អន្តរជាតិ
នយោបាយអន្តរជាតិ
រដ្ឋាភិបាលហ្វីលីពីនសម្លាប់ក្រុមសកម្មប្រយុទ្ធឥស្លាមដើម្បីបញ្ចប់បញ្ហា?
× ក្រុមសកម្មប្រយុទ្ធរណសិរ្សម៉ូរូ ដែលបានគេចខ្លួន ពីចោទប្រកាន់ក្នុងការ សម្លាប់កងកម្លាំង រដ្ឋាភិបាលទាំង៤៤នាក់ បានស្លាប់ដោយសារការប៉ះទង្គិចគ្នា ជាមួយនឹងក្រុមឥស្លាមផ្សេងទៀតនៅលើកោះម៉ាហ្គីនដាណាវ (Maguindanao)។ ការស្លាប់នេះកើតឡើងក្រោយនាយកដ្ឋានយុត្តិធម៌ហ្វីលីពីន បានស្នើឲ្យមានការកាត់ទោសក្រុមសកម្មប្រយុទ្ធនោះ ដើម្បីជាការទទួលខុសត្រូវ និងស្វែងរកយុត្តិធម៌ដល់កងកម្លាំងរដ្ឋាភិបាលដែលបានស្លាប់កន្លងទៅ។
ក្រុមសកម្មប្រយុទ្ធរណសិរ្សម៉ូរ៉ូដែលត្រូវបានចោទប្រកាន់ ថាជាអ្នកសម្លាប់កងកម្លាំងរដ្ឋាភិបាលទាំង៤៤នាក់ កាលពីចុងខែមករាកន្លងទៅនេះ បានស្លាប់បាត់បង់ជីវិត ក្រោយពីមានការប៉ះទង្គិចគ្នា ជាមួយនឹងក្រុមឥស្លាមផ្សេងទៀតនៅលើកោះ ម៉ាហ្គីនដាណាវ (Maguindanao)។
លោក Basit Usman និងសកម្មប្រយុទ្ធជាច្រើនាក់ផ្សេងទៀតរបស់ក្រុមរណសិរ្សម៉ូរ៉ូ គឺជាមុខសញ្ញាដែលត្រូវចាប់ខ្លួន ពាក់ពន្ធ័នឹងស្លាប់កងកម្លាំងរដ្ឋាភិបាល៤៤នាក់ កាលពពីចុងខែមករាកន្លងទៅនេះ។ យ៉ាងណាក៏ដោយ យោងតាមសេចក្តីប្រកាសរបស់មន្ត្រីរដ្ឋាភិបាលហ្វីលីពីនលោកBasitUsman និងសកម្មប្រយុទ្ធ៥នាក់ផ្សេងទៀតបានសា្លប់ក្នុងការប៉ះទង្គិចគ្នាជាមួយក្រុមឥស្លាមជ្រុលនិយមផ្សេងទៀតនៅភាគខាងត្បូងនៃប្រទេស។ ទាក់ទងនឹងពត៌មានលម្អិតលើការស្លាប់នេះ មន្ត្រីរដ្ឋាភិបាលមិនបានបញ្ជាក់ឲ្យច្បាស់លាស់នោះឡើយ។
ជុំវិញការស្លាប់របស់ក្រុមសកម្មប្រយុទ្ធនេះដែរ គេសង្កេតមានភាពមិនច្បាស់លាស់ច្រើនហើយមានមតិខ្លះចោទសួរថា តើការស្លាប់នេះ គឺជាការរៀបចំរបស់រដ្ឋាភិបាលហ្វីលីពីនឬមេដឹកនាំរណសិរ្សម៉ូរ៉ូ ដើម្បីបំបាត់ភស្តុតាង និងគេចពីការទទួលខុសត្រូវឬយ៉ាងណា? អ្វីដែលគួរកត់សម្គាល់នោះ គឺកាលពីថ្មីៗនេះនាយកដ្ឋានយុត្តិធម៌ហ្វីលីពីនបានស្នើឲ្យមានការកាត់ទោសអ្នកដែលសម្លាប់កងកម្លាំងរដ្ឋាភិបាលទាំង៤៤នាក់។
គួររម្លឹកថាកាលពីថ្ងៃទី២៥ ខែមករាកងកម្លាំងរដ្ឋាភិបាលបានប្រតិបត្តិការចាប់ខ្លួនជនឧក្រិដ្ឋ៣នាក់ នៅលើកោះMaguindanao ហើយបានប៉ះទង្គិចគ្នាជាមួយក្រុមសកម្មប្រយុទ្ធដែលកំពុងឈរជើងនៅទីនោះ។ ជាលទ្ធផលកងកម្លាំងរដ្ឋាភិបាល៤៤នាក់បានស្លាប់ ដោយមិនដឹងពីមូលហេតុច្បាស់លាស់។
គួរបញ្ជាក់ផងដែរ ការប៉ះទង្គិចគ្នារវាងកងកម្លាំងរដ្ឋាភិបាល និងក្រុមឧទ្ទាម គឺជាបញ្ហាដែលបានអូសបន្លាយអស់រយៈពេលជាច្រើនទស្សវត្សន៍មកហើយ។ យ៉ាងណាមិញ ការប៉ះទង្គិចគ្នាដោយការបាញ់ប្រហារបានស្ងប់ស្ងាត់ទៅវិញ ក្រោយរដ្ឋាភិបាលហ្វីលីពីន និងមេដឹកនាំក្រុមឧទ្ទាមរណសិរ្សរំដោះឥស្លាមម៉ូរ៉ូ បានចុះកិច្ចព្រមព្រៀងសន្តិភាពបទឈប់បាញ់កាល ពីមីនា ឆ្នាំ ២០១៤កន្លងទៅ ហើយបានអនុញ្ញាតអោយរណសិរ្សរំដោះឥស្លាមម៉ូរ៉ូ អាចមានស្វ័យភាពនៅក្នុងការគ្រប់គ្រងទាំងផ្នែកសេដ្ឋកិច្ច និងនយោបាយនៅក្នុងតំបន់ជម្លោះនោះ៕
© រក្សាសិទ្ធិដោយ thmeythmey.com