អន្តរជាតិ
នយោបាយអន្តរជាតិ
ហ្វីលីពីនសង្ឃឹមឈ្នះចិនលើសំណុំរឿងសមុទ្រចិននៅមជ្ឈត្តការឡាអេ
×
តំណាងរដ្ឋាភិបាលហ្វីលីពីនគ្រោងធ្វើដំណើរទៅកាន់មជ្ឈត្តការអន្តរជាតិប្រទេសហូឡង់ដើម្បី ឡើងបង្ហាញពីគោលជំហររបស់ខ្លួនក្នុងការទាមទារតំបន់ជម្លោះសមុទ្រចិនខាងត្បូងសប្តាហ៍ក្រោយ។ បើទោះជាសប្តាហ៍ក្រោយនឹងគ្មានវត្តមានចិនចូលរួមក្នុងនីតិវិធីតុលាការក៏ដោយ ក៏ហ្វីលីពីនរំពឹងខ្លាំងថាស្ថាប័នយុត្តិធម៌នេះនឹងប្រកាសថាខ្លួនថាមានយុត្តាធិការកាត់ក្តីសំណុំរឿងសមុទ្រចិន និងអាចឈានដល់កាត់ក្តីឲ្យខ្លួនឈ្នះថែមទៀត។
លោក ជាវ សំណាង លម្អិតព័ត៌មាននេះ
ហ្វីលីពីនត្រៀមលក្ខណៈរួចស្រេចហើយ ដើម្បីចូលបំភ្លឺក្នុងមជ្ឈត្តការអង្គការសហប្រជាជាតិប្រចាំទីក្រុងឡាអេប្រទេសហូឡង់នៅសប្តាហ៍ក្រោយ។ អ្នកនាំពាក្យរដ្ឋាភិបាលក្រុងម៉ានីលលោក Abigail Valte បានប្រាប់ទីភ្នាក់ងារសារព័ត៌មាន Reuters ម្សិលមិញថា ប្រតិភូរដ្ឋាភិបាលហ្វីលីពីនកំពុងតែត្រៀមលក្ខណៈដើម្បីពន្យល់ពីគោលជំហររបស់ខ្លួន ដែលកំពុងទាមទារយកដែនទឹកសមុទ្រចិនខាងត្បូង និងបង្ហាញសក្ខីកម្មឬភស្តុតាងនានាដែលចាំបាច់ដើម្បីបន្ថែមទម្ងន់លើការទាមទាររបស់ខ្លួនថែមទៀត។
គេរំពឹងថា មជ្ឈត្តការក្រុងឡាអេទទួលបន្ទុកកាត់ក្តីជម្លោះដែនសមុទ្រ នឹងបើកដំណើរការនីតិវិធី ដោយឲ្យភាគីហ្វីលីពីនឡើងការពារអំណះអំណាង និងការទាមទាររបស់ខ្លួនជុំវិញសំណុំរឿងសមុទ្រចិនខាងត្បួង ចន្លោះពីថ្ងៃ ៧ដល់ថ្ងៃ ១៣ខែកក្កដាខាងមុខនេះ។ យ៉ាងណាក៏ដោយ ក្រុងប៉េកាំងបានប្រកាន់ជំហរចាស់ ដោយមិនចូលរួមក្នុងដំណើរការរបស់តុលាការឡើយ បើទោះជាហ្វីលីពីនប្តឹងខ្លួនដល់តុលាការក៏ដោយចុះ។ ក្រោយស្តាប់អំណះអំណាងហ្វីលីពីនហើយ គេរំពឹងថា តុលាការនឹងសម្រេចចុងក្រោយថា តើខ្លួនមានយុត្តាធិការទទួលសំណុំរឿងដ៏ធំនេះដែរឬអត់។
ភាគីហ្វីលីពីនសង្ឃឹមខ្លាំងតែម្តងថា តុលាការនឹងសម្រេចទទួលចាត់ការរឿងក្តីជម្លោះសមុទ្រចិនខាងត្បូង។ ប៉ុន្តែ គ្មានអ្នកណាម្នាក់អាចទាយដឹងមុនទេថា មជ្ឈត្តការអចិន្ត្រៃយ៍ស្តីពីច្បាប់សមុទ្ររបស់អង្គការសហប្រជាជាតិនឹងសម្រេចពីយុត្តាធិការរបស់ខ្លួនបែបណាទេ។ គេកំពុងរង់ចាំថា តើតុលាការ នឹងសម្រេចបែបណាទៅវិញ បើចិនមិនទាំងខ្វល់ពីសកម្មភាពហ្វីលីពីន និងការកោះអញ្ជើញរបស់តុលាការផងនោះ។ បើត្រឹមតែសង្ឃឹមថា តុលាការមានយុត្តាធិការកាន់សំណុំរឿងនេះ វានៅតិចពេក ហ្វីលីពីនក៏ជឿជាក់ខ្លាំងដូចគ្នាផងដែរថា ខ្លួននឹងមានលទ្ធភាពគ្រប់គ្រាន់អាចឈ្នះក្តីចិននៅតុលាការផង។
បើតាមអ្នកនាំពាក្យខាងលើ រដ្ឋាភិបាលក្រុងម៉ានីល បានប្រឹងប្រែងប្រមូលភស្តុតាង ឯកសារសំខាន់ៗនានា ដែលពាក់ព័ន្ធ រួមទាំងប្រមែរប្រមូលអ្នកជំនាញ អ្នកច្បាប់ល្បីៗរបស់ខ្លួននិងអន្តរជាតិជាច្រើនរូបផង ដើម្បីតតាំងជាមួយចិន នៅពេលខាងមុខ បើតុលាការប្រកាសទទួលយកសំណុំរឿង។ នេះបញ្ជាក់ច្បាស់ថា ហ្វីលីពីនដូចជាត្រៀមខ្លួនបានល្អ និងជឿជាក់ខ្លាំងមែនទែន ថាខ្លួនមានប្រៀបជាងចិន បើផ្អែកតាមផ្លូវច្បាប់ និងផ្អែកលើបទដ្ឋានអន្តរជាតិ។
សូមរំលឹកបន្តិចថា ហ្វីលីពីនបានដាក់សំណុំរឿងជម្លោះសមុទ្រចិនខាងត្បូងទៅមជ្ឈត្តការអន្តរជាតិនៅឡាអេ ប្រទេសហូឡង់កាលពីឆ្នាំ២០១៣ ក្រោយដែលមើលឃើញថាខ្លួនគ្មានលទ្ធភាពឈ្នះចិនដោយប្រើប្រាស់វិធីសាស្ត្រផ្សេងទៀតឡើយ។ ប៉ុន្តែទង្វើហ្វីលីពីនបានធ្វើឲ្យចិនខឹងសម្បារជាខ្លាំង ហើយចិនបដិសេធទទួលស្គាល់យុត្តាធិការតុលាការផងដែរ៕
© រក្សាសិទ្ធិដោយ thmeythmey.com