អន្តរជាតិ
នយោបាយអន្តរជាតិ
×![]()
កូរ៉េខាងជើងបានធ្វើអោយពិភពលោកភ្ងាក់ផ្អើលជាថ្មីទៀតដោយប្រកាសពីម្សិលមិញនេះថា ខ្លួនបានបាញ់សាកល្បងដោយជោគជ័យកាំជ្រួចពិសេសបាញ់ចេញពីនាវាមុជទឹក។ បើវាជាការពិតមែន វាបញ្ជាក់ថា កូរ៉េខាងជើងក្រៅពីមានកាំជ្រួចនុយក្លេអ៊ែរ ប្រទេសនេះអាចសម្រេចផលិតប្រភេទអាវុធយុទ្ធសាស្ត្រដែលមានឥទ្ធិពលបំផុតមួយហើយ។ ប៉ុន្តែអ្នកជំនាញមួយចំនួនវាយតម្លៃថា អាវុធប្រភេទនេះចំណាយច្រើនណាស់ មិនគួរកូរ៉េខាងជើងអាចផលិតបានលឿនដូច្នេះទេ។
លោក ជាវ សំណាង លម្អិតព័ត៌មាននេះ
មេដឹកនាំកំពូលកូរ៉េខាងជើង គីម ជុងអ៊ុន បានប្រកាសពីម្សិលមិញថា កូរ៉េខាងជើងសម្រេចជោគជ័យក្នុងការបាញ់សាកល្បងមីស៊ីលបាញ់ចេញពីនាវាមុជទឹក។ មេដឹកនាំរូបនេះបានចាត់ទុកអាវុធថ្មីនេះ ជាអាវុធយុទ្ធសាស្ត្រកម្រិតពិភពលោក និងការបាញ់សាកល្បងជោគជ័យអាវុធថ្មីនេះ ជារឿងប្រវត្តិសាស្ត្រមួយសម្រាប់ប្រជាជាតិកូរ៉េខាងជើងថែមទៀត។ ប៉ុន្តែបើវាជារឿងពិតប្រាកដ ការផលិតអាវុធនិងបាញ់សាកល្បងជាថ្មីនេះ រំលោភលើដំណោះស្រាយអង្គការសហប្រជាជាតិមិនអាចប្រកែកបានឡើយ។
ក្រៅពីរំលោភច្បាប់អន្តរជាតិ សកម្មភាពកូរ៉េខាងជើងនេះ មិនមែនជារឿងធម្មតាឡើយសម្រាប់តំបន់។ សម្រាប់អ្នកជិតខាងនិងជាសត្រូវកូរ៉េខាងជើង រួមទាំងសហរដ្ឋអាមេរិកផងនោះ ទំនងជាព្រឺខ្នងបន្តិចដែរ នៅពេលលឺព័ត៌មាននេះ។ គ្រាន់តែលឺកូរ៉េខាងជើងប្រកាសពីអាវុធថ្មីភ្លាម ក្រុងវ៉ាស៊ីនតោនបានបង្ហាញប្រតិកម្មភា្លមៗ ដោយស្នើកូរ៉េខាងជើងបញ្ឈប់សកម្មភាពណាដែលបង្កការគំរាមកំហែង និងបង្កើនភាពតានតឹងក្នុងតំបន់ទៀត។
នេះក៏ដោយសារ មីស៊ីលបាញ់ចេញពីនាវាមុជទឹកអាចជួយអោយ កងកម្លាំងកូរ៉េខាងជើងអាចបត់បែនតាមកាលៈទេសៈក្នុងការប្រើប្រាស់យុទ្ធសាស្ត្រប្រយុទ្ធ និងអាចវាយឆ្មក់សត្រូវបានបានជិតឆ្ងាយពិសេសជាងពេលណាទាំងអស់។ កាលមុនៗ គេមិនសូវខ្វាយខ្វល់ប៉ុន្មានរឿងការគំរាមកំហែងរបស់ក្រុងព្យុងយ៉ាងឡើយ បើទោះជាប្រទេសនេះគំរាមបាញ់សាកល្បងអាវុធនុយក្លេអ៊ែរក៏ដោយ។ ប៉ុន្តែការប្រកាសជោគជ័យបាញ់មីស៊ីលចេញពីនាវាមុជទឹកនេះ បញ្ជាក់ថាសមត្ថភាពវាយប្រហាររបស់ក្រុងព្យុងយ៉ាងពេលនេះ កាន់តែខ្ពស់និង មិនដូចលោកខាងលិចធ្លាប់រំពឹងទុកឡើយ។
បើទោះជាប្រមុខរដ្ឋកូរ៉េខាងជើងបញ្ជាក់ ពីជោគជ័យពិសេសនេះក្តី គេមិនទាន់បានទទួលព័ត៌មានជាក់ច្បាស់ជុំវិញការបាញ់សាកល្បងមីស៊ីលបាញ់ចេញពីនាវាមុជទឹកនេះឡើយ។ ចំណែកខាងទីភ្នាក់ងារព័ត៌មានកូរ៉េបានលួចបញ្ចេញរូបភាពដែលមានបង្ហាញពីការបាញ់កាំជ្រួចមីស៊ីលចេញពីនាវាមុជទឹក ហើយរូបភាពផ្កាយរណបដែលថតបានកាលពីថ្មីៗនេះ ក៏បានបង្ហាញផងដែរថា កូរ៉េខាងជើងបានសម្រេចបំពាក់កាណុងមួយគូនៅលើនាវាមុជទឹក សម្រាប់បាញ់កាំជ្រួចមីស៊ីបាលីស្ទិក ឬកាំជ្រួចមីស៊ីលធម្មតា។ បើតាមរូបភាពដែលបង្ហាញចេញមុខនោះ គេអាចវាយតម្លៃបានថា កូរ៉េខាងជើងពិតជាបានសម្រេចជោគជ័យក្នុងការផលិតនិងបាញ់សាកល្បងអាវុធប្រភេទថ្មីនេះមែន។ ប៉ុន្តែចំពោះពេលវេលានៃការបាញ់សាកល្បង និងនៅទីណានោះមិនមានការបញ្ជាក់ច្បាស់ឡើយ។
ចំណែកអ្នកវិភាគមួយចំនួននៅមិនទាន់ជឿជាក់ថា គីមជុងអ៊ុន អាចសម្រេចផលិតអាវុធថ្មីនិងបាញ់សាកល្បងបានជោគជ័យរហ័សបែបនេះទេ។ ពួកគេបានសង្កត់ធ្ងន់ថា អាវុធមីស៊ីលបាញ់ចេញពីនាវាមុជទឹករយៈចម្ងាយឆ្ងាយនេះ ចំណាយលុយច្រើន និងបច្ចេកវិទ្យាទំនើបណាស់ដើម្បីផលិត។ ហើយបើតាមស្ថានភាពកូរ៉េខាងជើងបច្ចុប្បន្ន ម្តេចនឹងអាចផលិតអាវុធនេះបាន។ ប៉ុន្តែការវាយតម្លៃនេះត្រូវបានបដិសេធដោយលោក Dan Pinkston អ្នកជំនាញសមាជិកវិបត្តិអន្តរជាតិពីក្រុងសេអ៊ូល។ អ្នកជំនាញរូបនេះបានសង្កត់ធ្ងន់ថា វាមិនមែនជាឧបសគ្គឡើយ ប្រសិនជា កូរ៉េខាងជើងចង់បានអី្វហើយ គេនឹងព្យាយាមផលិតវាទាល់តែបាន និងរហ័សតាមដែលអាចធ្វើបានថែមទៀតផង៕
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
2 ថ្ងៃ
