ជាតិ
សេដ្ឋកិច្ច
តួកគីនឹងជំរុញឲ្យពាណិជ្ជកម្មទ្វេភាគីកើនឡើងដល់៥០០លានដុល្លារនៅឆ្នាំ២០២០
×
ភ្នំពេញ៖ រដ្ឋមន្ត្រីការបរទេសតួគី លោក មេវលូត កាវូសូគ្លូ (MEVLUT CAVUSO GLU) នឹងជំរុញឲ្យទំហំពាណិជ្ជកម្មទ្វេភាគីកម្ពុជា និងតួគីឱ្យកើនឡើងដល់៥០០លានដុល្លារអាម៉េរិក ត្រឹមឆ្នាំ២០២០ខាងមុខនេះ។ ការថ្លែងរដ្ឋមន្ត្រីការបរទេសតួកគីបែបនេះគឺធ្វើឡើង នៅក្នុងជំនួបពិភាក្សាជាមួយប្រធានរដ្ឋសភា លោក ហេង សំរិន កាលពីថ្ងៃទី១៦មិនា នៅវិមានសន្តិភាព ។
លោក កែវ ពិសិដ្ឋ នាយកខុទ្ទកាល័យ និងជាអ្នកនាំពាក្យប្រធានរដ្ឋសភា បានបញ្ជាក់ថា លោករដ្ឋមន្ត្រីការបរទេសតួគី បានលើកឡើងពីការទំនាក់ទំនងកិច្ចសហប្រតិបត្តិការរវាងកម្ពុជានិងតួគីដើម្បីពង្រឹងលើគ្រប់វិស័យប្រទេសទាំងពីរ ទាំងវិស័យនយោបាយ សេដ្ឋកិច្ចនិងវេទិការអន្តរជាតិនានា ។ ទន្ទឹមនឹងនេះតួគី ក៏នឹងពង្រីកកិច្ចសហប្រតិបត្តិការទ្វេភាគី ជាមួយកម្ពុជាឱ្យបានដល់ទំហំទឹកប្រាក់ ៥០០លានដុល្លារអាមេរិកចាប់ពីពេលឆ្នាំ២០១៥នេះ រហូតដល់ឆ្នាំ២០២០ ។
លើសពីនេះរដ្ឋមន្ត្រីការបរទេសតួកគី ក៏នឹងជំរុញឱ្យមានការហោះហើរត្រង់រវាងប្រទេសកម្ពុជា ដើម្បីកំណើនទេសចរ វិនិយោគ និងវិស័យពាណិជ្ជកម្មប្រទេសទាំងពីរកើនឡើងថែមទៀត។
ជាមួយគ្នានេះ ប្រធានរដ្ឋសភា លោក ហេង សំរិន ស្នើតបតាមរយៈរដ្ឋមន្ត្រីក្រសួងការបរទេសតួគីឱ្យជួយជំរុញលើកទឹកចិត្ត ដល់ផ្នែកឯកជនទេសចរណ៍ពីតួគីមកកម្ពុជាឱ្យបានច្រើនថែមទៀត ក៏ដូចជាការរៀបចំការហោះហើរត្រង់កម្ពុជា ដើម្បីបង្កើនវិស័យពាណិជ្ជកម្ម វិនិយោគជាដើម ៕
© រក្សាសិទ្ធិដោយ thmeythmey.com