ជាតិ
ពលករខ្មែរ២៣០នាក់ នឹងត្រឡប់មកដល់កម្ពុជាវិញនៅថ្ងៃស្អែក
×
ពលករខ្មែរចំនួន២៣០នាក់ នឹងត្រូវត្រឡប់មកដល់ប្រទេសកម្ពុជាវិញនៅថ្ងៃទី១៨ខែមិថុនាស្អែកនេះ ក្រោមការរៀបចំរបស់ក្រុមហ៊ុនតំណាងភាគីម្ចាស់ទូកនេសាទថៃ។ ពួកគេនឹងត្រូវធ្វើមាតុភូមិនិវន្តន៍មកកម្ពុជាវិញ តាមរយៈជើងហោះហើរ ពីកោះអំបន់ ប្រទេសឥណ្ឌូណេស៊ី និងពីក្រុងកូឡាឡាំពួរ ប្រទេសម៉ាឡេស៊ី។
បន្ទាប់ពីបានដោះស្រាយប្រាក់បៀវត្សរួចរាល់ពលករខ្មែរចំនួន២៣០នាក់ នឹងត្រូវត្រឡប់មកដល់ប្រទេសកម្ពុជាវិញនៅថ្ងៃទី១៨ខែមិថុនាស្អែកនេះ។
ស្ថាតទូតកម្ពុជាប្រចាំប្រទេសឥណ្ឌូណេស៊ី បានធ្វើការជាមួយសម្ព័ន្ធក្រុមហ៊ុនPT. Maribu Industries Group ដែលជាក្រុមហ៊ុនតំណាងភាគីម្ចាស់ទូកនេសាទថៃ អំពីមាតុភូមិនិវត្តន៍របស់ពលករកម្ពុជានេះ។ តាមការទាមទាររបស់កម្ពុជា ក្រុមហ៊ុនតំណាងភាគីម្ចាស់ទូកនេ សាទថៃបានរៀបចំជើងហោះហើរចំនួន២ សម្រាប់មាតុភូមិនិវត្តន៍របស់ពលករកម្ពុជា ។
បើយោងតាមសេចក្តីប្រកាសព័ត៌មានរបស់ក្រសួងការបរទេសកម្ពុជា ពលករខ្មែររងគ្រោះចំនួន២៣០នាក់ នឹងត្រូវចែកជា២ក្រុម។ ក្រុមទី១មានចំនួន២១៣នាក់ នឹងមកដល់ព្រលានយន្តហោះអន្តរជាតិភ្នំពេញ នៅម៉ោង៦ព្រឹក ថ្ងៃទី១៨ ខែមិថុនា ដោយចេញដំណើរពីកោះអំបន់ ប្រទេសឥណ្ឌូណេស៊ី។ ចំណែកមួយក្រុមទៀតមានចំនួន១៧នាក់ នឹងមកដល់ព្រលានយន្តហោះអន្តរជាតិភ្នំពេញនៅម៉ោង៣និង៥៥នាទីរសៀល ថ្ងៃទី១៨ ខែមិថុនា ដោយធ្វើដំណើរតាមជើងយន្តហោះ AK 534 ពីក្រុងកូឡាឡាំពួរ ប្រទេសម៉ាឡេស៊ី ៕
© រក្សាសិទ្ធិដោយ thmeythmey.com