អន្តរជាតិ
សមាគមសត្វខឹងវៀតណាមធ្វើព្រៃផ្សៃចំពោះសត្វពាហនៈអូស្ត្រាលី
× រឿងអាស្រូវវៀតណាមធ្វើបាបសត្វពាហនៈដែលដឹកពីអូស្ត្រាលីចូលស្រុកនេះ បានផ្ទុះឡើងថ្មីៗនេះ ដោយសារសមាគមAnimals Australia បានប្រាប់ថា មានកន្លែងសម្លាប់សត្វពាហនៈនៅវៀតណាមជាច្រើន បានប្រើញញួរវាយដំក្បាលសត្វរហូតបែកខ្ចាយ។ រដ្ឋាភិបាលអូស្ត្រាលីសម្រេចធ្វើការអង្កេតជាមុនសិន មុននឹងចេញវិធានការប្រតិកម្មជាមួយវៀតណាម។
សមាគមការពារសត្វAnimals Australia បានប្រាប់ថា មានរូបភាពដែលប៉ះទង្គិចចិត្ត និងពិបាកទទួលយក ជារូបភាពបង្ហាញ ពីភាពខ្ទេចខ្ទាំ បែកខ្ចាយនៃក្បាលរបស់សត្វពាហនៈ។ សត្វពាហនៈទាំងនេះ ត្រូវបានវៀតណាមដឹកទាំងរស់មកពីអូស្ត្រាលី។ Animals Australia បានដាក់ពាក្យប្តឹងទៅក្រសួងកសិកម្ម។
ប្រឈម នឹងរឿងអាស្រូវលក្ខន្តិកសម្លាប់សត្វនេះ អូស្ត្រាលីមិនទាន់ចាត់វិធានការភ្លាមៗទៅលើទំនាក់ទំនងរកស៊ីផ្នែកសត្វពាហនៈជាមួយវៀតណាមទេ។ មូលហេតុគឺដោយសារតែ កាលពីឆ្នាំ២០១៣ អូស្ត្រាលីធ្លាប់ជួបប្រទះរឿងប្រហាក់ប្រហែលគ្នានេះ ជាមួយឥណ្ឌូណេស៊ី ធ្វើអោយអូស្ត្រាលីប្រតិកម្ម ប៉ះទង្គិចដល់ទំនាក់ទំនងជាមួយក្រុងចាកាតា។ កាលពីឆ្នាំ២០១៣ ទូរទស្សន៍បានចុះផ្សាយពីបទយកការណ៍មួយទាក់ទងនឹងកន្លែងសម្លាប់សត្វនៅឥណ្ឌូណេស៊ី។ រដ្ឋាភិបាលមកពីគណបក្សការងារអូស្ត្រាលីបានប្រតិកម្មយ៉ាងតក់ក្រហល់ ដោយបានបិទទីផ្សារសត្វពាហនៈជាមួយឥណ្ឌូណេស៊ី។
រដ្ឋាភិបាលអាណត្តិថ្មី បានបរិហារថា ប្រតិកម្មរបស់រដ្ឋាភិបាលអាណត្តិចាស់កាលពី២ឆ្នាំមុន គឺជាកំហុសឆ្គង ព្រោះក្រោយពីបានបិទទីផ្សារមក ប្រជាជនអូស្ត្រាលីរាប់ពាន់នាក់បានបាត់បង់ចំណូល មួយរយៈពេល ហើយថែមទាំងធ្វើអោយប៉ះពាល់ទំនាក់ទំនងជាមួយឥណ្ឌូណេស៊ីទៀតផង។ ដូច្នេះ ត្បិតថា មានការប្តឹងពីសមាគមAnimals Australia ប្រឆាំងកន្លែងសម្លាប់សត្វនៅវៀតណាមក្តី ក៏រដ្ឋាភិបាលបច្ចុប្បន្នមិនអាចប្រតិកម្មភ្លាមៗដែរ គឺត្រូវតែស៊ើបអង្កេតជាមុនសិន។
គួរបញ្ជាក់ថា លើទីផ្សារ វៀតណាមជាប្រទេសទី២ធំបំផុត ដែលនាំចូលសត្វពាហនៈអូស្ត្រាលី។ ក្នុងឆ្នាំ២០១៤កន្លងទៅ វៀតណាមបាននាំចូលក្នុងស្រុក នូវសត្វពាហនៈអូស្ត្រាលីដល់ទៅ១៧៨ ០០០ ក្បាល៕
© រក្សាសិទ្ធិដោយ thmeythmey.com