ប៊ូ ស៊ាងឡេង មានសុទិដ្ឋិនិយមលើជំនាញម៉ាស៊ីនស្វ័យប្រវត្តិកម្មនៅកម្ពុជា

ជាតិ

ប៊ូ ស៊ាងឡេង មានសុទិដ្ឋិនិយមលើជំនាញម៉ាស៊ីនស្វ័យប្រវត្តិកម្មនៅកម្ពុជា

16, Aug 2015 , 10:19 am

រូបភាព

ដោយ:

ភ្នំពេញ៖ ថ្វីត្បិតបច្ចុប្បន្ននេះ កម្ពុជាមិនទាន់រីកចម្រើនខ្លាំង លើការងារម៉ាស៊ីនស្វ័យប្រវត្តិ តាមរោងចក្រឧស្សាហកម្ម ដូចប្រទេសអភិវឌ្ឍន៍លើពិភពលោកក៏ដោយ តែយុវជន ប៊ូ ស៊ាងឡេង ជឿជាក់ថា រោងចក្រឧស្សាហកម្មម៉ាស៊ីនស្វ័យប្រវត្ត នឹងរីកចម្រើននៅក្នុងប្រទេស តូច ទើបងើបចេញពីសង្គ្រាមរ៉ាំរ៉ៃមួយនេះ។ មានអាយុ ២១ឆ្នាំ ស៊ាងឡេង កំពុងសិក្សាជំនាញអគ្គិសនី និងស្វ័យប្រវត្តកម្ម (Electrical engineering and Automation) នៅសាកលវិទ្យាល័យវិទ្យាសាស្ត្រ និងបច្ចេកវិទ្យា Nanjing (Nanjing University of Science and technology) ប្រទេសចិន។

មូលហេតុដែល លោក ប៊ូ ស៊ាងឡេង ចាប់យកជំនាញសិក្សាម៉ាស៊ីនស្វ័យប្រវត្តកម្ម ព្រោះ លោកស្រលាញ់មុខវិជ្ជាវិទ្យាសាស្ត្រ ហើយម្យ៉ាងទៀតលោកមានគំនិតសុទិដ្ឋិនិយម លើការ វិវឌ្ឍន៍ជំនាញការងារនៅក្នុងប្រទេសកម្ពុជា នាពេលអនាគត។ យុវជនមានដើមកំណើតក្នុងស្រុកបាកាន ខេត្តពោធិសាត់រូបនេះ និយាយរៀបរាប់ថា លោកចូលចិត្តសិក្សាភាគច្រើន មុខវិជ្ជាវិទ្យាសាស្ត្រពិត រួមមាន គណិតវិទ្យា រូបវិទ្យា គីមីវិទ្យា ហេតុនេះទើបលោកឆាប់ ចាំ និងយល់មុខវិជ្ជាវិទ្យាសាស្ត្រ ច្រើនជាងមុខវិជ្ជាវិទ្យាសាស្ត្រសង្គម។

ស៊ាងឡេង ជាសិស្សឆ្នើមដែលទទួលបាននិទ្ទេស B ក្នុងសម័យប្រឡប្រឡងបាក់ឌុបក្នុងឆ្នាំ ២០១២ ពីវិទ្យាល័យបាកាន ហើយលោកក៏បានទទួលបានអាហារូបករណ៍ចូលសិក្សាឆ្នាំទី១ ជំនាញវិស្វករ នៅវិទ្យាស្ថានបច្ចេកវិទ្យា (តិចណូ) ពីក្រសួងអបរំដែរ។ ក្រោយសិក្សានៅសាលា តិចណូអស់រយៈពេលមួយឆ្នាំ យុវជនកូនច្បងចំណោមបងប្អូន ប្រុសពីរនាក់ ក្នុងគ្រួសារអ្នកជំនួញស្រូវក្នុងខេត្តពោធិសាត់រូបនេះ បានសម្រេចចិត្តដាក់ពាក្យ ប្រឡងអាហារូបករណ៍ទៅសិក្សានៅក្រៅប្រទេស ក្នុងនោះ លោកដាក់ពាក្យប្រឡងទៅ ប្រទេសថៃ និងចិន ដើម្បីពង្រីកចំណេះវិជ្ជានៅបរទេស។ យុវជនរូបនេះ ប្រឡងមិនជាប់អាហារូបករណ៍ប្រទេសថៃទេ ប៉ុន្តែលោកបានប្រឡងជាប់អាហារូបករណ៍របស់ រដ្ឋាភិបាលសាធារណរដ្ឋប្រជាមានិតចិន ក្នុងចំណោមនិស្សិតខ្មែរ ៥០នាក់ សិក្សាថ្នាក់ បរិញ្ញាបត្រ នៅប្រទេសចិននៅក្នុងឆ្នាំ ២០១៣ ។

និយាយទាំងទឹកមុខរីករាយ ស៊ាងឡេង ថា នេះជាឱកាសថ្មីមួយទៀត លោកបានចាកចេញទៅ សិក្សានៅបរទេសលើជំនាញអគ្គិសនី និងម៉ាស៊ីនស្វ័យប្រវត្តកម្ម ដែលជាជំនាញមួយ ដែលលោកមានសុទិដ្ឋិនិយមថានឹងវិវឌ្ឍន៍រីកចម្រើន នាពេលអនាគត។

និស្សិតឆ្នាំទី១ កំពុងសិក្សានៅគ្រឹះស្ថានឧត្តមសិក្សារដ្ឋចិនដែលបានបង្កើតជាង ៦០ឆ្នាំនោះ រូបនេះ និយាយថា លោកមានជំនឿលើជំនាញនេះថា កម្ពុជានឹងរីកចម្រើនលើវិស័យ ឧស្សាហកម្ម ព្រោះកម្ពុជាកំពុងតែអភិវឌ្ឍពីប្រទេសកសិកម្ម ទៅប្រទេសកសិឧស្សាហកម្ម និងក្លាយជាប្រទេសឧស្សាហកម្ម។ លោកថា៖«បើប្រៀបធៀបប្រទេសអភិវឌ្ឍ កម្ពុជានៅ ពុំទាន់មានការរីកចម្រើនលើវិស័យឧស្សាហកម្មស្វ័យប្រវត្តកម្មទេ តែកម្ពុជាអាចនឹង ក្លាយជាប្រទេសដូចគេដែរ បើកម្ពុជារក្សាបានកំណើនសេដ្ឋកិច្ច និងការបណ្តុះធនធានមនុស្ស ជំនាញ ដែលប្រកបដោយគុណភាព»។

យុវជនរូបនេះ មិនជួបប្រទះការលំបាកនឹងបរិយាកាស ជីវីតសិក្សា និងការរស់នៅប្រទេសចិន នោះទេ ថ្វីការសិក្សាជាភាសាចិនក៏ដោយ យុវជនរូបនេះ ទទួលបានប្រាក់អាហារូបករណ៍ជាង ៤០០ដុល្លាអាមេរិកក្នុងមួយខែ។ ម្យ៉ាងទៀត លោកក៏ជានិស្សិតឆ្នើមមួយរូប ពីប្រទេសកម្ពុជា ដែលយុវជនអាចឆាប់ចាប់ការបង្រៀនរបស់សាស្ត្រាចារ្យចិន។

រយៈពេល ៣ឆ្នាំទៀត យុវជនរូបនេះ គ្រោងនឹងបញ្ចប់ថ្នាកបរិញ្ញាបត្ររបស់ខ្លួន ហើយលោក ក៏មានគម្រោងដែរ ក្រោយចប់បរិញ្ញាបត្រនោះ លោកនឹងបន្តស្វែងរកអាហារូបករណ៍ថ្នាក់អនុ បណ្ឌិតលើជំនាញនេះ ដែលលោកមានសុទិដ្ឋិនិយម នាពេលអនាគត។ «ខ្ញុំជឿថា វិស័យឧស្សាកម្មម៉ាស៊ីស្វ័យប្រវត្តកម្ម នៅកម្ពុជា នឹងវិវឌ្ឍន៍ជឿនលឿន បន្ទាប់ពីខ្ញុំសិក្សា ជំនាញ នេះរួច ដោយខ្ញុំផ្អែកលើការងារប្រកួតប្រជែងទីផ្សារសេដ្ឋកិច្ចកម្ពុជា»។

ជាចុងក្រោយ យុវជនរូបនេះ ក៏លើកចិត្តដល់សិស្ស និស្សិតជំនាន់ក្រោយ ស្វែងរកអាហារូបករណ៍សិក្សានៅបរទេសផងដែរ ដោយលោកថា៖«ពេលយើងមកប្រទេសគេ អភិវឌ្ឍដូចចិន យើងនឹងទទួលបរិយាកាសថ្មីទាំងការងារសិក្សា ទាំងការរស់នៅ ដើម្បីចូលរួម អភិវឌ្ឍន៍គ្រួសារ និងប្រទេសជាតិយើងវិញ»៕