អន្តរជាតិ
នយោបាយអន្តរជាតិ
ហ្វីលីពីនចង់ប្រែតំបន់ជម្លោះសមុទ្រចិនទៅជាតំបន់ទេសចរណ៍
×
អវត្តមាននៃយន្តការដោះស្រាយជម្លោះសមុទ្រចិនខាងត្បូង បានធ្វើឲ្យមានភាពតានតឹងកាន់តែខ្លាំង នៅក្នុងរយៈពេលចុងក្រោយរវាងប្រទេសវៀតណាម ហ្វីលីពីន ជាមួយមហាយក្សចិន។ យ៉ាងណាក៏ដោយ ដើម្បីបញ្ជៀសការប្រឈមមុខគ្នាកាន់តែខ្លាំង រដ្ឋាភិបាលហ្វីលីពីន បានសម្រេចថានឹងអភិវឌ្ឍតំបន់ជម្លោះសមុទ្រចិនខាងត្បូង ដែលខ្លួនកំពុងគ្រប់គ្រង ឲ្យក្លាយទៅជាទិសដៅទេសចរណ៍វិញ។
ម្សិលមិញនេះ រដ្ឋាភិបាលហ្វីលីពីន បានប្រកាសពីគម្រោងកែប្រែតំបន់ជម្លោះសមុទ្រចិនខាងត្បូង ឲ្យទៅជាតំបន់ទេសចរណ៍វិញ។ ការកែប្រែនេះ ធ្វើឡើងក្នុងគោលបំណងរក្សានូវសន្តិភាព និងទប់ស្កាត់ការប្រឈមមុខគ្នាផ្នែកយោធា ជាមួយចិន ដែលជាភាគីតែមួយគត់ ដែលឥទ្ធិពលនៅក្នុងតំបន់ជម្លោះសមុទ្រចិនខាងត្បូង។
ហ្វីលីពីន នឹងប្រើយុទ្ធសាស្ត្រថ្មីនេះ ជំនួសការប្រើកម្លាំងទ័ពដោយគ្រប់គ្រងតំបន់ជម្លោះដោយសន្តិភាព និង ធ្វើឲ្យការគ្រប់គ្រងរបស់ខ្លួន កាន់តែស្របច្បាប់ផងនោះ ។ នោះគឺ ហ្វីលីពីន នឹងអភិវឌ្ឍតំបន់ជម្លោះ ឲ្យក្លាយទៅជាតំបន់ទេសចរណ៍សម្រាប់ ភ្ញៀវជាតិ និង អន្តរជាតិ។
ក្រៅពីលើកកម្ពស់សន្តិភាពនៅក្នុងតំបន់ ការកែប្រែតំបន់ជម្លោះនេះដែរ គឺជាយន្តការតែមួយគត់ ដែលអាចបញ្ឈប់នូវការវាតទីដោយខុសច្បាប់របស់ចិន ដែលកំពុងតែបន្តធ្វើ ដោយគ្មានប្រទេសពាក់ពន្ធ័ណាមួយហ៊ានបញ្ឈប់សកម្មភាពនោះទេ។ ជុំវិញនៃការអភិវឌ្ឍន៍នេះដែរ នាវា និង យន្តហោះដឹកអ្នកដំណើរជាច្រើន នឹងត្រូវបានប្រើប្រាស់ ដើម្បីសម្រួលក្នុងការធ្វើដំណើររបស់ភ្ញៀវទេសចរទៅកាន់តំបន់កោះ។
យ៉ាងណាក៏ដោយ ការអភិវឌ្ឍន៍តំបន់ជម្លោះនេះ ពិតប្រាកដណាស់ នឹងធ្វើអោយមានការប៉ះពាល់ ក៏ដូចជាប្រតិកម្មពីរដ្ឋាភិបាលក្រុងប៉េកាំង ដែលកំពុងដាក់ពង្រាយទ័ពល្បាតរបស់ខ្លួន និង សាងសងប្រពន្ធ័ផ្កាយរណបនៅក្នុងតំបន់នោះទេស្រាប់។
ពាក់ពន្ធ័នឹងគម្រោងនេះដែរ គេអាចទស្សន៍ទាយបានថា សន្តិភាពនៅក្នុងតំបន់ជម្លោះ គឺស្ថិតនៅក្នុងស្ថានភាពមិនច្បាស់លាស់។ហ្វីលីពីន អាចនឹងត្រូវប្រឈមជាមួយនឹងបញ្ហាច្រើនជាមួយចិន។ ជាក់ស្តែង មានហេតុការណ៍ជាច្រើនករណី ដូចជា ការចាប់ទូកនេសាទ ការបាញ់ពន្លិចនាវាបានកើតឡើង ដែលបានបង្កឡើងដោយទាហានល្បាតរបស់ចិន។
អ្វីដែលគួរកត់សម្គាល់នោះ គេសង្កេតឃើញថានៅក្នុងរយៈពេលចុងក្រោយនេះរដ្ឋាភិបាលហ្វីលីពីន ហាក់ដូចជាដើរដល់ផ្លូវទាល់មួយ ពោលគឺ ធ្វើអ្វីក៏មិនបានសម្រេច។ ក្នុងនោះហ្វីលីពីន បានប្តឹងចិន ទៅកាន់មជ្ឈត្តការអន្តរជាតិ តែត្រូវចិនបដិសេធ។ក្រោយមក ហ្វីលីពីន បានយកអាស៊ាន ដើម្បីវាយប្រហារចិន តែត្រូវសមាជិកអាស៊ានមួយចំនួនច្រានចោលដោយមិនលើកមក ពិភាក្សានៅក្នុងកិច្ចប្រជុំកំពូលនោះទេ៕
© រក្សាសិទ្ធិដោយ thmeythmey.com