ជាតិ
នយោបាយជាតិ
លោក ហ៊ុន សែន នឹងធ្វើបទបាឋកថាស្តីពីនយោបាយ «ឈ្នះឈ្នះ» ដល់និស្សិតជិត១ពាន់នាក់នៅថ្ងៃស្អែក
× ភ្នំពេញ៖ នាយករដ្ឋមន្ត្រីលោក ហ៊ុន សែន នឹងទៅធ្វើបទបាឋកថាស្តីពីនយោបាយឈ្នះឈ្នះ ដោយផ្ទាល់ដល់និស្សិតចំនួន ៨០០នាក់ ចាប់ពីម៉ោង ៨ រហូតដល់ ម៉ោង ១១ព្រឹកថ្ងៃទី១៥ មិថុនា ឆ្នាំ២០១៥ នៅសាកលវិទ្យាល័យន័រតុន ក្នុង ខណ្ឌជ្រោយចង្វា។ នេះបើប្រសាសន៍បញ្ជាក់របស់ លោក នរ៉ាណាឫទ្ធិ អានន្ទដាយ៉ាត ព្រឹទ្ធបុរសនៃមហាវិទ្យាល័យវិទ្យាសាស្ត្រសង្គម នៅក្នុងសាកលវិទ្យាល័យន័រតុន។
លោក នរ៉ាណាឫទ្ធិ អានន្ទដាយ៉ាត បាននិយាយប្រាប់សារព័ត៌មានថ្មីៗដឹងថា បទបាឋកថានេះ រៀបចំឡើងដោយសាកលវិទ្យាល័យន័រតុន ហើយក្នុងគោលបំណងផ្តល់ចំណេះដឹង ប្រវត្តិសាស្ត្រនយោបាយឈ្នះឈ្នះដល់យុវជនជំនាន់ក្រោយ។
លោកសង្កត់ធ្ងន់យ៉ាងដូច្នេះថា៖«អ្វីដែលយើងរៀបចំនេះ គឺដើម្បីរម្លឹកប្រវត្តិសាស្ត្រឈ្នះឈ្នះនៅកម្ពុជាថា តើអ្នកណាជាតួអង្គបង្កើតនយោបាយ ឈ្នះឈ្នះ? ហេតុអ្វីបានជាមាននយោបាយឈ្នះឈ្នះ?។ ដូចនេះ យុវជននឹងដឹងច្បាស់ពីប្រវត្តិសាស្ត្រ ដើម្បីកុំឲ្យពួកគេមានកំហុសប្រវត្តិសាស្ត្រទៅ ថ្ងៃខាងមុខ»។
គួររម្លឹកថា កាលពីថ្ងៃទី ២៤ ខែឧសភា កន្លងទៅ អនុប្រធានគណបក្សប្រជាជនកម្ពុជា លោក ហ៊ុន សែន ក៏បានសម្រេចធ្វើបាឋកថាលើកដំបូង រយៈពេលជិត ៤ម៉ោង ស្តីពីគោល នយោបាយឈ្នះឈ្នះ នៅទីស្នាក់ការកណ្តាលគណបក្សប្រជាជនកម្ពុជាម្តងរួចដែរ។ លោកនាយករដ្ឋមន្ត្រីដែលគេចាត់ទុកជាបុរសខ្លាំង របស់កម្ពុជានេះ បានលើកឡើងពីការរំលាយអង្គការចាត់តាំងចុងក្រោយរបស់ក្រុមខ្មែរក្រហម ដើម្បីបង្រួបបង្រួមទឹកដី ទៅដល់ក្រុមយុវជនគណបក្សប្រជាជនកម្ពុជា៕
© រក្សាសិទ្ធិដោយ thmeythmey.com