ជាតិ
សាលារាជធានីនឹងបិទផ្សាយលទ្ធផលវាយតម្លៃបឋមនៅបុរីកីឡាជាសាធារណៈ
×
ភ្នំពេញ៖ នៅថ្ងៃទី២០ ខែមីនាខាងមុខនេះ អាជ្ញាធរសាលារាជធានីភ្នំពេញនឹងបិទផ្សាយជា សាធារណៈ នូវលទ្ធផលនៃវាយតម្លៃបឋមរបស់ក្រុមការងារសាលារាជធានីភ្នំពេញ បន្ទាប់ពី ការតវ៉ាទាមទារសំណងជំងឺចិត្ត និងរកដំណោះស្រាយពីការបណ្តេញពីលំនៅដ្ឋានរបស់ សហគមន៍បុរីកីឡាកាលពីឆ្នាំ ២០១២កន្លងមកជាបន្តបន្ទាប់ ។
យោងតាមសេចក្តីជូនដំណឹងចុះថ្ងៃទី១៧ មីនានេះ សាលារាជធានីភ្នំពេញនឹងបិទផ្សាយលទ្ធ ផលវាយតម្លៃបឋមប្រជាជនក្នុងសហគមន៍បុរីកីឡា ចាប់ពីថ្ងៃទី២០ រហូតដល់ថ្ងៃទី៣០ ខែមីនា ឆ្នាំ២០១៥ នៅសាលាខណ្ឌ៧មករា។
ចំពោះពលរដ្ឋដែលពុំឯកភាពនឹងលទ្ធផលនៃការវាយតម្លៃលក្ខណៈសម្បត្តិរបស់គ្រួសារនីមួយៗនេះ សាលារាជធានីភ្នំពេញ បានទុករយៈពេលពិនិត្យតវ៉ារហូតដល់ថ្ងៃទី៣០ ខែមេសា ឆ្នាំ២០១៥ ។
ទាក់ទិននឹងដំណោះស្រាយបញ្ហានេះដែរ អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ បានសរសេរលើគណនីហ្វេសប៊ុកថា៖«ជាដំណាក់កាលចុងក្រោយនៃដំណោះស្រាយ បញ្ចប់បញ្ហានេះ»។
គួររម្លឹកថា កន្លងមក តំណាងប្រជាពលរដ្ឋក្នុងសហគមន៍បុរីកីឡាបានតវ៉ាទាមទារឲ្យសាលា រាជធានីភ្នំពេញរកដំណោះស្រាយផ្តល់សំណងជំងឺចិត្តដល់ពលរដ្ឋជាង ១០០គ្រួសារ ដែលមានវិវាទជាមួយក្រុមហ៊ុនផានអ៊ីម៉ិច កាលអំឡុងឆ្នាំ ២០១២ ។ ពួកគេអះអាងថា ក្រុមហ៊ុនដែលទទួលសិទ្ធិអភិវឌ្ឍន៍ពីរដ្ឋាភិបាលមួយនេះ បានបណ្តេញពួកគេចេញពីលំនៅ ដ្ឋាន ដោយពុំបានផ្តល់សំណងអ្វីទាំងអស់៕
© រក្សាសិទ្ធិដោយ thmeythmey.com