ជាតិ
នយោបាយជាតិ
អ្នកស្បថជំនួសនាំគ្នាទៅចាំនៅមុខព្រះអង្គដងកើ ខណៈអ្នកបបួលស្បថអត់ឃើញចេញមុខ
× នៅព្រឹកថ្ងៃទី២១មិថុនានេះ ក្រុមនិស្សិតក្មេងវត្ត និងក្រុមសម្ព័ន្ធសេនានាគ ដែលមាននិន្នាការទៅរកគណបក្សប្រជាជនកម្ពុជា បាននាំគ្នាមកមុខព្រះអង្គដងកើ ដើម្បីស្បថជាមួយលោក ម៉ៅ ពិសេស ប្រធានសហព័ន្ធនិស្សិតបញ្ញវន្តកម្ពុជា។ ប៉ុន្ដែការស្បថនេះ មិនបានប្រព្រឹត្តដូចការគ្រោងទុកនោះទេ ដោយសារតែភាគីសហព័ន្ធនិស្សិតបញ្ញវន្តកម្ពុជាលោក ម៉ៅ ពិសេស មិនមានវត្តមាននៅមុខព្រះអង្គដងកើនោះឡើយ។
ដោយរងចាំភាគីលោក ម៉ៅ ពិសេស អស់រយៈពេលជាច្រើនម៉ោងនោះ តំណាងបញ្ញវន្ដនិស្សិតក្មេងវត្តលោក ចៅ សម្បត្តិ ដែលសុំចូលខ្លួនស្បថតទល់ជាមួយលោក ម៉ៅ ពិសេស ជំនួសលោកនាយករដ្ឋមន្ត្រី ហ៊ុន សែន បានចោទលោក ម៉ៅ ពិសេសវិញថា «ជាមនុស្សប្រជាភិថុតប្រជាពលរដ្ឋ ចេះតែនិយាយប្រោកប្រាស់ មិនពិត។ ចេះតែនិយាយតែមិនធ្វើ»។
នៅមុខព្រះអង្គដងកើព្រឹកនេះ គេឃើញមានក្រុមនិស្សិតក្មេងវត្ត ក្រុមសម្ព័ន្ធសេនានាគ និងក្រុមឆន្ទៈយុវជនឆ្លងដែនជាច្រើននាក់ បានប្រមូលផ្ដុំគ្នារងចាំស្បថជាមួយក្រុមសហព័ន្ធនិស្សិតបញ្ញវន្តកម្ពុជាលោក ម៉ៅ ពិសេស ។
សារព័ត៌មានថ្មីៗមិនអាចសុំការបកស្រាយពីលោក ម៉ៅ ពិសេស ជុំវិញបញ្ហាបបួលគ្នាស្បថនៅមុខព្រះអង្គដងកើ ជាមួយក្រុមយុវជនដែលមាននិន្នាការគាំទ្រគណបក្សប្រជាជនកម្ពុជាឡើយ ដោយទូរស័ព្ទលោក មិនមានអ្នកទទួល។ ចំណែកនៅលើគេហទំព័រហ្វេសបុករបស់លោក ម៉ៅ ពិសេស ក៏មិនមានប្រតិកម្មតបជាមួយការបបួលស្បថតទល់គ្នានេះ ដូចសព្វដងដែរ។
កន្លងមកលោក ម៉ៅ ពិសេស ដែលជាប្រធានសហព័ន្ធនិស្សិតបញ្ញវន្តកម្ពុជា បានប្រកាសចេញមុខស្បថតទល់ជាមួយលោក នាយករដ្ឋមន្ត្រីហ៊ុន សែន នៅមុខព្រះអង្គដងកើ កាលពីថ្ងៃទី៩មិថុនា។
លិខិតលោក ម៉ៅ ពិសេសស្នើទៅលោកនាយករដ្ឋមន្ត្រី ហ៊ុន សែននោះ បានសរសេរថា៖«ខ្ញុំសូមចេញមុខចូលរួមស្បថតទល់ជាមួយសម្តេចនៅមុខព្រះអង្គដងកើ ដើម្បីបញ្ជាក់ពីភាពស្អាតស្អំរបស់សម្តេច និងគណបក្សប្រជាជនចំពោះការចោទប្រកាន់ថាគណបក្សប្រជាជន បានលួចបន្លំលទ្ធផលបោះឆ្នោតកាលពីពេលបោះឆ្នោតឆ្នាំ២០១៣កន្លងមក»។ លិខិតដដែលបន្តថា៖«ប្រសិនបើសម្តេចមិនហ៊ានចូលស្បថជាមួយខ្ញុំនោះទេ បញ្ជាក់ថាសម្តេចបានចាញ់ឆ្នោតកាលពីឆ្នាំ២០១៣ ពិតប្រាកដមែន ហើយគណប្រជាជនទទួលបាន៦៨អាសនៈ គឺបានមកពីការលួចបន្លំ»។
គួរបញ្ជាក់ថា ល្បែងបបួលគ្នាស្បថរវាងក្រុមនិស្សិតបញ្ញវន្ត ដែលមាននិន្នាការគាំទ្រគណបក្សប្រឆាំង និងម្ខាងទៀតមាននិន្នាការគាំទ្រគណបក្សកាន់អំណាចនាពេលនេះ គឺធ្វើឡើងក្រោយពីលោកនាយករដ្ឋមន្ត្រី ហ៊ុន សែន គ្រោងបបួលលោក សម រង្ស៊ី ប្រធានគណបក្សសង្គ្រោះជាតិ និងជាដៃគូរសន្ទនាជាមួយលោក ស្បថនៅមុខព្រះអង្គដងកើ តាមរយៈវប្បធម៌សន្ទនា ដែលលោក សម រង្ស៊ី តែងតែចោទរដ្ឋាភិបាលលោក ហ៊ុន សែន ថា បានលួចសន្លឹកឆ្នោតកាលពីឆ្នាំ២០១៣កន្លងទៅ៕
© រក្សាសិទ្ធិដោយ thmeythmey.com