អន្តរជាតិ
ឥណ្ឌា៖ កូនក្រមុំដើរចេញពីរោងការ ដោយសារកូនកំលោះមិនចេះបូកលេខ “១៥+៦=១៧”
×
កូនក្រមុំនៅក្នុងប្រទេសឥណ្ឌាម្នាក់ បានសម្រេចចិត្តដើរចេញពីពិធីមង្គលការរបស់នាងបន្ទាប់ពីអនាគតស្វាមីរបស់នាង គ្មានសមត្ថភាពក្នុងការដោះស្រាយលំហាត់គណិតវិទ្យាដ៏សាមញ្ញ បំផុតមួយ។ នៅក្នុងពិធីរៀបការនោះ កូនក្រមុំបានសាកល្បងលើជំនាញផ្នែកគណិតវិទ្យារបស់កូនកំលោះ ដោយសួរថា ១៥+៦ ស្មើនឹងប៉ុន្មាន? ប៉ុន្តែកូនកំលោះបានឆ្លើយថា ១៧ទើបធ្វើឲ្យនាងដើរចេញពិធីរៀបការនោះភ្លាមៗតែម្ដង។
យោងតាមការផ្សាយរបស់កាសែត New York Post ហេតុការណ៍ខាងលើនេះបានកើតឡើងនៅក្នុងភូមិRasoolabadជិតទីក្រុងឧស្សាហកម្ម Kanpur នៅរដ្ឋ Uttar Pradesh ភាគខាងជើងប្រទេសឥណ្ឌា។ បន្ទាប់ពីកូនក្រមុំសម្រេចចិត្តដើរចេញពីរោងការរួចមក ក្រុមគ្រួសាររបស់កូនកំលោះបានព្យាយាមបញ្ចុះបញ្ចូលកូនក្រមុំឲ្យត្រឡប់មកវិញ ប៉ុន្តែនាងបានបដិសេធព្រោះនាងយល់ថា ក្រុមគ្រួសារខាងកូនកំលោះបានកុហកនាងអំពីការអប់រំរបស់កូនកំលោះ។
លោក Mohar Singh ជាឪពុកកូនក្រមុំបានឱ្យដឹងថាគ្រួសារខាងកូនកំលោះព្យាយាមលាក់មិនឲ្យយើងដឹង ពីការអប់រំក្រីក្ររបស់កូនប្រុសពួកគាត់ព្រោះសូម្បីតែក្មេងថ្នាក់ទី១ ក៏អាចឆ្លើយលំហាត់គណិតវិទ្យាមួយនេះបានដែរ។
ប៉ូលិសក្នុងតំបន់បានសម្របសម្រួលរវាងក្រុមគ្រួសារនិងភាគីទាំងពីរ ហើយបានប្រគល់អំណោយនិងគ្រឿងអលង្ការទាំងអស់ទៅឲ្យភាគីទាំងសងខាងវិញ។
អាពាហ៍ពិពាហ៍ភាគច្រើននៅក្នុងប្រទេសឥណ្ឌាត្រូវបានរៀបចំឡើងដោយក្រុមគ្រួសារខាងកូនក្រមុំនិងកូនកំលោះដោយគូស្វាមីភរិយាកម្រនឹងបានស្គាល់គ្នាមុនពេលរៀបការណាស់ ហេតុនេះហើយទើបមានរឿងរ៉ាវចម្លែកៗ ជាច្រើនបានក់តឡើងនៅក្នុងពិធីរៀបការក្នុងប្រទេសនេះ៕
© រក្សាសិទ្ធិដោយ thmeythmey.com