អន្តរជាតិ
នយោបាយអន្តរជាតិ
អាមេរិកសកម្មជាងគេក្នុងការគាំទ្រប្រតិបត្តិការរក្សាសន្តិភាពនៅតំបន់អាហ្វ្រិក
× បច្ចុប្បន្ននេះ អង្គការសហប្រជាជាតិប្រើប្រាស់ទ័ពច្រើនក្នុងចំនួនច្រើនបំផុតមួយសម្រាប់ប្រតិបត្តិការថែរក្សាសន្តិភាពពិភពលោក ដែលចំនួននេះពិតជាច្រើនបំផុតមួយ។ ជម្លោះបន្តកើតមានច្រើន ដែលតម្រូវឲ្យមានការចូលរួមពីប្រទេសនានា ជាពិសេសការផ្តល់កងទ័ពទៅចូលរួមជាមួយអង្គការសហប្រជាជាតិ។ ប៉ុន្តែសហរដ្ឋអាមេរិកដែលជាមហាអំណាចពិភពលោកមួយនោះ បានព្យាយាមគៀងគររកជំនួយជំរុញរដ្ឋឯទៀតចូលរួមក្នុងប្រតិបត្តិការរក្សាសន្តិភាព និងផ្តល់ជំនួយច្រើនយ៉ាងទាំងហិរញ្ញវត្ថុ កងកម្លាំង និង ការបំពាក់បំប៉នសមត្ថភាពជាដើម។
មានសំឡេង
សហរដ្ឋអាមេរិកបានបង្ហាញក្តីបារម្ភ ដោយសារបច្ចុប្បន្ននេះអង្គការសហប្រជាជាតិបានពង្រាយកងទ័ពមួកខៀវរបស់ខ្លួនជិត១១ម៉ឺននាក់ដើម្បីរក្សាសន្តិភាពនៅទូទាំងពិភពលោក ហើយកងទ័ពភាគច្រើនត្រូវបញ្ជូនទៅកាន់អាហ្វ្រិក។ ក្នុងសន្និសីទសារព័ត៌មានថ្ងៃ ២១ ឧសភាកន្លងទៅឧបការីរងរដ្ឋមន្ត្រីការបរទេអាមេរិកលោកស្រី Victoria Holt បានបញ្ជាក់ថា ចំនួនកងទ័ពអង្គការសហប្រជាជាតិដ៏ច្រើនស្មើ២ភាគ៣នៃកងទ័ពសរុប ត្រូវបានដាក់ពង្រាយ ដើម្បីរក្សាសន្តិភាព បញ្ចប់ជម្លោះប្រដាប់អាវុធនិងសង្គ្រាមស៊ីវិលនៅលើសាកលលោក។
ជុំវិញប្រតិបត្តិការរក្សាសន្តិភាពសាកលនេះសហរដ្ឋអាមេរិកបានបន្តតួនាទីរបស់ខ្លួនក្នុងការកៀរគរការចូលរួមដើម្បីជំរុញឲ្យការរក្សាសន្តិភាពនៅលើពិភពលោកអាចរៀបចំទៅបានដោយមានប្រសិទ្ធភាពនិងឆ្លើយតបតាមកាលៈទេសៈ និងស្ថានការចាំបាច់។ ម្យ៉ាងអាមេរិកខ្លួនឯង ជារដ្ឋមួយដែលបានផ្តល់ជំនួយទាំងកងទ័ព ព្រមទាំងហិរញ្ញវត្ថុច្រើនជាងគេដើម្បីគាំទ្រប្រតិបត្តិការ ហើយអាមេរិកក៏ផ្តល់ការហ្វឹកហ្វឺននិងបំពាក់បំប៉នសមត្ថភាពកងទ័ពផងដែរ។
បើតាមរបាយការណ៍ក្រុមប្រឹក្សាទំនាក់ទំនងអន្តរជាតិ សហរដ្ឋអាមេរិកក្លាយជារដ្ឋដែលផ្តល់ចំនួយហិរញ្ញវត្ថុច្រើនជាងគេបំផុតដើម្បីទំនុកបម្រុងអង្គការសហប្រជាជាតិនិងប្រតិបត្តិការរក្សាសន្តិភាពប្រចាំតំបន់អាហ្វ្រិក តាមការផ្តល់ជំនួយទៅសហភាពអាហ្វ្រិក និងផ្តល់ជំនួយទៅកាន់ប្រទេសនីមួយៗដែលចូលរួមក្នុងសកម្មភាពរក្សាសន្តិភាព។ក្រៅពីនេះ សហរដ្ឋអាមេរិកក៏បានជួយបំពាក់បំប៉ន និងផ្តល់ការហ្វឹកហាត់ដល់កងកម្លាំងសហភាពអាហ្វ្រិកជាង២៥ម៉ឺននាក់ និងថវិកាសរុបប្រហែល១ពាន់លានដុល្លារអាមេរិកផងដែរ។ ក្រៅពីតំបន់អាហ្វ្រិក សហរដ្ឋអាមេរិកក៏បានចូលរួមចំណែកផ្តល់ការគាំទ្រចំពោះសកម្មភាពរក្សាសន្តិភាពដូចគ្នាដែរ។
តាមពិតទៅ តួនាទីកងកម្លាំងរក្សាសន្តិភាពអង្គការសហប្រជាជាតិគឺជួយគាំទ្ររដ្ឋាភិបាល ប្រទេសដែលកំពុងរងទុក្ខវេនាដោយសង្គ្រាម ជម្លោះប្រដាប់អាវុធ និងហិង្សានានាដើម្បីបង្កើតសន្តិភាព តាមរយៈការជ្រោមជ្រែងជំរុញការចរចាដោយសន្តិភាព និងប្រើដំណោះស្រាយនយោបាយផ្សេងទៀត។ ពួកគេមិនត្រឹមតែជួយឲ្យភាគីចរចា និងឈានទៅរកការឯកភាពគ្នាបង្កើតកិច្ចព្រមព្រៀងនយោបាយប៉ុណ្ណោះទេ យុទ្ធនាការរបស់ពួកគេគឺបង្កើតឲ្យមានស្ថិរភាព ការពារសិទ្ធិមនុស្ស និងរក្សាសណ្តាប់ធ្នាប់នៅក្នុងប្រទេសទាំងនោះផង។ កងកម្លាំងរក្សាសន្តិភាពអង្គការសហប្រជាជាតិជួយបញ្ចប់ហិង្សានិងជម្លោះបង្ហូរឈាម កសាងសន្តិភាព និងជួយការពារមិនឲ្យហិង្សាបែបនេះកើតឡើងសារជាថ្មីទៀត។
បច្ចុប្បន្ននេះ គេសង្កេតឃើញមានប្រទេសជាង១០០ចូលរួមក្នុងសកម្មភាពថែរក្សាសន្តិភាពសាកលលោកនេះ។ ការចូលរួមរបស់ប្រទេសដ៏ច្រើននេះបញ្ជាក់ពីការឈឺឆ្អាលរបស់ពួកគេក្នុងការជួយដោះស្រាយបញ្ហាសាកលលោក និងរក្សាសន្តិភាពរួមគ្នា។ ប៉ុន្តែយ៉ាងណាមិញវាចាំបាច់ត្រូវមានការចូលរួមបន្ថែមទៀតពីរដ្ឋសមាជិកអង្គការសហប្រជាជាតិ ព្រោះជម្លោះចេះតែកើន ខណៈយុទ្ធនាការរក្សាសន្តិភាពប្រឈមកង្វះខាត៕
© រក្សាសិទ្ធិដោយ thmeythmey.com