អន្តរជាតិ
នយោបាយអន្តរជាតិ
ក្រុមប្រទេស៧ គាំទ្រការបន្តទុកទណ្ឌកម្មប្រឆាំងរុស្ស៊ីតម្រូវចិត្តអាមេរិក
×
មេដឹកនាំក្រុមប្រទេស៧ ជួបជុំគ្នានៅភាគខាងត្បូងប្រទេសអាឡឺម៉ង់ ដោយអធិការបតីអាឡឺម៉ង់ស្វាគមន៍ភ្ងៀវកិត្តិយសដោយចាក់ស្រាប្រចាំតំបន់Bavarian។ បរិយាការរីករាយត្រលប់ទៅជាអួលអាប់ដោយបញ្ហាវិបត្តិអ៊ុយក្រែន និងវិបត្តិបំណុលក្រិក ប៉ុន្តែយ៉ាងណាក៏ដោយមេដឹកនាំទាំងនោះមិនសូវឈឺក្បាលទេ ព្រោះគ្មានវត្តមានប្រមុខរដ្ឋរុស្ស៊ី វ្ល៉ាឌីមៀ ពូទីន។ វិបត្តិអ៊ុយក្រែននៅតែជារឿងក្តៅគគុក និងស្មុគស្មាញបំផុត តែមេដឹកនាំទាំងអស់បង្ហាញជំហរគាំទ្រចំណាត់របស់លោក បារ៉ាក់ អូបាម៉ា ក្នុងការរឹតបន្តឹងនិងរក្សាទុកទណ្ឌកម្មប្រឆាំងរុស្ស៊ីទៀត ព្រោះរុស្ស៊ីគ្មានឆន្ទៈពិតប្រាកដអនុវត្តកិច្ចព្រមព្រៀងសន្តិភាពក្រុង Minsk។ កិច្ចប្រជុំកំពូលនេះរៀបចំឡើងស្របពេលដែលជម្លោះនៅភាគខាងកើតចេះតែធ្ងន់ធ្ងរ ហើយកិច្ចព្រមព្រៀងសន្តិភាពដែលបារាំង អាឡឺម៉ងឆ្ការដៃឆ្ការជើងជួយជ្រោមជ្រែងភាគីជម្លោះឲ្យបង្កើតឡើងនោះកំពុងតែរងការគំរាមកំហែងខ្លាំង អាចនឹងត្រូវគេទាត់ចោលផងក៏ថាបាន។
សូមស្តាប់ការបកស្រាយរបស់លោក សៅ ផលនិស្ស័យ
មេដឹកនាំក្រុមប្រទេស ៧បានអញ្ជើញដល់ភាគខាងត្បូងប្រទេសអាឡឺម៉ង់ដើម្បីចូលរួមកិច្ចប្រជុំកំពូលដែលចាប់ផ្តើមកាលពីម្សិលមិញ ដោយផ្តោតលើការពិភាក្សាស្វែងរកដំណោះស្រាយបញ្ហាសកលជាច្រើន។ ប្រទេសដែលមានសេដ្ឋកិច្ចលូតលាស់ខ្លាំងទាំងប្រាំពីរនេះ តែងតែជួបពិភាក្សាជារៀងរាល់ឆ្នាំ តែឆ្នាំនេះប្រធានបទសំខាន់និងក្តៅជាច្រើនត្រូវបានគេលើកយកមកពិភាក្សា។ បញ្ហាកំណើនសេដ្ឋកិច្ច សន្តិសុខសាកល ការប្រែប្រួលអាកាសធាតុ ជាដើមជាប្រធានបទសំខាន់។ តែជម្លោះនៅអ៊ុយក្រែន និងវិបត្តិបំណុលក្រិក បានគ្របដណ្តប់វេទិកាកិច្ចប្រជុំ ដែលធ្វើឲ្យកិច្ចប្រជុំរឹតតែស្មុគ្រស្មាញឡើង។
កិច្ចប្រជុំនេះ ធ្វើឡើងស្របពេលដែលជម្លោះប្រដាប់អាវុធនៅភាគខាងកើតកាន់តែធ្ងន់ធ្ងរឡើង ដោយភាគីលែងខ្វល់ពីកិច្ចព្រមព្រៀងសន្តិភាពដែលគេទទួលយកកាលពីខែកុម្ភៈកន្លងទៅនៅទីក្រុង Minsk បេឡារ៉ុស។ រុស្ស៊ីដែលត្រូវគេព្យួរសមាជិកភាពកាលពីឆ្នាំមុនព្រោះក្រសោបយកតំបន់ Crimea ពីអ៊ុយក្រែននោះ កំពុងរងការថ្កោលទោសជាថ្មី និងអាចនឹងរងទណ្ឌកម្មបន្ថែមរបស់ប្រទេសទាំង ៧នេះផង ព្រោះមិនមានឆន្ទៈអនុវត្តកិច្ចព្រមព្រៀងសន្តិភាពដែលមានស្រាប់។ កន្លងមក ប្រមុខរដ្ឋាភិបាលជប៉ុន និងកាណាដា ក៏បានទៅទស្សនកិច្ចនៅក្នុងប្រទេសអ៊ុយក្រែនដែរដើម្បីបង្ហាញការគាំទ្រអ៊ុយក្រែនប្រឆាំងក្រុងម៉ូស្គូ។
១. ការរក្សាទណ្ឌកម្មប្រឆាំងរុស្ស៊ីត្រឹមតម្រូវចិត្តអាមេរិកនិងអង់គ្លេស?
មុនចាប់ផ្តើមកិច្ចប្រជុំប្រធានាធិបតីបារ៉ាក់ អូបាម៉ាបានថ្លែងប្រាប់សម្ព័ន្ធមិត្តខ្លួនទាំងអស់មាន ប្រមុខរដ្ឋាភិបាលអង់គ្លេស ដេវីដ ខេមេរ៉ូន ប្រធានាធិបតីបារាំង ហ្វ្រង់ស្វ័រ ហូឡង់ នាយករដ្ឋមន្ត្រីអ៊ីតាលី MatteoRanziនាយករដ្ឋមន្ត្រីកាណាដា Stephen Harper នាយរដ្ឋមន្ត្រីជប៉ុន ស៊ីហ្សូអាបេ ចំនុចសំខាន់សម្រាប់ក្រុមប្រទេសទាំង៧គឺត្រូវរួមគ្នាប្រឆាំងដាច់ខាតការឈ្លានពានរបស់រុស្ស៊ីនៅអ៊ុយក្រែន។ លោក បារ៉ាក់ អូបាម៉ា បានឆ្លៀតយកឱកាសកិច្ចប្រជុំស្វែងរកការគាំទ្រវិធានការរឹតបន្តឹងនិងបន្តរក្សាទណ្ឌកម្មប្រឆាំងរុស្ស៊ី ក្រោយកិច្ចព្រមព្រៀងសន្តិភាពរងការគំរាមកំហែងដោយការប្រយុទ្ធគ្នានៅភាគខាតកើត។ ទាំងលោកស្រីអធិការបតីអាឡឺម៉ង់ អែនជឺឡា ម៉ាហ្កែល ជឿថាទុកទណ្ឌកម្មដើម្បីគំរាមរស្ស៊ីឲ្យអនុវត្តកិច្ចព្រមព្រៀង។ ចំណែកមេដឹកនាំប្រទេសផ្សេងទៀតសុទ្ធតែមើលឃើញថាការបន្តរក្សាទុកទណ្ឌកម្មប្រឆាំងរុស្ស៊ី នៅតែជាដំណោះស្រាយបញ្ចប់វិបត្តិអ៊ុយក្រែន។ តាមពិតទៅ អាមេរិកខ្លួនឯងធ្លាប់ទទួលស្គាល់ថាទណ្ឌកម្មគ្មានប្រសិទ្ធភាពប៉ុន្មានឡើយ មិនអាចវាយបំបាក់ធ្មុងរុស្ស៊ីឲ្យដកដៃចេញពីវិបត្តិអ៊ុយក្រែនឡើយ។ យ៉ាងណាក៏ដោយ ការបង្ហាញជំហរគាំទ្រការរក្សាទណ្ឌកម្មលើរុស្ស៊ី ជាការតម្រូវចិត្តក្រុងវ៉ាស៊ីនតោន និងចក្រភពអង់គ្លេសច្រើនជាងបញ្ចប់វិបត្តិនៅអ៊ុយក្រែនពិតប្រាកដ។បញ្ហាសំខាន់ វាមិនចំណេញទាល់តែសោះសម្រាប់រដ្ឋអឺរ៉ុបខ្លះដែលមានចំណូលពឹងពាក់លើពាណិជ្ជកម្មជាមួយក្រុងម៉ូស្គូ។ តែបើបន្ទោសមេដឹកនាំអឺរ៉ុបក៏មិនកើត ទាំងបារាំង អាឡឺម៉ង់ម្នាក់ៗសុទ្ធតែទូលរែកសម្ពាធប៉ុនភ្នំដែលក្រុងវ៉ាស៊ីនតោនទម្លាក់លើដើម្បីដោះស្រាយបញ្ហានៅអ៊ុយក្រែន។ កន្លងមកបារាំងសុខចិត្តខាតបង់លុយវាល់លានដុលា្លរ ដោយឈប់លក់នាវាចម្បាំង Mistrals ទៅឲ្យរុស្ស៊ីព្រោះវិបត្តិនៅអ៊ុយក្រែនដែរ។
២.វិបត្តិអ៊ុយក្រែន គ្មានដំណោះស្រាយ ឬគ្មានអ្នកចង់ដោះស្រាយ?
កិច្ចព្រមព្រៀងទីក្រុង Minsk ដែលចូលជាធរមានកាលពីថ្ងៃ ១៥ កុម្ភៈកន្លងមក មានចែងចំណុចសំខាន់ៗជុំវិញការបញ្ឈប់ការប្រយុទ្ធសិន និងឈានទៅពិភាក្សាគ្នាបន្តលើការបញ្ចប់ជម្លោះ។ តាមពិតទៅកិច្ចព្រមព្រៀងនេះជាមូលដ្ឋានគ្រឹះសំខាន់សម្រាប់ភាគីក្នុងការឈានទៅបង្កើតសន្តិភាព ប៉ុន្តែភាគីទាំងពីរកន្លងមកតែងចោទគ្នាទៅវិញមករឿងរំលោភកិច្ចព្រមព្រៀង។រុស្ស៊ីបន្តរងការចោទប្រកាន់ពីលោកខាងលិច ស្របពេលរដ្ឋាភិបាលក្រុងគៀវអះអាងថា រុស្ស៊ីមិនព្រមដាក់សម្ពាធលើក្រុមឧទ្ទាមឲ្យគោរពបទឈប់បាញ់។ លោកខាងលិចនៅតែបន្តប្រើប្រាស់ទណ្ឌកម្មនិងធ្វើឲ្យរុស្ស៊ីឯកោរ តែគ្មានឆន្ទៈពិតប្រាកដចង់ជួយដោះស្រាយជម្លោះអ៊ុយក្រែនឡើយ។ តាមពិតទៅការដោះស្រាយវិបត្តិនៅអ៊ុយក្រែនជារឿងលំបាកបំផុតមួយប៉ុន្តែវាមិនលំបាកដល់ថ្នាក់រកផ្លូវបញ្ចប់មិនបានឡើយ។ បើមិនមានការលូកដៃពីមហាអំណាចម្ល៉េះជម្លោះក៏មិនធ្ងន់ធ្ងរដល់បច្ចុប្បន្នដែរ និងរកផ្លូវចប់មិនឃើញដែរ។ សូមបញ្ជាក់ថា បញ្ហស្នូលនិងចម្រូងចម្រាសបច្ចុប្បន្នដែលធ្វើឲ្យភាគីជម្លោះមិនត្រូវរ៉ូវគ្នាសោះនោះគឺការធ្វើវិមជ្ឈការអំណាចនិងការទាមទារស្វ័យភាពរបស់ក្រុមឧទ្ទាម។ ភាគីក្រុមឧទ្ទាមទាមទារស្វ័យភាព ខណៈពេលដែលរដ្ឋាភិបាលមានឆន្ទៈត្រឹមផ្តល់អំណាចខ្លះៗដល់ខេត្តភាគអាគ្នេយ៍ប្រទេសប៉ុណ្ណោះ ព្រោះខ្លាចថាថ្ងៃណាមួយខេត្តទាំងនោះរបូតធ្លាក់ចូលក្នុងកណ្តាប់ដៃរុស្ស៊ីដូច Crimea។ បើសិនភាគដើរថយក្រោយម្នាក់មួយជំហាន ប្រហែលជាមិនមានការបន្តការប្រយុទ្ធគ្នាមកដល់បច្ចុប្បន្ននេះទេ។ យ៉ាងណាមិញ ដើម្បីធានាថា ការផ្សះផ្សាជាតិអាចសម្រេចជោគជ័យ វាក៏ទាមទារឲ្យរដ្ឋាភិបាលអ៊ុយក្រែនបច្ចុប្បន្នធ្វើកំណែទម្រង់របបដឹកនាំឲ្យស៊ីជម្រៅធ្វើឲ្យរបបដឹកនាំប្រសើរឡើងតាមរយៈការរៀបចំរដ្ឋធម្មនុញ្ញអ៊ុយក្រែនថ្មី សម្រាប់ប្រជាជនអ៊ុយក្រែនគ្រប់គ្នាគ្មានការរើសអើងក្រុមណាមួយឡើយ។ ដើមហេតុនៃវិបត្តិ ក៏ដោយសាររបបដឹកនាំមុនៗប្រើប្រាស់គោលនយោបាយរើសអើងប្រជាជនផងដែរ។ ចំណែកបញ្ហាសំខាន់មួយផ្សេងទៀតគឺរដ្ឋាភិបាលអ៊ុយក្រែន ត្រូវត្រលប់ជ្រើសយកគោលការណ៍អព្យាក្រិត្យ បញ្ឈប់រាល់មហិច្ឆតាភ្ជាប់ខ្លួនជាមួយលោកខាងលិចជាពិសេសការចង់ក្លាយជាសមាជិកណាតូ និង សហភាពអឺរ៉ុបផង។ បើអ៊ុយក្រែនរក្សាជំហររបស់ខ្លួនបានល្អ ម្ល៉េះមហាអំណាចជិតខាងជាពិសេសរុស្ស៊ីមិនប្រឹងបន្តលូកដៃយ៉ាងជ្រៅជ្រៀតជ្រែកកិច្ចការផ្ទៃក្នុងរបស់ប្រទេសនេះបានឡើយ៕
© រក្សាសិទ្ធិដោយ thmeythmey.com