ិចត្រូវបានបង្កើតឡើងដោយសម្តេចព្រះបាទនរោត្តម សីហនុ នៅឆ្នាំ១៩៨១ និងក្រោយមកនៅអំឡុងដើមទសវត្សរ៍៩០ គណបក្សត្រូវដឹកនាំបន្តដោយព្រះអង្គម្ចាស់ រណឫទ្ធិ ពីឆ្នាំ១៩៩២ដល់ឆ្នាំ២០០៦ ។ កាលពីឆ្នាំ១៩៩៣ គណបក្សហ្វ៊ុនស៊ិនប៉ិច គឺជាគណបក្សឈ្នះឆ្នោតដឹកនាំប្រទេស ដោយទទួលបានអាសន្នៈចំនួន៥៨កៅអី ៤៣កៅអីនៅឆ្នាំ១៩៩៨ ២៦កៅអីនៅឆ្នាំ២០០៣ ២កៅអីនៅឆ្នាំ២០០៨ តែនៅក្នុងអាណត្តិទី៥កន្លងមកនេះ(២០១៣) ហ្វ៊ុនស៊ិនប៉ិចទទួលបានសូន្យកៅអី។ ការធ្លាក់ចុះនេះ គឺបណ្តាលមកពីមួយផ្នែកជម្លោះផ្ទៃក្នុងគណបក្ស៕
© រក្សាសិទ្ធិដោយ thmeythmey.com