អន្តរជាតិ
នយោបាយអន្តរជាតិ
×![]()
ក្បួនកងទ័ពរដ្ឋាភិបាលក្រុងវ៉ាស៊ីនបានបញ្ចប់ដំណើររបស់ខ្លួនក្រោយជិះឆ្លងកាត់តាមប្រទេសមួយចំនួននៅតំបន់អឺរ៉ុបខាងកើត។កងទ័ពអាមេរិកនៅអឺរ៉ុបខាងកើតធ្វើសមយុទ្ធយោធាជាមួយសមាជិកបក្សសម្ព័ន្ធណាតូនិងវត្តមានកងទ័ពអាមរិកដើម្បីចង់បញ្ជាក់ពីជំហររបស់ក្រុងវ៉ាស៊ីនតោននៅអឺរ៉ុបប្រឆាំងរុស្ស៊ី។ប៉ុន្តែគួរអោយសោកស្តាយដែលមានចលនាបាតុកម្មជាច្រើនប្រឆាំងវត្តមានកងទ័ពអាមេរិកនៅអឺរ៉ុបខាងកើត។
រឿន ភារុន រាយការណ៍ព័ត៌មានលម្អិត
ក្រោយពេលរុស្ស៊ីក្រសោបយកទឹកដីឧបទ្វីប Crimea ពីអ៊ុយក្រែន សហរដ្ឋអាមេរិក និងសម្ព័ន្ធមិត្តជាសមាជិកបក្សសម្ព័ន្ធយោធាណាតូបន្តធ្វើសមយុទ្ធយោធានៅអឺរ៉ុបខាងកើតឥតឈប់ឈរ។ សហរដ្ឋអាមេរិកបន្តបញ្ជូនសព្វាវុធ កងទ័ព ប្រឹក្សាយោធា ទៅកាន់អ៊ុយក្រែននិងទៅចូលរួមធ្វើសមយុទ្ធដោយព្យាយាមបង្ហាញពីតួនាទីរបស់ខ្លួនក្នុងការរក្សាសន្តិសុខក្នុងតំបន់។
កាលពីថ្មីៗនេះ គេឃើញក្បួនរថយន្តយោធាអាមេរិកបើកឆ្លងកាត់បណ្តាប្រទេសមួយចំនួននៅអឺរ៉ុបខាងកើតដើម្បីបញ្ជាក់ថាខ្លួននៅចាំគាំទ្រ និងរក្សាសន្តិសុខនៅក្នុងតំបន់អឺរ៉ុបខាងកើតនិងអឺរ៉ុបទាំងមូល។ ក្បួនរថយន្តរាប់រយគ្រឿងនិងកងកម្លាំងរាប់ពាន់នាក់ចូលរួមក្នុងព្យុះហយាត្រាយោធានេះ ហើយគេដឹងថាចម្ងាយក្បួនយោធានេះបើកឆ្លងកាត់ប្រទេសប្រាំដែលមានចម្ងាយ ១៧៧០ គីឡូម៉ែត្រ ក្នុងនោះមានអេស្តូនី លីទុយអានី ប៉ូឡូញ ឡេតូនី និងសាធារណរដ្ឋឆេក។
ក្នុងពេលដែលក្បួនយោធាឆ្លងកាត់ គេសង្កេតឃើញមានប្រជាជនខ្លះកាន់ទង់ជាតិប្រទេសរបស់ពួកគេនិងទង់សហរដ្ឋអាមេរិក ដែលនេះបញ្ជាក់ថាពួកគេស្វាគមន៍វត្តមានយោធាអាមេរិកនៅលើទឹកដីរបស់ពួកគេ។ ប៉ុន្តែក្រៅពីមានប្រជាជនស្វាគមន៍ គេក៏សង្កេតឃើញមានចលនាបាតុកម្មផុសផុល ប្រឆាំងនឹងវត្តមានកងទ័ពនិងសព្វាវុធអាមេរិកនៅតំបន់អឺរ៉ុបខាងកើតដូចគ្នាដែរ។ ក្នុងចលនាបាតុម្មនេះ ក្រុមបាតុករបានលើកបដាដែលបង្ហាញពីការមិនពេញចិត្តចំពោះវត្តមានកងទ័ពអាមេរិក ដោយក្នុងនោះមានការប្រើប្រាស់ពាក្យបញ្ចើចបញ្ចើរទាហានអាមេរិកផង។ សកម្មជនមួយចំនួនមកពីប្រទេសឆេកបានលើកបដាដែលមានលើកឡើងថា៖« រថក្រោះ! ទេ អគុណហើយ! អញ្ជើញទៅផ្ទះអ្នកវិញទៅ គ្មានអ្នកណាម្នាក់ត្រូវការឡើយ»។
បើតាមអ្នកដែលប្រឆាំងលំហាត់យោធាអាមេរិក និងវត្តមានយោធានេះ បានបញ្ជាក់ថា បច្ចុប្បន្នមិនមែនជាសម័យសង្គ្រាមត្រជាក់ទេ ដូច្នេះវាមិនទំនងសោះដែលចាំបាច់ត្រូវបញ្ជូនកងទ័ពច្រើនសន្ធឹកសន្ធាប់មកធ្វើសមយុទ្ធនិងដង្ហែរក្បួនវែងអន្លាយបែបនេះមកកាន់អឺរ៉ុបខាងកើត។ ពួកគេបានបន្ថែមថា ក្បួនយោធារបស់ក្រុងវ៉ាស៊ីនតោន ជាការបង្អួតសាច់ដុំដាក់រុស្ស៊ីច្រើនជាង ហើយម្យ៉ាងសកម្មភាពយោធាទាំងនោះជាការបង្ករឿងនិងគ្រោះថ្នាក់ ដោយបង្កើនភាពតានតឹងរវាងអឺរ៉ុបនិងរុស្ស៊ី៕
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
7 ម៉ោង
