ខ្មែរក្រហម
ជាតិ
អ.វ.ត.ក មិនទាន់អាចបញ្ជាក់ពីលទ្ធភាពនៃការផ្តល់សក្ខីកម្មរបស់លោក ថេត សម្បត្តិ
×![]()
ដោយ: ថ្មីៗ
អង្គជំនុំជម្រះវិសាមញ្ញក្នុងតុលាការកម្ពុជា នៅមិនទាន់បញ្ជាក់ពីលទ្ធភាពនៃការចូលរួមផ្តល់សក្តីកម្ម របស់លោក ថេត សម្បត្តិ អ្នកកាសែតជើងចាស់មួយរូប ដែលបានជួបសម្ភាសន៍ ជាមួយលោក នួន ជា នៅឡើយនោះទេ។ លោក នេត្រ ភក្ត្រា អ្នកនាំពាក្យសាលាក្តីខ្មែរក្រហម បានបញ្ជាក់ថា ការចូលរួមផ្តល់សក្ខីកម្ម ឬក៏មិនចូល របស់ លោក ថេត សម្បត្តិ ទំនងអាចបញ្ជាក់នៅក្រោយថ្ងៃទី២១ ខែឧសភា បន្ទាប់ពីអង្គភាពគាំពារសាក្សី និងអ្នកជំនាញធ្វើការទាក់ទងទៅលោក ថេតសម្បត្តិផ្ទាល់។
រហូតមកដល់ពេលនេះ អង្គជំនុំជម្រះវិសាមញ្ញក្នុងតុលាការកម្ពុជា នៅមិនទាន់ទទួលបានការឆ្លើយតប ពីសំណាក់លោក ថេត សម្បត្តិ នៅឡើយ។ លោកថេត សម្បត្តិ គឺជាអ្នកកាសែតជើងចាស់ ដែលបានជួបសម្ភាសន៍ ជាមួយបងធំទី២ នៃរបបខ្មែរក្រហម លោក នួន ជា។
លោក ថេត សម្បត្តិ ក៏ជាអ្នកផលិតខ្សែភាពយន្តឯកសារ ដែលមានចំណងជើងថា«សត្រូវរបស់ប្រជាជន» និងបានបោះពុម្ភសៀវភៅដែលមានចំណងជើងថា «នៅពីក្រោយវាលពិឃាត» ដែលនិយាយអំពីរបបដឹកនាំក្នុងសម័យខ្មែរក្រហម។
សូមជម្រាបថា កាលពីថ្ងៃទី៧ឧសភា កន្លងទៅ តុលាការខ្មែរក្រហម បានសម្រេចកោះអញ្ជើញលោក ថេត សម្បត្តិឲ្យធ្វើជាសាក្សីអាទិភាពនៅក្នុងសំណុំរឿង០០២ វគ្គទី២ដែលកំពុងតែជំនុំជម្រះ លើមេដឹកនាំសម័យខ្មែរ លោក នួន ជា និងលោក ខៀវ សំផន។
លោក នេត្រ ភក្ត្រា អ្នកនាំពាក្យសាលាក្តីខ្មែរក្រហម បានថ្លែងប្រាប់សារព័ត៌មានថ្មីៗនៅថ្ងៃនេះថា៖«សាលាក្តីខ្មែរក្រហម នៅមិនទាន់ទទួលបានព័ត៌ដោយផ្ទាល់ ពីលោក ថេត សម្បត្តិ អំពីលទ្ធភាពក្នុងការចូលរួមផ្តល់សក្ខីកម្មនៅក្នុងសំណុំរឿង០០២ភាគទី២នៅឡើយ»។
អ្នកនាំពាក្យតុលាការកូនកាត់រូបនេះ បន្តថា៖«ការចូលរួមផ្តល់សក្ខីកម្ម ឬក៏មិនចូលរួម របស់ លោក ថេត សម្បត្តិ ទំនងអាចបញ្ជាក់នៅក្រោយថ្ងៃទី២១ ខែឧសភា បន្ទាប់ពីអង្គភាពគាំពារសាក្សី និងអ្នកជំនាញធ្វើការទាក់ទងទៅលោក ថេតសម្បត្តិផ្ទាល់»។
អង្គជនុំជម្រះបានសម្រេចទុកពេល២សប្តាហ៍ ដើម្បីឲ្យអង្គភាពគាំពារសាក្សី និងអ្នកជំនាញធ្វើការទាក់ទងទៅលោក ថេតសម្បត្តិដើម្បីសាកសួរពីលទ្ធភាពនៃការចូលរួមផ្តល់សក្តីកម្ម និងដើម្បីឲ្យសាលាក្តីរៀបចំកាលវិភាគបើកសវនាការលើសំណុំរឿង០០២វគ្គ។
លោក ថេត សម្បត្តិ ធ្លាប់បានធ្វើការជាមួយ បងធំទី២នៃរបបខ្មែរក្រហម ជាច្រើនឆ្នាំ និងបានថតសំឡេង របស់លោក នួន ជា ជាច្រើនទៀតផង ហើយភស្តុតាងរបស់លោកថេត សម្បត្តិដែលកំពុងតែបន្តស្នាក់នៅសហរដ្ឋអាមេរិក ជាប្រភពភស្តុតាងដ៏សំខាន់សម្រាប់សាលាក្តីខ្មែរក្រហម។ នេះបើតាមលោក នេត្រភក្ត្រាដដែល។ មន្ត្រីរូបនេះ បានឲ្យដឹងទៀតថា នៅក្នុងសវនការកាលពីពេលកន្លងទៅព្រះរាជអាជ្ញាបានចោទសួរជន លោក នួន ជា ថាបានស្គាល់លោក ថេត សម្បត្តិ ឬទេ? លោក នួន ជា បានឆ្លើយបដិសេដថា មិនបានស្គាល់នោះទេ។
គួរបញ្ជាក់ថា ក្នុងសំណុំរឿង០០២ វគ្គទី១អង្គជំនុំជម្រះវិសាមញ្ញក្នុងតុលាការកម្ពុជាបានសម្រេចកាត់ទោសជនជាប់ចោទ នួន ជា និង ខៀវ សំផនឲ្យជាប់គុកអស់មួយជីវិត។ប៉ុន្តែមេធាវីការពារក្តីជនជាប់ចោទទាំងពីរបានប្តឹងសាទុក៕
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
3 ថ្ងៃ
