អន្តរជាតិ
ប្រជាជនសិង្ហបុរីអាចគោរពវិញ្ញាណក្ខន្ធលោក លី កា្វន់យូ បានបីថ្ងៃ
× ពិធីកាន់ទុក្ខបុណ្យសពបីតាស្ថាបនិកប្រទេសសិង្ហបុរីត្រូវរៀបចំឡើងរយៈពេល១សប្តាហ៍ចាប់ពី២៣នេះរហូតដល់ថ្ងៃ ២៩ខែមីនា។ ប្រជាជនសិង្ហបុរីទូទៅ និងបណ្តាសាធារណជនទាំងឡាយណាដែលចង់សម្តែងការគោរពដល់វិញ្ញណក្ខន្ធលោក ដោយសាកសព លោកត្រូវដង្កល់ទុកនៅវិមានរដ្ឋសភាសិង្ហបុរី។ រាល់ទង់ជាតិនៅតាមបណ្តាស្ថាប័នសាធារណទាំងអស់នឹងត្រូវគេបង្ហូតមកត្រឹមពាក់កណ្តាលដងដើម្បីចូលរួមមរណទុក្ខ។
នាយករដ្ឋមន្ត្រីសិង្ហបុរីបានប្រកាសពីរយៈពេលនៃការកាន់ទុក្ខបុណ្យសពរបស់បីតាស្ថាបនិកសិង្ហបុរីលោក លី ក្វាន់យូរ ដោយរយៈពេលនៃការកាន់ទុក្ខនឹងត្រូវចាប់ផ្តើមពីថ្ងៃ ២៣ដល់ថ្ងៃ ២៩ខែមិនា។ ក្នុងរយៈពេលដែលកាន់ទុក្ខនេះរាល់ស្ថាប័នរដ្ឋាភិបាលទាំងអស់នឹងត្រូវបង្ហូតទង់ជាតិត្រឹមពាក់កណ្តាលដងដើម្បីបង្ហាញពីការកាន់ទុក្ខរបស់រដ្ឋសិង្ហបុរីទាំងមូល។
បើតាមការអោយដឹងពីមន្ត្រីរដ្ឋាភិបាល សាកសពរបស់មេដឹកនាំរូបនេះនឹងត្រូវគេយកទៅតម្កល់នៅក្នុងវិមានរដ្ឋសភា ដើម្បីផ្តល់ឱកាសអោយបណ្តាប្រជាជាតិសិង្ហបុរី និងសាធារណជនពីទីជិតឆ្ងាយអាចសម្តែងការដឹងគុណ និងគោរពដល់វិញ្ញាណក្ខន្ធលោកជាចុងក្រោយផង។ ពេលវេលាសម្រាប់ចូលរួមគោរពវិញ្ញាណក្ខន្ធលោក គឺចាប់ពីម៉ោង ១០ព្រឹកដល់ម៉ោង ៨យប់ រាល់ថ្ងៃចាប់ពីថ្ងៃពុធដល់ថ្ងៃសៅរ៍។
ចំណែកកម្មវិធីបុណ្យសពជាផ្លូវការនឹងត្រូវប្រារព្ធឡើងនៅថ្ងៃអាទិត្យ ដែលក្នុងពិធីជាផ្លូវការនេះនឹងមានការចូលរួមពីក្រុមគ្រួសារលោក លី ក្វាន់យូ មិត្តភក្តិ បុគ្គលិក ប្រធានាធិបតីសិង្ហបុរី សមាជិកគណរដ្ឋមន្ត្រី សមាជិកសភា មន្ត្រីរាជការជាន់ខ្ពស់ មេដឹកនាំកំពូលដែលកាន់តំណែងជំនាន់លោក លី ក្វាន់យូរ និងប្រជាជនសិង្ហបុរីទូទៅ។
គួរបញ្ជាក់ថាអតីតនាយករដ្ឋមន្ត្រីសិង្ហបុរីលោក លី ក្វាន់យូរ បានស្លាប់បាត់បង់ជីវិតនៅថ្ងៃចន្ទនេះក្នុងវ័យ ៩១ឆ្នាំ ដោយសារមានជំងឺសួត។
© រក្សាសិទ្ធិដោយ thmeythmey.com